Ƀu mơ-ak pran jua, ƀu hơđong yua kơ bơbeč djơ̆ tơlơi tŭ yua hăng tơlơi pơhlôm klă, lu mơnuih ƀôn sang hmâo mơ-ĭt laih hră kơ hơdôm gưl gong gai, rơkâo dưi pơsir.

2 thun anai, yap mơng hrơi tơmeh pơdŏng pơkĕ apui lơtrik hăng jua angin N13 gah Sang măi pơkĕ apui hăng jua angin Ia Ale 1 mơng Sang bruă tuh pơplai kơ apui lơtrik pơkĕ hăng jua angin Cao Nguyên 1 pơkra giong, 5 čô mơnuih amăng sang anô̆ amai Phạm Thị Hòa (plơi Phú Bình, să Ia Ale, tơring glông Čư̆ Pưh) khom hơdip amăng pran jua ƀu mơ-ak. Yua kơ sang ñu hơdip giăm tơmeh pơdŏng pơkĕ apui lơtrik 80 met. Djop mơta bruă, bơwih ƀong huă ngă đang hmua rim hrơi leng kơ ƀơi yŭ čăng măi pơkĕ apui hăng jua angin prong prin. Sang anô̆ ñu čang rơmang dưi rit đuăi sang dô̆, đang war nao pơ̆ anih dô̆ phrâo kiăng pơhlôm klă, samơ̆ ƀu dưi ôh:

 “Čăng măi pơkĕ apui hăng angin rơgao kơ sang kâo lĕ 70 met, tơmeh ataih mơng sang kâo 10 met, mơng tơkai tơmeh nao pơ̆ sang kâo lĕ 80 met. Ră anai čăng tơmeh pơkĕ dô̆ hăng dlông kông ngăn, tơlơi hơdip sang anô̆ kâo. Sang anô̆ kâo ƀu mơ-ak, ƀu hơđong pran jua ôh, 2 thun laih mơ-ĭt hră rơkâo kơ gong gai”.

Tui tơlơi pơkă mơng Ding jum sĭ mơdrô ƀơi rơwang 2 Mơta tơlơi 2, Tơlơi pơtrun 02/2019 mơng Ding jum sĭ mơdrô lĕ “Ring bruă pơkĕ apui hăng jua angin khom ataih mơng kual mơnuih ƀôn sang dô̆ ƀiă biă mă ñu 300m”. Khă hnun hai, ră anai Ding jum sĭ mơdrô akă hmâo tơlơi pơkă rơđah kơ rơnoh pơ ala glăi, djru gum amăng rơwang 300 m gah yŭ tơkai čăng măi pơkĕ apui hăng angin. Tơlơi anai ba truh bruă pô tuh pơplai 16 rơwang bruă pơkĕ apui lơtrik hăng jua angin dưi pơdŏng thun 2021 ƀơi tơring čar Gia Lai leng kơ ngă tui rơnoh pơ ala glăi dưm dưm hăng 10% rơnoh pơ ala glăi prăk djru hăng pơdŏng glăi anih dô̆ phrâo lom kơnuk kơna mă lŏn hmâo pơkă amăng rơwang 2 Mơta tơlơi 10 Tơlơi pơsit mrô 09/2018 lơ 12/3/2018 mơng Jơnum min mơnuih ƀôn sang tơring čar Gia Lai.

Yă Phan Thị Minh Phượng, mơnuih ƀôn sang hmâo sang dô̆ hăng ring bruă gah kual pơ ala glăi ƀơi rơwang bruă Sang măi pơkĕ apui hăng jua angin Ia Ale 1 lăi lĕ, rơnoh pơ ala glăi 10% tui anun lĕ ƀu lăp djơ̆ ôh:

 “Kual lŏn sang kâo lĕ 180 met kơ rê, war be lĕ rơbêh kơ 540 met kơ rê. Hăng rơnoh djru lĕ 190 klăk prăk lĕ nao pơ̆ hơpă. Nua anai ƀu djop kơ sang anô̆ rit đuăi pơ̆ anih pơkon ôh. Anai lĕ anih mơng sang anô̆ hmâo, ră anai rơkâo nua ñu găp ƀrô kiăng hmâo tơlơi hơdip hơđong”.

Ƀu mơ-ak pran jua yua kơ tơlơi dưi yua akă pơhlôm klă, hơdôm bôh sang anô̆ ƀơi să Ia Ale, tơring glông Čư̆ Pưh hmâo laih lu wot mơ-ĭt hră pơ-ar rơkâo, ƀom kiơng. Tŭ mă tơlơi gum pơhiăp mơnuih ƀôn sang, Jơnum min mơnuih ƀôn sang tơring čar Gia Lai hmâo laih hră pơ-ar rơkâo hăng Kơnuk kơna; Grŭp khua pơ ala mơnuih ƀôn sang tơring čar ăt ruah mă mơn tơlơi gum pơhiăp, rơkâo đĭ hăng Khua pơ ala mơnuih ƀôn sang. Krah blan 4/2023, Khua jơnum min mơnuih ƀôn sang tơring čar Gia Lai hmâo bruă bơkơtuai hăng mơnuih ƀôn sang să Ia Ale. Pơkă hlâo rơnuč blan 5/2023, Jơnum min mơnuih ƀôn sang tơring čar Gia Lai hrom hăng hơdôm gơnong bruă mơng tơring čar amra hmâo mông mă bruă hăng anom bơwih ƀong, kiăng ĕp jơlan pơsir pơđut hĭ, pơhlôm tơlơi dưi yua mơng mơnuih ƀôn sang.

Ơi Nguyễn Minh Tứ - Kơ-iăng Khua Jơnum min mơnuih ƀôn sang tơring glông Čư̆ Pưh, tơring čar Gia Lai brơi thâo, lom tơguan hơdôm ding jum, gơnong bruă dêh čar ta hmâo tơlơi pơtô ba, gong gai plơi pla lăi pơthâo na nao pơsur mơnuih ƀôn sang, bĕ tơlơi ƀom kiơng lu mơnuih ngă rung răng amăng plơi pla, ala ƀôn:

 “Tơdơi kơ hmâo tơlơi rơkâo đĭ mơng neh wa lĕ, gong gai pơsir klă pơhlôm laih tơlơi dưi kơ neh wa. Ră anai hmâo 17 bôh sang anô̆ hmâo sang dô̆, gơnam tam gah rơgô̆p čăng măi pơkĕ apui hăng jua angin, bơdjơ̆ nao tơlơi hơdip mơda mơng neh wa. Tơring čar hmâo gum hrom laih hăng tơring glông lu wot mă bruă hăng anom bơwih ƀong, rơkâo đĭ kơnuk kơna hmâo jơlan pơsir tơlơi anai”.

Hlâo kơ anun, mơnuih ƀôn sang să Ia Pê̆č, tơring glông Ia Grai, tơring čar Gia Lai ăt lăi nao mơn, hơdôm tơmeh apui lơtrik pơkĕ hăng jua angin bơdjơ̆ nao phun pla. Rơđah biă ñu, hnoh pơđoh ia mơng 2 ƀĕ tơmeh pơkĕ apui hăng jua angin hmâo ngă tơhroh đuăi lŏn ngă đang hmua mơnuih ƀôn sang; tơmeh apui lom pơkĕ apui rơngañ bơdjơ̆ nao tơlơi hơdip mơda mơng hơdôm bôh sang anô̆ dô̆ giăm anun. Yua anun, khom djru rit đuăi ring bruă, sang anô̆ amăng rơwang pơhlôm mơng tơmet pơkĕ apui anun. Mơnuih ƀôn sang ƀơi sa dua bôh să ƀơi tơring glông Čư̆ Prong, tơring čar Gia Lai ăt lăi nao mơn tơlơi ngă rơngañ mơng tơmeh pơkĕ apui anun yua kơ pơdŏng giăm sang dô̆ mơnuih ƀôn sang đơi.

Gơnong bruă sĭ mơdrô tơring čar Gia Lai hmâo rơkâo laih Ding jum sĭ mơdrô dêh čar ta pơtô brơi ƀudah mă yua, kiăng pơsit brơi tơlơi mă yua hơdôm tơlơi pơkă rơđah gah pơhlôm ring bruă pơkĕ apui hăng pơ ala glăi kơ mơnuih ƀôn sang, djru lŏn hăng kông ngăn nao hrom hăng lŏn hmâo amăng glông jơlan pơhlôm mơng tơmeh pơkĕ apui. Khom hmâo tơlơi pơtô ba kơ pơsit kual lŏn bơdjơ̆ nao, rơnoh bơdjơ̆ nao, jŭ yap rơnoh pơ ala glăi, djru lŏn, sang dô̆, gơnam tam, phun pla, war rông hlô... kiăng ngă gru than pok pơhai ngă tui, djru hơđong rơnuk rơnua ƀơi hơdôm plơi pla hmâo rơwang bruă pơkĕ apui hăng jua angin ƀơi tơring čar Gia Lai./.