Hơdôm hrơi pơdơi pơdă ngă yang ngui ngor mơak kơ dêh čar, ơi Phạm Xuân Hương hrŏm hăng lu sang anŏ ƀơi plơi O Sar, să Ia Kenh, plơi prong Plei Ku ăt hyu tir, ĕp lăng re se đơ đam lŏn glai kơnuk kơna jao gơñu wai lăng ƀơi kual gah Kơdư hang ia Nueng. Ñu brơi thâo tui anai:

“Ngă tui bruă jao kơ djop sang anŏ wai lăng hăng gơgrong ba tong ten pơgang glai rưng. Blung hlâo lĕ hrăm kơ bruă mă thâo hluh tơlơi phiăn pơgang glai rưng, ngă tui bruă hyu sem, ĕp lăng na nao rim hrơi. Biă mă ñu, đing nao djru pơtô lăi mơnuih ƀôn sang, djop sang anŏ hơmâo hmua đang giăm glai brơi pơgang anăm čuh jơnah, jah glai, kơsing mă lŏn glai hŭi apui ƀong glai”.

Khul pô pơgang glai ƀơi gah Kơdư hang ia Nueng (Biển Hồ), hlăk wai pơgang 9000 ha lŏn glai pơgang plơi pla, glai prong rơhaih truh pơ tơring glông Čư̆ Pah, Ia Grai, Đak Đoa hăng plơi Plei Ku. Amăng bơyan phang pơđiă kơtang, abih bang tơhan ngă bruă pơgang glai rưng, ƀing gơgrong ba bruă jao wai lăng, hơmâo iâu pơtum mă bruă tơpă hơnơ̆ng, dŏ wai ƀơi anih juăt hơmâo tơlơi truh, hŭi apui ƀong glai. Ơi Nguyễn Tất Thành, Khua khul tơhan wai lăng glai pơgang plơi gah kơdư hang ia Nueng lăi pơthâo tơlơi pơhing:

“Mơ̆ng akŏ bơyan phang mơtam, anom bruă  gơmơi hơmâo brơi čuk glông, jơlan pơgăn apui ƀong rôk ter guai pơgang glai, čuh hĭ rơ̆k krô hlâo laih anun jơnum lăi pơthâo abih bang ƀing tơhan, sang anŏ ngă bruă pơgang glai kyâo pla hăng kyâo hơnơ̆ng hnăi mơ̆ng hơđăp, wơ̆t ƀing tơhan djop sang bruă kơnuk kơna jao hăng sang anŏ mơnuih ƀôn sang tŭ mă bruă pơgang glai rưng, brơi pơblih nao rai hyu ĕp hyu tir amăng glai tơdah ƀuh hlong pơsir mơtam 4 mơta bruă ječ ameč”.

Đơ đam tơring čar Gia Lai hơmâo 286 kual glai phun hŭi biă mă apui ƀong, hơnơ̆ng pơkă mrô V, hăng abih bang đơ đam rơbêh 124.000 ha, lu kơ glai kyâo pla, kyâo hơnơ̆ng hnăi hơđăp, hla luh lu, kơpal laih anun glai rưng đang kyâo čik răng. Ơi Trương Văn Nam, anom bruă tơhan pơgang glai rưng tơring čar Gia Lai brơi thâo:

“Anom bruă tơhan pơgang glai rưng ngă hrŏm kông an tơring čar dăp hơdră hyu ĕp, pơtrut pơsur ƀơi 17 boh tơring glông, plơi prong pơpha bruă mă pơhlôm pơgang glai klô, pơhlôm hăng pơčruih apui sit hơmâo tơlơi truh, hơdră pơhlôm hlâo lĕ čuh hĭ hla krô ter guai jĕ giăm amăng glai, ngă glông pơgăn apui ƀong rôk hyu, kiăng pơgăn hĭ apui ƀong tơdah hơmâo tơlơi ječ ameč.