Amăng mrô 22 boh sang phrâo man pơkra ƀơi să Gào, plơi prong Pleiku, sang anŏ ơi Siu Kra (plơi C) hơmâo ruah ngă anih pơphun man pơdong blung a. ơi Siu Kra hok kơdok ră ruai:“Kâo hơmâo pran biă mă yơh, bơni kơ plơi prong djru ba sang anŏ kâo jing sang anŏ tơnap tap dưi pơkra glăi sang dŏ, hơmâo sang phrâo, dua rơkơi bơnai gơmơi hơđong pran laih”.

Tui hăng akŏ bruă, plơi prong Pleiku amra man pơdong phrâo 41 boh sang dŏ hăng pơkra glăi 28 boh sang hăng rơnoh prăk djru 60 klăk lơ̆m sa boh sang man pơdong phrâo hăng 30 klăk hăng sang dŏ pơkra glăi. Ơi Trịnh Duy Thuân, Khua ping gah plơi prong Pleiku lăi:“Plơi prong Pleiku ruh sang dŏ tơ̆i, sang phô̆ hơmâo 69 boh sang, gơmơi pơsit hrơi man pơkra giong amăng blan 4/2025, khŏm kiăng djŏp gưl, anom bruă, plơi pla djru ba kơtang. Hăng hrơi blan ječ ameč tui anun, hơdôm anom bruă tơhan, anom bơwih ƀong, djŏp gưl anom bruă pơtrut tui pran jua thâo khăp pap tơdruă, gir ngă jơlan hơdră anai djơ̆ hăng tơlơi kiăng hăng hrơi blan pơkă”.

Lăi nao bruă gum djru ruh abih sang dŏ tơ̆i, sang phô̆, Trung tá Ngô Văn Phôi, Kơ-kiăng khua Trung đoàn 48, Sư đoàn 320, Quân đoàn 34 lăi rơđah:“Ƀing gơmơi hơmâo akŏ pơdong grup git gai, akŏ pơdong hơdôm grup mă bruă hăng ngă hrŏm kjăp tom gong gai, biă ñu lĕ hơdôm plơi pla, pơphun pơhlôm brơi anih đih pơdơi ƀong huă, pơphun man pơkra sang dŏ djơ̆ hăng hrơi pơkă đah mơ̆ng ngă truh kih jơlan hơdră mơ̆ng Kơnuk kơna hăng tơring čar ba tơbiă”.

Hrŏm hăng Pleiku, abih bang tơring amăng tơring čar Gia Lai ăt glăk ječ ameč gir ngă giong jơlan hơdră ruh abih sang dŏ tơ̆i, sang phô̆ amăng 3 blan tal 2 thun 2025. Jing sa amăng hơdôm čô mơnuih hơmâo kơnuk kơna man pơdong sang dŏ phrâo, amai Puih Lý (plơi Đe Chi, să Ia Pêč, tơring glông Ia Grai) ol kơdol brơi thâo:“Kơnuk kơna lăng ba djru man pơdong sang phrâo hăng brơi sa drơi rơmô, thun tơdơi anai rơkơi bơnai gơmơi gir ngă bruă đah mơ̆ng huăi rin rơpa, dưi lô ba ană bă hrăm hră”.

Yă Phạm Thị Kim Tuyến, Kơ-iăng khua Jơnum min mơnuih ƀôn sang să Ia Pêč, hok mơak kơ anŏ tŭ yua mơ̆ng jơlan hơdră anai:“Anai jing jơlan hơdră prong biă mă, yôm biă mă kơ mơnuih ƀun rin tơnap tap. truh ră anai să dŏ năng ai ñu 20 boh sang anŏ tơnap ƀu hơmâo sang dŏ, să ngă hrŏm hăng gong gai anom bruă lăng glăi tong ten kiăng jơlan hơdră anai klă hloh lơ̆m pơphun ngă”.

Tui hăng akŏ bruă, tơring čar Gia Lai kiăng man pơdong sang phrâo hăng pơkra ming rơbêh 8.400 boh sang dŏ amăng 3 blan tal 2 thun 2025. Kiăng dưi ngă bruă lŏm lui sang dŏ tơ̆i, sang phô̆ ƀơi tơring čar, Gia Lai kiăng hơmâo truh kơ 460 klai prăk. Amăng anun, Kơnuk kơna djru ba tơring čar 241 klai, 87 klai mơ̆ng prăk pơkrem 5% mrô prăk mơ̆ng tơring čar hăng hơdôm tơring glông. Ơi Hồ Văn Niên, Khua ping gah tơring čar Gia Lai brơi thâo, tơring čar glăk gir iâu pơthưr hơdôm mrô dŏ kơƀah či dưi man pơkra sang dŏ kơ ană plơi pla:“Ăt dŏ kơƀah mơn 127 klai prăk tơring čar aka ƀu hơmâo anun jing iâu pơthưr gum djru dong, anun jing rơkâo kơ Grup git gai bruă tơring čar ngă bruă hăng hơdôm anom bruă Kơnuk kơna biă ñu lĕ Jơnum min djŏp djuai ania mơnuih mơnam Việt Nam djru ba dong kơ tơring čar Gia Lai. Ding kơna Grup git gai tơring čar pơtrut pran jua ngă bruă gơgrong, pel ĕp, pơtô ba hăng thâo rơđah tơlơi hơmâo amăng djŏp kual plơi pla hơmâo jao ngă bruă, lăi pơthâo glăi rơđah rơđông laih anun Grup git gai bruă tơring čar jơnum rim blan či pơtŏng glăi bruă ngă amăng rim blan”./.