Tui anom bruă wai lăng akŏ bruă tuh pơ alin man pơkra tơring čar Đồng Nai, ară jơlan črăn 1 jơlan rơdêh đuăi hmar Biên Hòa-Vũng Tàu rơwang tal 1 glông 16 km. Abih tih prăk tuh pơ alin rơbêh 6.012 klai prăk mơng ngăn drăp Kơnuk kơna. Truh ră anai, bruă čuk pơkra črăn tal 1 giăm rơbêh 46%. Akŏ bruă hơmâo pok pơhai mơng thun 2022, him lăng pơgiong amăng thun 2025, ba nao mă yua ha amăng plĕ djop ară jơlan amăng thun 2026.

Truh ră anai, bruă pơhrui glăi lŏn mơnai hơmâo pơgiong, amăng anih man pơkra hơmâo 35 anih man pơkra, ba nao rơbêh 400 boh rơdêh, măi mok hăng 440 čô kông ñơn. Amăng mông pel ĕp, ơi Hồ Đức Phớc lăi pơtong, hơdôm anom bruă bơdjơ̆ nao, anom bruă man pơkra ba nao măi mok, mơnuih mă bruă kiăng pơtrut tañ, gir ngă lơm ayuh hyiăng gêh gal kiăng čuk pơkra tañ hloh, pơhlôm ară jơlan pơgiong tui tơlơi ƀuăn hlâo lơ 19/12/2025.