Tlam lơ 23/7, amăng tal nao čuă dêh čar Senegal, ơi Trần Thanh Mẫn, Khua git gai pơ ala mơnuih ƀôn sang dêh čar Việt Nam hăng Khua pơ ala mơnuih ƀôn sang dêh čar Senegal, El Malick Ndiaye hrŏm hơbit nao pơhmư̆ amăng mông jơnum kơ jơlan hơdră pơtrut ngă hrŏm dua bơnah. Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, Việt Nam hơmâo lu tơlơi gêh găl dưi ngă hrŏm hăng Senegal kah hăng; Bruă ngă hmua, sang dăng kông, atur ia rơgơi mrô, ĕp kông ngăn gŭ lŏn, rông akan hơdang, man pơdong hăng čuk jơlan glông.

Khua git gai pơ ala mơnuih ƀôn sang dêh čar ơi Trần Thanh Mẫn pơdah pran jua đăo kơnang djop ding jum, anom bruă, sang bruă mơdrô dua bơnah dêh čar Việt Nam hăng Senegal amra gir run hloh pơtrut bruă ngă giăng mah dua bơnah ƀrư̆ hrơi prong tui, tŭ yua hloh.

Ñu rơkâo dua bơnah kơtưn hloh bruă hơdai gum hrŏm djru ba sang bruă mơdrô Việt Nam tuh pơ alin ƀơi dêh čar Senegal, laih dơ̆ng čang rơmang khua pơ ala mơnuih ƀôn sang dêh čar Senegal ngă gêh găl brơi bruă tuh pơ alin sĭ mơdrô. Khua mua pơ ala mơnuih ƀôn sang dêh čar Việt Nam ăt kar kăi mơ̆n, amra djru anom bruă mơdrô dêh čar Senegal tuh pơ alin ƀơi Việt Nam amăng bruă mă tui hăng anŏ gêh găl.