Yak nao rơwang thun 2025-2030, Ping gah Jơnum min mơnuih ƀôn sang tơring čar Dak Lak ba tơbiă hơnong pơkă pơđĭ kyar đơ đam tơring čar mơng 11,5% ha thun pơ glông; pơhrui rĭm akŏ mơnuih dưm dưm 160 klăk ha thun; rơnoh pơhrui mơng sĭ mơdrô gơnam pơ tač rơngiao rơbêh 13 klai đôlar mi; pơhưč 43 klăk čô tuai čuă ngui hăng pơhrui giăm 97.150 klai prăk; pơhrŏ mrô sang anŏ ƀun rin 2% ha thun, kơnong kual mơnuih djuai ania ƀiă hrŏ trun 3% ha thun.

Akŏ phun amăng pơđĭ kyar lĕ “pă bơnah phun” hơmâo tuh tia pơkra ming, ngă hmua yua boh thâo phrâo, tuai čuă ngui hăng tơlơi bơwih ƀong huă ter hang ia rơsĭ; pơlir hăng pơplih kơtang tuh pơ alin, pơtrut yua boh thâo phrâo, pơplih pơčeh phrâo, pơplih mrô hăng pơđĭ kyar mơnuih mă bruă rơgơi. Đĭ pơhiăp git gai mông jơnum, Khua git gai Ping gah tơring čar Dak Lak ơi Nguyễn Đình Trung lăi pơtong, jơnum tal anai ƀu djơ̆ kơnong lăng glăi boh thao dưi ngă rơwang laih rơgao đôč ôh mơ̆ ăt ba glăi atur brơi rơwang pơđĭ kyar phrâo, pơsit tong tơlơi gơgrong čung ba mơng Ping gah Jơnum min mơnuih ƀôn sang tơring čar amăng jơlan ngă tui pran hrưn đĭ pơdrong asah mơng Dak Lak.