Hơdôm hrơi akô̆ blan 6 anai, mrô tuai nao pơ̆ Đà Lạt, tơring čar Lâm Đồng đĭ lu.  Ƀơi hơdôm ară jơlan amăng plơi prong kah hăng Trần Phú, ƀudah jum dar kual dơnao ia Xuân Hương... truh kơ hơdôm blah blok đang kơtuai plơi prong pơ̆ Lạc Dương, Tà Nùng, leng kơ hmâo lu tuai hyu čuă ngui. Ayong Nguyễn Khắc Hoàng Lâm, mơnuih ƀôn sang dô̆ hơdip mơda sui thun ƀơi phường 4, lăi pơthâo:

“Amăng bơyan pơdơi prong, plơi prong anai hmâo lu mơnuih mơ-ak hloh. Mơnuih ƀôn sang plơi prong Đà Lạt ƀing gơmơi amra čơkă tuai hăng tơlơi pĕ klao, bôh troh hơdjă hăng hơdôm tơlơi ruai kơ plơi prong čư̆ siăng. Drơi pô kâo ăt hor mơn pơbưp, ră ruai hăng tuai mơ̆ng rai mơ̆ng anih ataih, lăi pơthâo brơi kơ gơñu hơdôm anih anom dô̆ ƀiă mơnuih thâo hăng kual tuai čuă ngui phrâo ƀơi plơi prong pô”.

Tơdơi kơ tal pơplông mut anih 10, lu ñu čơđai sang hră hmâo rơgao laih tơlơi bơngot kơ pơplông, Đà Lạt jai čơkă lu sang anô̆, lu hloh lĕ tuai rai mơ̆ng Hà Nội, Hồ Chí Minh, Vũng Tàu hăng hơdôm bôh tơring čar kual Yŭ dêh čar. Amai Thùy Dương, tuai mơ̆ng ƀôn prong Hồ Chí Minh, brơi thâo:

“Tal rai čuă anai, ƀing gơmơi ruah anih dô̆ glăi ƀơi sa kual pơdơi pơdă kơtuai dơnao ia Tuyền Lâm, anih hmâo anih anom hiam klă, hơđong hăng ngă pơhưč pran jua. Biă ñu, gơnam ƀong ƀơi Đà Lạt ngă ƀing gơmơi lăp djă pioh biă anô̆ jơman, phara mơ̆ng ñu. Hrom hăng anun, anô̆ klă bruă bơwih brơi thâo hrŏm hăng nua ñu lăp djơ̆ jai ngă kơ tal pơdơi jing pơhlôm hăng lăp hơdor pioh biă".

Tơlơi ngă pơhưč pran jua mơ̆ng tuai čuă ngui Đà lạt dô̆ dưi pơđĭ tơhnal kơnang kơ tơlơi gir run mơ̆ng hơdôm bôh anom bơwih ƀong ƀơi anai amăng bruă ngă phrâo hăng ngă klă bruă lông lăng. Amai Bùi Lê Giáng Tiên, wai lăng git gai Đà Lạt Edensee Lake Resort $ Spa brơi thâo”.

“Ƀing gơmơi hmâo pok pơhai lu anung prăk bơwih brơi pơkĕ hrŏm pơdơi pơdă hăng hơdôm anô̆ tŭ yua nao hrŏm kah hăng spa, gơnam ƀong huă ƀơi anih nao ƀudah tour čuă ngui ƀiă hrơi ƀơi Đà Lạt. Rơngiao kơ pơdơi pơdă tuai dô̆ dưi lông lăng abih bang hơdôm bruă bơwih brơi mơ̆ng tơring čar Lâm Đồng hăng rơnoh nua lăp djơ̆”.

Bơ̆ ơi Đinh Văn Dôn, Khua Sang bruă bơwih ƀong mơnuih ƀôn sang tuai čuă ngui Happy Day lĕ lăi pơthâo:

“Ƀing gơmơi glăk pok pơhai lu anung prăk kơ tuai čuă ngui pioh kơ tuai, anăp nao lông lăng bruă đang hmua mă yua măi mok yôm, yua kơ ră anai tuai čuă ngui đing nao biă hơdôm gơnam tam mă mơ̆ng đang hmua, biă ñu lĕ kơphê, pơdơi pơdă, massage hăng hơdôm bruă bơwih brơi kơ tuai phara ha jăn”.

Hăng ayuh hyiăng rơ-ơ̆, anih anom glai klô hiam, bruă bơwih brơi kơ tuai klă, plơi prong Đà Lạt, tơring čar Lâm Đồng ƀu kơnong kơ ngă pơhưč tuai čuă ngui amăng lŏn ia ta ôh mơ̆, ñu dô̆ jing anih anom nao ngă pơhưč pran jua mơ̆ng tuai jar kơmar. Akô̆ bơyan pơdơi prong anai, Đà Lạt hmâo pơphun jơlan hơdră pơbưp ƀô̆ mơta, bơkơtuai “Tô nao rai bôh thâo đưm, Gum hrŏm tuai čuă ngui kơplah wah Lâm Đồng hăng Bơnah gum hrŏm Hàn Quốc”. Ơi Nguyễn Tiến Hải, Kơ-iăng Khua Gơnong bruă bôh thâo, bơkơjăp drơi jăn hăng tuai čuă ngui tơring čar Lâm Đồng brơi thâo, anih anom ngă pơhưč tuai dêh čar Hàn Quốc rai pơ̆ Lâm Đồng dô̆ prong biă pioh ngă tui tơhnal hmâo ba tơbiă:

“Đà Lạt – Lâm Đồng hmâo ayuh hyiăng rơ-ơ̆, hmâo lu djuai čuă ngui, pơdơi pơdă, bôh thâo đưm hơđăp ƀơi anai hăng lu tơlơi bơkơjăp drơi jăn tuai čuă ngui kah hăng golf, anih anom kơdư dơnung kơ tuai Hàn Quốc rai čuă lăng, pơdơi pơdă”.

Bơ̆ ơi Trần Hải Linh, Khua Khul mơnuih bơwih ƀong hăng tuh pơplai Việt Nam – Hàn Quốc (VKBIA) lăi lĕ, bruă tô nao rai bôh thâo đưm hăng gum hrŏm tuai čuă ngui kơplah wah Lâm Đồng hăng hơdôm bơnah gum hrŏm Hàn Quốc ƀu kơnong kơ hmâo bôh tŭ yua bơwih ƀong ôh mơ̆, ñu dô̆ djru hruă kơjăp pran jua giăng mah, tơlơi jê̆ giăm sui thun kơplah wah mơnuih ƀôn sang dua bôh dêh čar.

“Pơ̆ anăp anai, Lâm Đồng amra pơmut hrŏm 3 bôh tơring čar, amra lăi anai lĕ sa amăng hơdôm yak nao djru Lâm Đồng gum hrŏm hăng pơđĭ kyar phrâo hăng hơdôm bơnah Hàn Quốc. Biă ñu lĕ amăng bruă anih anom čuă ngui hăng sĭ mơdrô gơnam tam. Hrơi anai mơtăm, hmâo 35 bôh anom bơwih ƀong mă bruă gah tuai čuă ngui hăng tuai čuă ngui dưi hmâo ƀing gơmơi ba mut jơlan hơdră bơkơtuai, bôh than lĕ ngă hiưm hơpă pioh pok pơhai hơdôm bruă tuai čuă ngui ƀơi Lâm Đồng pơđĭ kyar kơtang hloh dong”.

Tal anai, khua pơ ala kơ hơdôm bôh anom Hàn Quốc hăng Việt Nam hmâo kĭ pơkôl hră pơ-ar čih hơdor pioh bruă gum hrŏm, pok tơbiă tơhnal gal tuh pơplai amăng hơdôm bruă kah hăng tuai čuă ngui pơdơi pơdă, bruă đang hmua hơdjă, măi mom pơkra gơnam hơdjă hăng logistics tuai čuă ngui... Hơdôm bôh anom bơwih ƀong Hàn Quốc čang rơmang amra dưi djru đut hlah kơ hơdră bruă, anom mă yua, mơnuih mă bruă hăng anih anom tuh pơplai lăp klă. VKBIA pơkôl jing pô tô nao rai, gum hrŏm pơphun pơtrut bruă sĭ mơdrô, bôh thâo đưm hăng tuai čuă ngui rim tal, ngă brơi Lâm Đồng jing anih anom phun tô nao rai Việt Nam hăng Hàn Quốc./.