Ayong Y Doăn Niê, dŏ ƀơi ƀuôn Alê A, phường Buôn Ma Thuột, ră ruai kơ bruă dưm pơmut VNeID ƀơi telephôn ñu hơmâo ngă sui mơ̆ng anai 2 thun laih, hơmâo dưm pơmut phrâo jing mrô 2 laih. phrâo anai, tơdơi kơ phường hơmâo pơmut hrŏm, Jơlan hơdră “Pơtô ba abih bang mơnuih hrăm boh thâo mrô” hơmâo ngă amăng plơi pla, ñu hơmâo arăng pơtô brơi bruă ngă hră ƀơi telephôn laih anun ñu ngă brơi hră nao rai pơ čar rơngiao kơ ană đah rơkơi ñu ƀiă či nao mă bruă pơ Hàn Quốc amăng rơnuč thun anai:“Prăp lui djŏp mơta hră pơ-ar, ta ngă tui hăng tơlơi ƀing apăn bruă pơtô ba, blung hlâo lĕ ĕp mut amăng Glông bơwih brơi ngă hră pơ-ar mơ̆ng Ding jum kông an, giong anun mut amăng tài khoản pơ glông bơwih brơi dêh čar, laih anun čih anăn ta amăng tài khoản anun. Tơdơi kơ anun, mut amăng glông ngă hră nao rai pơ čar rơngiao arăng lăi hộ chiếu, kâo čih djŏp anăn păn, thun tơkeng, anih dŏ mơ̆ng ană kâo, giong anun mơit nao. Tơdơi kơ čih djŏp baih, ta ruah tla prăk hăng tài khoản, laih anun kiăng arăng mơ-it glăi hră hộ chiếu pơ sang. Tla prăk giong lĕ ta tơguan 15 hrơi lĕ hơmâo yơh”.

Tơdơi kơ 3 wơ̆t hrơi tơjuh pơphun ngă, jơlan hơdră Pơtô ba abih bang hrăm boh thâo mrô glăk pok prong klă biă ƀơi Dak Lăk. Ƀơi lu boh să, hơmâo akŏ pơdong Grup boh thâo ia rơgơi mrô plơi pla, hăng mơnuih ngă bruă ƀơi anih ngă pô ba jơlan, dưi nao pơtô brơi rim čô mơnuih mơtăm. Ơi Y Păm Byă, Khua grup boh thâo mrô ƀôn H’ra Ea H’ning, să Dray Bhăng, tơring čar Dak Lăk brơi thâo, tơdơi kơ hơmâo hrăm, ñu thâo rơđah hăng dưi pơtô glăi ană plơi dong kơ bruă ngă hră pơ-ar kah hăng hră yua lŏn, hră hộ tịch (čih pioh anăn, thun tơkeng, thun djai,..kơ sa čô mơnuih), ia jrao, hră pơhlôm nua mơnuih mơnam: "Kâo glăi pơ plơi amra jak iâu 430 boh sang anŏ amăng plơi nao pơ Sang jơnum plơi či “djă tơngan črâo bruă”, pơtô gơñu thâo ngă hră pơ-ar. Gơñu amra pơtô glăi kơ sang anŏ gơñu dong. Mơ̆ng anun, jai hrơi hơmâo lu neh wa thâo ngă hră pơ-ar tui glông internet, ngă mơ̆ng phần mềm VNeID”.

Tơring čar Dak Lăk pơsit boh thâo mrô jing phun atur či akŏ pơdong gong gai ngă bruă hơbôt, tŭ yua. Sit hnun yơh, boh thâo mrô glăk hơmâo ngă ječ ameč ƀơi abih bang să. Mơta pơkŏn dong, jơlan hơdră “Pơtô ba abih bang hrăm boh thâo mrô” hơmâo pơtrut ngă kơtang, kiăng pơđĭ tui tơlơi thâo mơ̆ng ană plơi amăng bruă mă yua boh thâo ia rơgơi.

Ơi Nghiêm Văn Chuẩn - Khua ping gah să Dray Bhăng (tơring čar Dak Lăk) brơi thâo, să hơmâo akŏ pơdong 24 grup boh thâo mrô, ƀơi 24 boh plơi. Tơlơi kiăng ba glăi lĕ amăng blan 8 anai, ƀơi rơbêh 9.700 boh sang anŏ mơ̆ng să, rim boh sang hơmâo aset biă ñu 1 čô mơnuih thâo yua VNeID, hăng hră amăng glông VNeID anai. Truh abih thun 2025, dưi ngă mơ̆ng ataih djŏp mơta hră pơ-ar:“Grup boh thâo mrô hơmâo ƀing gơmơi pơtô brơi tong ten laih, dưi nao pơtô brơi rim boh sang anŏ thâo mă yua, thâo mut ĕp ngă hră pơ-ar amăng telephôn. Čang rơmang mơ̆ng ƀing gơmơi lĕ rim čô mơnuih amăng sang truh pơ abih thun 2025 amra hơmâo rơbêh 90% sang anŏ thâo ngă hră pơ-ar mơ̆ng ataih tui plang internet”.

Mah hơmâo pơphun ngă phrâo đôč, jơlan hơdră “Pơtô ba abih bang hrăm boh thâo mrô” hơmâo pơsir hĭ laih “anŏ dŏ kơƀah amăng boh thâo mrô” ƀơi djŏp plơi pla Dak Lăk. Tơlơi thâo mă yua boh thâo mrô mơ̆ng ană plơi đĭ tui, ƀu kơnong djru neh met wa dưi mă yua tañ glông bơwih brơi ngă hră pơ-ar mơ̆ng ataih đôč ôh, ăt jing phun atur kiăng gong gai akŏ pơdong anom bruă hơbôt, tŭ yua. Tơlơi gum hrŏm, gir run “djă tơngan črâo bruă” mơ̆ng hơdôm grup boh thâo mrô amăng plơi pla ăt pok rai tơlơi pơplih phrâo amra hơmâo tơlơi pơtruh mrô kjăp phik kơplah wah boh thâo ia rơgơi, gong gai hăng mơnuih ƀôn sang./.