Plah rơwang amăng blan 2/2023, pok prong anih ĕp kơđi mơ̆ng bruă mă pơkong rơdêh pơgiăng 21 tơlô̆ kyâo uă giong amăng kual bơnư̆ kong ia sang măi drai apui lơtrik Đak Pi Hao II, jĕ guai tơring glông Ia Pa, tơhan djop anom bruă kơnuk kơna tơring glông Kông Chro, Gia Lai ƀuh 7 phun kyâo amăng glai mrô 789 yua kông ty sa ding kơna wai lăng kyâo glai Ia Pa pơgang. Tŏ tui dơ̆ng, anom bruă kơnuk kơna hơmâo ƀuh pơ glai mrô 792 gah kông ty sa ding kơna wai lăng kyâo glai Kông Hde pơgang. Ƀơi anih ĕp ƀuh, hơdôm rơtuh phun kyâo trôl, kyâo pah, kyâo drơ̆m arăng uă hĭ, abih bang kyâo anun arăng pơdŭ đuăi mơ̆ng glai laih. Lăi nao kơ tơlơi ƀuh sui đơi kơđi anai, ơi Lê Văn Thủy Khua kông ty sa ding kơna wai lăng kyâo glai Kông Hde pơhaih, hơmâo tơlơi tơdu amăng bruă mă, ngă bruă aka ƀu tong ten:

“Pơtă pơtăn laih abih bang ƀing apăn bruă sit hơmâo tơlơi hơgĕt lĕ, khom lăi pơthâo hăng khua mua kông ty mơtam pioh pơsir hăng lăi pơthâo pơ dlông dơ̆ng. Samơ̆, ƀơi anŏ ñu, khua mua, mơnuih mă bruă pơmin mơnuih ƀôn sang amăng plơi hyu koh kyâo ngă sang đôč anun, ƀu pơđing nao ôh”.

Tơlơi pơhing arăng phă glai pơrai rưng, koh drôm kyâo ăt dŏ đôč pơ lu anih anom, tơring glông pơkŏn amăng tơring čar Gia Lai, kah hăng ƀơi tơring glông Kƀang, Čư̆ Prong, Čư̆ Sê....Rơnuč blan 2 thun 2023, tơhan lu sang bruă kơnuk kơna tơring glông Kƀang, ƀuh ƀơi glai mrô 114, gah kông ty sa ding kơna wai lăng kyâo glai Sơpai pơgang hơmâo 16 phun kyâo amăng glai pơprong mơ̆ng 40-90 cm arăng uă drôm. Ơi Nguyễn Văn Hợi, Khua kông ty sa ding kơna wai lăng kyâo glai Sơpai, tơring glông Kƀang lăi:

“Bruă mă wai lăng, pơgang glai klô hơdôm thun giăm anai bưp lu tơlơi tơnap tap. Tơhan ngă bruă sit nik lĕ hơduah ĕp ƀu djop mrô mơnuih mă bruă ôh. Mơnuih ƀôn sang kiăng jah glăi hmua gơñu amăng đơ đam lŏn kông ty wai lăng, ră anai jing kơsor kyâo hlăk bluh glăi. Mơnuih ƀôn sang jah kơsing lŏn glai, ngă tơnap kơ kông ty, jah drôm ƀơi anŏ kyâo ƀu thâo yua ôh samơ̆ uă hĭ kiăng pơjing ngă anih rung răng blơi uă kyâo”.

Boh nik ñu, akŏ blan 3 thun 2023, tơhan kông an tơring čar Kon Tum hơmâo ƀuh lu tơlô̆ kyâo arăng uă pơdŏp lui dor amăng čuah treng ia krông Đak Psi, gah să Đak Psi, tơring glông Đak Hà. Anih arăng kuai mă čuah, pơtâo rơga anai lĕ gah kông ty 87. Mrô kyâl uă ča čot anun, kông an hơmâo mă dua pok tơlô̆ kyâo pơprong lă jing hnăl kơpal, 4 pok kyâo lă prong, 11 ƀĕ kyâo hơgăl hăng 5 ƀĕ kyâo dŏ hnong uă aka črek, trơ̆i, pơdŏp lui amăng ia sui hrơi. Kyâo anun pơprong hăng dlông soh. Kiăng tơhan kơnuk kơna huăi ƀuh, ƀing dŏp uă kyâo kuai lŏn dor amăng čuah hăng pơdŏp amăng ia, lơ̆m  phrâo uă hơdui glăi mơ̆ng glai dŏ gah rơngiao gơñu aka ƀu hmao dor hĭ ôh.

Lăp đing nao biă mă anih dor pơdŏp lui kyâo anun kơnong ataih mơ̆ng să 1 km đôč samơ̆ gong gai kơnuk kơna hlong ƀu thâo. Ơi Trần Phước Tuấn Khua jơnum min mơnuih ƀôn sang să Đak Psi lăi: hlâo kơ tơhan kông an ƀuh anih pơdŏp kyâo, gong gai să ăt brơi hyu tir lăng na nao mơ̆n, hyu suh ĕp ƀing uă kyâo, kiăng pơgang glai klô hơđong huăi hơmâo tơlơi uă kyâo ča čot:

“Să ăt akŏ pơjing grup lu anom bruă ngă hrom hyu tir na nao, pơsuh mă ƀing uă kyâo dŏp pioh pơgang glai klô klă hiam ăt kah hăng akŏ pơjing 2 anih pơgăn jơlan nao rai phun jơlan tơring čar mrô 677 hăng jơlan bĕ ia ling dăo. Hrơi blan rơgao bruă mă wai lăng, pơgang glai klô tong ten mơ̆n huăi hơmâo tơlơi hơgĕt ôh”.

Rơngiao kơ kyâo mơ̆ tơhan kơnuk kơna ƀuh ƀơi anih mă čuah mơ̆ng kông ty 87 treng hang ia krông Đak Psi, gah să Đak Psi, tơring glông Đak Hà, dŏ hơmâo lu kyâo ĕp ƀuh pơdŏp lui amăng đang kơsu ataih mơ̆ng anun 300 m, hăng 2 anih pơƀut lui kyâo. Ƀơi anih pơƀut kyâo tal sa ƀuh 7 tơlô̆ kyâo lă uă giong, dŏ glăi ƀinh dŏp uă kyâo pơdŏp lui amăng luh mă čuah mơ̆ng kông ty 87 hang ia krông Đak Psi.

Lơ̆m lăi nao kyâo mơ̆ tơhan kơnuk kơna ƀuh hăng mă pơkong anun, sa čô khua anom bruă tơhan pơgang glai klô tơring čar Kon Tum ăt kơnong lăi nao kơ mrô kyâo hơmâo 6 tơlô̆ kyâo lă uă giong, 11 tơlô̆ kyâo hơgăl phrâo uă hăng 5 ƀĕ kyâo aka uă črek tram lui amăng ia sui hrơi, pơdŏp amăng luh mă čuah hăng amăng đang kơsu. Pô khua anai lăi, tơtă anai hlăk hyu sem tơlơi soh, gah kông an pô ĕp lăng kiăng thâo rơđah, gah tơhan pơgang glai rưng kơnong hơdai gum hrom đôč yua anun ƀu thâo rơđah tơlơi pơhing hăng rơnoh kyâo pơtâo arăng mă pơkong anun.

Pok pơhư prong bruă ĕp kơđi tơlơi soh uă dŏp kyâo, tơhan kơnuk kơna amăng tơring čar Kon Tum hơmâo ƀuh dơ̆ng ƀơi kual glai mrô 327, să Đak Psi hơmâo 22 phun kyâo arăng uă hĭ. Samơ̆ aka ƀu thâo rơđah mơ̆n, kyâo arăng drôm anun ñu djơ̆ hrom hăng kyâo arăng pơdop ƀơi luh mă čuah mơ̆n hă. Kơđi tơlơi anai, tơhan djop sang bruă kơnuk kơna ƀơi Kon Tum hlăk pơtrut ĕp rơđah, sem lăng kơđi tơlơi soh.