Gia Lai kĭ brơi dua kơčăo bruă tuai hyu čuă lăng anih anom hiam prong biă ƀơi Kon Ka Kinh hăng Kon Čư̆ Răng
Thứ sáu, 10:32, 10/07/2026
VOV Tây Nguyên/Siu H'Mai Pơblang
VOV Tây Nguyên/Siu H'Mai Pơblang
VOV.Jarai - Jơnum min mơnuih ƀôn sang tơring čar Gia Lai phrâo kĭ brơi Kơčăo bruă ba tuai hyu čuă ngui amăng anih anom glai rưng hiam, đih pơdơi, ngui ngor ƀơi Kual pơgang glai rưng Kon Čư̆ Răng hăng Đang dêh čar Kon Ka Kinh, pok jơlan đĭ kyar čơkă tuai hyu ngui pơlir hăng pơgang ba glai rưng hăng djŏp mơta ra mơnŏng.
Ƀơi Kon Čư̆ Răng amra akŏ pơdong 5 bit anih, 8 anih čuă ngui glông giăm 190km; anăp nao truh thun 2045 čơkă năng ai 150.000 wơ̆t tuai, pơhrui glăi rơbêh 225 klai prăk rim thun. Lơ̆m anun, Kon Ka Kinh prăp rơmet pơdong 5 bit anih, 12 glông jơlan ba tuai hyu ngui năng ai 201 km, kơnang kơ anih anom glai klô hiam hăng gru grua hiam djuai ania Bahnar, anăp nao pơhrui glăi năng ai 78 klai prăk rim thun amăng thun 2045.
Gia Lai kiăng abih bang bruă tuh pơ alin khŏm kiăo tui tơlơi pơkă mơ̆ng Tơlơi phiăn glai rưng, ƀu ngă răm rai glai rưng či ƀong prăk, brơi ngă hlâo hơdôm ring bruă jê̆ giăm hăng ayuh hyiăng, huăi ngă hơƀak jrak, pơhlom anih anom amăng glai rưng dŏ hơnong./.
Viết bình luận