Ră anai, ƀơi 7 boh să ƀơi 3 boh tơring glông giăm guai tơring čar Gia Lai hơmâo akŏ pơdong anih anom pơhlôm kjăp amăng 49 boh plơi pla, hăng abih bang hơmâo truh 11.700 boh sang anŏ. Pơ anai, anom bruă ping gah, jơnum min mơnuih ƀôn sang tơring čar Gia Lai hơmâo git gai djop gơnong bruă, anom bruă, gong gai kơnuk kơna djop plơi pla ngă hrŏm hăng tơhan pơgang guai dêh čar, pơjing adơi ayong, djru nao rai hăng djop plơi pla, pok pơhai lu hơdră “Sang pơđao ƀơi guai dêh čar”. Bơbung sang pơđao brơi kơ mơnuih ƀôn sang dŏ ƀơi kual guai dêh čar, bul pơtâo plao ia rơsĭ; ană rơmô pioh rông brơi kơ mơnuih ƀun rin; Ngă hrŏm hăng khul đah kơmơi ƀơi guai dêh čar….Ƀing khua mua, ling tơhan hơmâo pơgôp prăk blan, hăng rơnoh hơdôm rơtuh klăk prăk rim thun pioh pok pơhai ngă tui hơbô̆ bruă “Čung tơkai adơi nao sang hră-Ană rông tơhan pơgang guai”. Mơ̆ng anun, djru ba, ngă ană mĕm kơ 52 čô čơđai sang hră ƀun rin ƀơi kual giăm guai dêh čar dưi nao hrăm hră mơ̆ng anih 1 truh anih 12, pơtô tơlơi ƀu thâo hră kơ hơdôm rơtuh čô ană amôn kual ataih ƀu truh nao sang hră yua sang anŏ ataih hăng tơnap tap đơi. Tha plơi yă Ksor H'Lâm, să guai dêh čar Ia Mơr, tơring glông Čư̆ Prong brơi thâo:

“Hăng mơnuih ƀôn sang ƀơi kual guai dêh čar kah hăng să gơmơi, puih kơđông tơhan pơgang guai dêh čar lĕ kah hăng sang anŏ kơnung djuai baih. Mơ̆ng bruă anet prong kah hăng pơdong sang, čông jơnah jah glai ngă hmua, kai čuar hmua ia, ƀing tơhan pơgang guai dêh čar amra djru hrŏm soh sel; hơmâo tơlơi hơgĕt thâo pơdjơ̆ sao nao rai ƀu mơak ăt kơnang kơ tơhan pơgang guai dêh čar mơ̆n rai pơsir, dju djuăm duăm ruă hai ăt kơnang kơ tơhan pơgang guai dêh čar mơ̆n”.

Hrŏm hăng anun, ƀing tơhan pơgang guai dêh čar gum hrŏm gong gai kơnuk kơna amăng kual plơi pla pok pơhai klă hơdôm bruă pơtrun djru ană plơi pơđĭ kyar bơwih ƀong huă, lui rơmŏn kŏn rin, pơblih tơlơi pơmin hơdră či mă bruă bơwih ƀong huă. Tơlơi anun hơmâo pơtrut bruă mă pơđĭ kyar mơnuih mơnam bơwih ƀong huă ƀơi plơi pla kual guai dêh čar, ngă rai sa bruă djơ̆ hrŏm tơlơi pơmin mơnuih ƀôn sang hăng khua mua gong gai kơnuk kơna, lir hơbit pơhlôm pơgang tơlơi rơnuk rơnua amăng kual guai dêh čar.

Pơhiăp ƀơi mông jơnum, ơi Trương Hải Long Kơ-iăng khua ping gah, Khua jơnum min mơnuih ƀôn sang tơring čar Gia Lai čih pioh hăng lăng yôm boh tơhnal amăng bruă akŏ pơdong anih pơhlôm kjăp rơnuk rơnua ƀơi guai dêh čar hăng ƀu hơmâo tơlơi mut sua ngă rung răng thun blan rơgao. Laih dơ̆ng, hơmâo pơtong rơđah tơlơi dưi ngă pô ƀơi guai dêh čar lĕ yôm pơphăn hăng khom pơgang tong ten, ñu rơkâo tơhan pơgang guai dêh čar ăt djă pioh pơđĭ tui tơlơi glăm ba mơ̆ng anom bruă, puih kơđông tơhan amăng bruă wai lăng, pơgang ling guai; kơtưn bruă jĕ giăm gum hrŏm ană plơi pla; pơtrut bruă pơtô pơblang, kiăng thâo hluh rơđah tơlơi dưi ngă pô lŏn ia, ling guai dêh čar; đing nao kơ bruă akŏ pơdong puih kơđông sang bruă kjăp tong ten hlom bom, man pơdong djop să treng guai kơtang amăng djop mơta bruă, pơgôp hrŏm bruă pơgang hơđong tơlơi rơnuk rơnua amăng kual.

Gah ling tơhan pơgang guai dêh čar, Thiếu tướng ơi Nguyễn Đức Mạnh, Kơ-iăng khua tơhan pơgang guai dêh čar Việt Nam, bơni kơ tơring čar Gia Lai, anom bruă ping gah, jơnum min mơnuih ƀôn sang hăng djop gơnong bruă ƀơi tơring čar hăng mơnuih ƀôn sang amăng kual guai dêh čar hơmâo djru hrŏm ngă bruă, kiăng ƀing tơhan pơgang guai dêh čar dưi ngă giong bruă jao. Tui hăng thiếu tướng ơi Nguyễn Đức Mạnh, tơlơi pơhing ƀơi rŏng lŏn tơnah hăng amăng kual ăt dŏ rung răng, anun yơh kiăng ƀing ta khom ngă djơ̆ tơhnal bruă amăng rơnuk phrâo, khom pơđĭ tui pran jua lir hơbit hăng ană plơi pla, djru man pơdong anih anom pơgang lŏn ia kjăp tong ten hăng glông bruă kơđi čar khom pơđĭ tui tơlơi gơgrong ba ngă hrŏm, lăi pơthâo hăng mơnuih ƀôn sang laih anun gong gai kơnuk kơna ƀơi tơring čar pioh ngă pơgiong bruă jao hrŏm:

“Hăng ƀing tơhan pơgang guai dêh čar ƀơi Gia Lai, rơkâo kơ abih bang ăt ngă klă bruă lăi pơthâo kơ Ping gah anom bruă khua tơhan pơgang guai dêh čar hăng ping gah tơring čar Gia Lai, khul bruă pơ ala mơnuih ƀôn sang, jơnum min mơnuih ƀôn sang tơring čar amăng bruă mă git gai wai lăng, pơčrâo ba djop gưl anom bruă, khul grup mơnuih tơpuôl laih anun abih bang mơnuih ƀôn sang kiăng gum pơgôp ha pran jua kơtang amăng bruă pơtrut bơwih ƀong huă mơnuih mơnam, lui rơmŏn kŏn rin. Akŏ pơdong glông bruă kơđi čar mơ̆ng yŭ truh pơ dlông kiăng ngă giong hiam klă, tŭ yua bruă jao wai pơgang tơlơi dưi ngă pô kơ lŏn ia”.

Ƀrô djơ̆ tal anai, Khua tơhan pơgang guai dêh čar Việt Nam, Jơnum min mơnuih ƀôn sang tơring čar Gia Lai hơmâo jao hră apah bơni; Anom bruă khua tơhan pơgang guai dêh čar tơring čar Gia Lai hơmâo jao hră bơni hơdor pioh jing miđai kơ khul grup, mơnuih mă bruă ba gru hlâo djru prong amăng bruă pơtrun wai pơgang tơlơi rơnuk rơnua ƀơi guai dêh čar.