Ƀơi tơring čar Dak Lak, hră pơhing phrâo hơmâo akŏ pơjing bruă mă amăng  hơdôm thun 30 rơnuk thun hlâo kơ anai laih. Amăng sang mơnă Ƀuôn Ma Thuột hơmâo lu hră pơhing čih hyu pơpha djă čih dua tơlơi “Yuăn-Êđê”, “Klei čơwăk” anuh tơkai hăng pơsơi, tơlơi čih anun yua mơ̆ng ƀing ơi Phan Đăng Lưu, Hồ Tùng Mậu pô čih ngă atur hlâo hăng čih tơlơi pơhing pôr pơthâo hăng boh hră čih tơngan 4 pok hla bơnah anet, đơr hăng plă tơngan đôč kiăng amuñ pơpha hyu tơdruă djă pioh ngă hơgŏm hŭi ƀing ayăt ƀuh, mơ̆ng anun hơmâo pơtô pơhrăm tơlơi pơmin khin hơtai ngă hơkrŭ kơ ƀing mơnă pơkơdong glăi ayăt.

Lơ 1/5/1975, Gong phun Pơtui jua pơhiăp Dak Lak ră anai Gong phun pơdah rup hăng pơtui jua pơhiăp Dak Lak pơphun pơyong jua pơhiăp blung a. Lơ 15/1/1976, Sang bruă čih tơlơi pơhing Dak Lak dưi akŏ pơdong, in tơglit hră pơhing blung pơtruh brơi kơ mơnuih ƀôn sang pơđok amăng bơyan ngă yang thun phrâo Têt Bính Thìn. Hrŏm hăng anŏ pơđĭ kyar amăng dêh čar, hră pơhing phrâo Dak Lak hơmâo lu yak rơbat đĭ tui tong ten hăng kơjăp. Tơ tă anai hơmâo 54 sang bruă hră pơhing hlăk dŏ mă bruă amăng tơring čar.

 Ƀơi mông jơnum, ƀing khua mua hơmâo pơčrong sai kơ tơlơi lông lăng amăng rơnuk phrâo, rơkaoa đĭ lu hơdră dăp bruă kơ mơnuih apăn bruă čih tơlơi pơhing kiăng lăp djơ̆ hăng rơnuk anai. Tui hăng mơnuih čih tơlơi pơhing phrâo Đàm Thị Thuần, Kơ-iăng khua sang bruă Hră pơhing phrâo Dak Lak, tơlơi či kiăng hmar ră anai tơlơi pơhing pơmut amăng mrô, pơblih yua mrô kiăng ƀing čih tơlơi pơhing hơmâo pran jua tơpă, mă bruă djơ̆ hơnơ̆ng:

 “Ră anai AI hơmâo lu tơlơi pơčeh phrâo ia rơgơi ană mơnuih, djru amăng bruă mă gêh găl biă mă, hơmâo črăn ia rơgơi amăng komputer, internet djru kơ ƀing čih tơlơi pơhing lu mơta, rơngiao kơ bruă hyu mă tơlơi pơhing sit nik, ƀing ta dưi mă yua lu hơdră ia rơgơi djru kơ bruă mă, yua boh thâo ia rơgơi ană mơnuih pơjing AI pơhing brơi. Hrŏm hăng tơlơi kiăng, anŏ ta ƀuh, lăng nao pơ anăp, biă mă ñu pran jua mơnuih čih tơlơi pơhing kơđi čar, pran jua tơpă pôr tơlơi pơhing. Mă yua ia rơgơi tơlơi pơhing mơnuih mơnam facebook jing sa anŏ djru ĕp tơlơi pơhing, pôr tơlơi pơhing”.

Ƀing khua mua nao jơnum ăt tŭ ư hrŏm, hăng tơring čar Dak Lak anih mă bruă phara, bruă pôr tơlơi pơhing tơpă, tong ten, hmao kru, ječ ameč kiăng mơnuih ƀôn sang thâo, boh nik ñu mơnuih ƀôn sang amăng kual ataih, kual mơnuih djuai ƀiă dŏ, ƀu kơnong bruă mă yom glăm ba prong amăng bruă kơđi čar đôč ôh, dŏ jing anŏ pơkă pran jua hiam mơ̆ng mơnuih čih tơlơi pơhing. Hră pơhing phrâo hơkrŭ  lĕ gơgrong ba ngă anŏ pơtruh brơi plah wah Ping gah, kơnuk kơna hăng mơnuih ƀôn sang, kiăng pơđĭ tui  tơlơi gơgrong amăng bruă mă, ba tơlơi pơhing kơ mơnuih ƀôn sang, ngă ƀiă hloh tơlơi pleh ploh boh thâo ia rơgơi tơlơi pơhing hăng pơđĭ tui tơlơi thâo kơ mơnuih ƀôn sang, djă kơjăp khul gum pơgôp djuai ania.

 Ơi Trần Hồng Tiến, Khua Gơnong bruă Gru grua, Pơrơguăt drơi jăn hăng Tuai čuă ngui Dak Lak brơi thâo, hơdôm boh tơhnal kah pơpha amăng mông jơnum amra djru hrŏm amăng bruă akŏ pơdong bruă mă, mơnuih čih tơlơi pơhing phrâo dưi ngă djơ̆ bruă mă amăng rơnuk phrâo.

  “Hơdôm tơlơi pơgôp hiăp djơ̆ lăp, jĕ giăm hăng bruă mă amăng tơring čar. Djop sang bruă wai lăng mơ̆ng kơnuk kơna, djop gưl anom bruă laih pơđing hmư̆ tơlơi rơkâo, pơdah thâo anun lĕ anăp či ngă bruă, tui jơlan hơdră pơtrun, lăi pơthâo kiăng pơjing pran kơtang djru djop sang bruă hră pơhing phrâo, khul mơnuih mă bruă čih tơlơi pơhing mă bruă klă hloh, bơwih brơi bruă kơđi čar amăng tơring čar.