Tui hăng hră lăi pơthâo mơ̆ng Jơnum min mơnuih ƀôn sang tơring čar Gia Lai thun 2023, tơring čar hơmâo ngă djop 14/21 tơhnal pơkă bơwih ƀong huă kơ mơnuih mơnam, ngă tui jơlan hơdră djru tơlơi hơdip mơda kơ mơnuih mơnam amăng anun hơmâo sang anŏ gum kơ bruă hơkrŭ lŏn ia, sang anŏ hơmâo anăn kơnuk kơna djru, bruă pơhlôm, pơgang rơnuk rơnua guai dêh čar dưi kjăp hơđong, rơnoh pơđĭ kyar bơwih ƀong huă mơnuih mơnam ăt hơđong mơ̆n. Khă tui anun,  tơring čar ăt dŏ 7 tơhnal pơkă aka dưi ngă djơ̆ akŏ bruă jao, rơnoh pơđĭ kyar aka ƀu djơ̆ hăng tơlơi čang rơmang ôh, bruă pơhưč tuh pơ alin bưp lu tơlơi tơnap tap gun gan, hơdôm tơlơi dŏ gun anun lĕ pơdjơ̆ nao kơ bruă pơkă kual, anih man pơdong, duh glăi lŏn mơnuih ƀôn sang, pơklaih ala lŏn, čuk pơdăo, pok pơhai ngă tui Hơdră bruă mơ̆ng dêh čar djru dŏ kaih…

Kiăng pơhlôm hlâo ngă djơ̆ bruă jao bơwih ƀong huă kơ mơnuih mơnam tơring čar thun 2024, Gia Lai rơkâo kơnuk kơna hăng hơdôm ding jum anom bruă djru pơsir brơi anŏ gun amăng bruă jŭ yap glăi tơhnal pơkă mă yua lŏn tơnah truh thun 2025 djơ̆ găl hăng tơlơi bơwih ƀong huă hơmâo biă amăng tơring čar; čih pơkra rơnoh pơkă hnong bơwih ƀong huă-boh thâo mơneč ia rơgơi, bơwih bơwăng brơi bruă čar lŏm mă yua prăk, kông ngăn kơnuk kơna pioh kơ bruă ia jrao, pơsir hĭ pok pơhai hơdră bruă mơ̆ng dêh čar djru; pok pơhai bruă čuk pơkra jơlan rơdêh đuăi hmar Plei Ku–Quy Nhơn tui hăng hơdră  kơnuk kơna tuh pơ alin….Amăng bruă pơkra apui lơtrik mơ̆ng jua angin, jua ia juăt lăi, apui lơtrik rơgoh, ơi Phạm Văn Binh Khua Gơnong bruă tuh tia pơkra ming hăng sĭ mơdrô tơring čar Gia Lai lăi:

“Gia Lai hơmâo năng ai dưi pơkra ming truh 3000 MWp (megewat pitch), samơ̆ kơnong dưi duh glăi pioh man pơdong djop brơi 30 MWp đôč, yua kơ anun, pơkra ming hơpluh črăn samơ̆ ba sĭ kơnong sa črăn pơkĕ amăng hrĕ apui lơtrik dêh čar. Thun 2020-2021, tơring čar ăt pok pơhai ha amăng plĕ 17 kơčăo bruă pơkra apui lơtrik hăng jua angin, jua ia abih bang jua kơtang 1.200 MWp. Mah hnun, phrâo anai pơkă hnong glăi apui lơtrik 8 dŏ glăi 604 MWp đôč mơ̆ng thun 2021-2030. Yua kơ anun, pơkă hăng anŏ gêh găl mơ̆ng tơring čar dŏ ƀiă đơi,kiăng hơmâo tơlơi đing ba lu hloh mơ̆ng gơnong dlông”.

Ƀơi mông mă bruă, khua mua pơ ala gah Ding jum jơlan glông-pơdŭ pơgiăng, Ding jum prăk kăk, Ding jum tuh tia pơkra ming hăng sĭ mơdrô, Ding jum Man pơphô hăng Tuh pơ alin, Ding jum pơtom hiăp, Jơnum min djuai ania….ăt hơmâo lăi pơthâo pơblang brơi laih kiăng thâo rơđah anŏ kiăng, tơlơi rơkâo mơ̆ng tơring čar djơ̆ hăng tơlơi dưi mơ̆ng tơring čar wai lăng; laih dơ̆ng, čih pioh, tŭ mă hiăp djru pơgôp brơi amăng boh yôm phun pơdjơ̆ nao hăng tơlơi dưi pioh pơƀut glăi, lăi pơthâo hăng kơnuk kơna brơi sem lăng, pơsir brơi kơ tơring čar.

Pơhiăp klah čun amăng mông jơnum, Khua ding jum pơtom hiăp ơi Bùi Thanh Sơn lăi rơđah: thun 2024, Kơnuk kơna hơmâo hơdră pơtrun “Gum pơgôp ngă bruă tơpă, khin hơtai beč bal, pơblih phrâo thâo pơčeh găl, hmao kru tŭ yua”. Mơ̆ng tơlơi gêh găl sit nik ƀơi tơring čar, rơkâo tơring čar hneč mă, ngă rơđah tui akŏ bruă pok pơhai tum teč. Tui hăng anun, tơring čar khom pơtum nao kơ bruă pok pơhai khut khăt pok pơhai hră pơtrun mrô 23 mơ̆ng Ding jum kơđi čar; brơi pơkă hnong tơring čar Gia Lai mơ̆ng thun 2021-2030; kơsem min ĕp lăng jơlan hơdră tơlơi phiăn phara kơ kual DapKơdư; pok pơhai ngă tui hmao kru hơdôm hơdră dêh čar pơkă; pơtum nao bruă pơblih phrâo ngă hră pơar; djru kơ anom bruă sĭ mơdrô pok pơhai pơkra ming sĭ mơdrô. Khua ding jum ơi Bùi Thanh Sơn lăi pơtong:

"Kâo rơkâo 3 mơta bruă khom ngă anun lĕ: pok pơhai khut khăt hơdôm hră pơtrun git gai mơ̆ng ping gah dêh čar, anom bruă khua pơ ala mơnuih ƀôn sang dêh čar, kơnuk kơna dêh čar brơi ngă tui tŭ yua hơdră pơtrut pơđĭ kyar bơwih ƀong huă mơnuih mơnam hăng akŏ bruă 5 thun. Amăng anun, đing nao lăng yôm klâo wŏt ngă bruă kơtang hloh hăng 6 mơta bruă glăm ba ngă tui amăng 12 khul bruă phun hơdră pơsir mơ̆ kơnuk kơna ba tơbiă; pơhlôm tơlơi rơnuk rơnua hơđong kơ mơnuih mơnam amăng tơring čar, akŏ pơdong atur tơlơi bơwih ƀong huă rơngai ngă pô lir hơbit hrŏm mut phung jar kmar prong hloh, tŭ yua hloh. Tal klâo dơ̆ng lĕ hruă kjăp tơlơi tơpă amăng bruă mă, djơ̆ tơlơi phiăn kiăng pơđĭ tui boh tơhnal ngă tui djop hră pơtrun mơ̆ng khua pơ ala mơnuih ƀôn sang dêh čar, tơlơi phiăn dêh čar”.

Khua ding jum rơkâo, thun 2024, Gia Lai kiăng kiăo tui tong ten hơdră, akŏ bruă mơ̆ng Kơnuk kơna pơtrun kơ anăp mă bruă “pran jua tơpă, glăm ba, prăp lui hmao kru, pơtrut pơčeh phrâo hăng tŭ yua hơđong kjăp”; laih dơ̆ng, pơtong rơđah jing thun “kah hăng ia đuăi” amăng bruă ngă tui ječ ameč hăt he ba mơtam pơđĭ kyar bơwih ƀong huă mơnuih mơnam 5 thun pioh pơtum git gai ngă tui.

Hrŏm hăng tơhnal pơkă hơdôm bruă mă phun yôm mơ̆ tơring čar Gia Lai kiăng ngă tui, Khua ding jum ơi Buì Thanh Sơn rơkâo hơdôm ding jum, anom bruă ƀơi gơnong dlông đing nao, lăng tui djop bruă rơkâo mơ̆ng tơring čar pioh pơtum pơsir hĭ, hơmâo hơdră mă bruă tum teč rơđah rơđong kiăng pok pơhai tŭ yua 3 hơdră tơhnal pơtrun mơ̆ng dêh čar, pơđĭ kyar bruă apui lơtrik yua rơgoh hơđong kjăp, tuh tia pơkra ming, bruă ngă hmua ba yua boh thâo ia rơgơi, pơtrut sĭ mơdrô ƀơi guai dêh čar, ba tuai hyu ngui….ăt kah hăng djru kơsem min hơdôm jơlan hơdră, tơlơi pơtrun phara pioh pơtrut pơđĭ kyar kual Dap Kơdư, amăng anun hơmâo tơring čar Gia Lai.