Tui hăng tơlơi lăi pơthâo ƀơi mông jơnum, blan 4 laih rơgao, tơlơi bơwih ƀong huă ăt đĭ, hơnơ̆ng pơkă kơ tơlơi bơwih ƀong huă amăng đơ đam dêh čar hơđong, rơnoh prăk truh nua dưi pơgăn, ngă bơkơnar bruă pơplai prăk kăk, rơnoh jŭ yap ăt klă hloh kơ blan hlâo laih anun pơkă hăng tal anai thun hlâo. Bruă tuh tia pơkra ming hăng măi mok đĭ tui 9%; rơnoh sĭ mơdrô gơnam hlai hăng rơnoh pơhrui glăi bruă bơwih bơwang sĭ mơdrô đĭ tui rơbêh 10%....

Ƀơi mông jơnum, Khua dêh čar ơi Phạm Minh Chính lăi pơtong, hăng pran jua h’ĭn kơjăp, kiăo tui bruă pơtrun, pơblih hmar hơdră mă bruă, thâo pơčeh phrâo amăng tơlơi git gai, pơčrâo bruă, pơpha anăp ngă bruă kiăng khom dưi ngă djop tơhnal pơkă pơprong, bruă mă yom hloh, anun lĕ pơtrut rơnoh pơđĭ kyar, pơgăn prăk rơngiă nua, kiăng hơđong tơlơi bơwih ƀong huă, pơhlôm brơi tơlơi hơdip mơda mơnuih mơnam dêh čar.....Kơ bruă ngă pơ anăp, lu hơdră phun khom pok pơhai kơñ pơgi, Khua dêh čar rơkâo khom prăp lui tong ten, bơwih brơi klă jơnum lok 9 khua mua pơ ala mơnuih ƀôn sang dêh čar. Khua dêh čar ăt rơkâo ngă pơgiong tơlơi pơtrun bruă mă, kiăng ngă hơbôt hloh, dăp glăi sang bruă kơnuk kơna, pơblih phrâo hơdră ngă hră pơar, pơblih yua mrô. Ñu pơtrun hiăp djop ding jum, anom bruă, djop tơring čar, ƀôn prong amăng thun 2025 anai pơhrŏ boh ƀiă ñu 30% hrơi blan pơsir hră pơar mơnuih ƀôn sang; lui hĭ boh ƀiă 30% rơnoh pơkă kơ tơlơi sĭ mơdrô....