Lơ 26/12, Ping gah tơring čar Gia Lai pơphun jơnum klah čun 7 thun ngă tui tơlơi pơtrun mrô 18 mơng Khul apăn bruă Ping gah tal XII kơ bruă dưm dăp anih anom mă bruă hơbot, mă bruă klă, tŭ yua. Tui akŏ bruă pơ anăp,  Gia Lai him lăng amra dưm dăp hơbot anih anom mă bruă, him lăng hrŏ trun 7 gơnong bruă, 31 anih anom. Tơring čar Gia Lai him lăng pơmut hơdôm gơnong bruă, sang bruă hơmâo: Anom pơtô bruă Ping gah hăng anom pơtô ba mơnuih ƀôn sang Ping gah tơring čar; gơnong kơčăo bruă hăng tuh pơ alin hăng gơnong bruă prăk kak; gơnong bruă ngă hmua hăng pơđĭ kyar ƀon lan hăng gơnong bruă wai lăng rơhuông adai lŏn mơnai; gơnong bruă man pơdong hăng gơnong bruă wai lăng jơlan glông; gơnong bruă boh thâo mă mok hăng gơnong bruă pôr pơhing; gơnong bruă wai lăng bruă mă hăng gơnong bruă mă, tơhan rơka hăng mơnuih mơnam.

Hrŏm hăng anun, gơnong bruă ia jrao amra pơhrua dong bruă wai pơgang tơlơi suaih pral kơ ƀing apăn bruă mơng anom bruă wai pơgang hăng bơwih brơi tơlơi suaih pral kơ ƀing apăn bruă tơring čar. Gơnong bruă pơtô pơjuăt tŭ mă bruă wai lăng pơtô pơjuăt bruă mă mơng gơnong bruă mă, tơhan rơka hăng mơnuih mơnam. Laih dong, tơring čar amra akŏ pơjing khul djuai ania-tơlơi đăo, anai lĕ pơmut hrŏm khul djuai ania hăng khul tơlơi đăo.