Sa amăng hơdôm phun tơhnal ngă kơ bruă brơi prăk ƀơi tơring čar Gia Lai aset biă djơh anun lĕ, yua lu bruă akŏ phun glăk ngă kaih. Amăng anun, hơmâo Sang hră kơnuk kơna čem rông pơƀut dua gưl ƀơi 7 boh să pơ guai, Bruă man pơkra jơlan rơdêh por plĕ trun mrô 2 ƀơi Tơdron rơdêh por Phù Cát hăng Bruă pơkra ming Tháp Chăm Dương Long. Lăp đing nao, jơlan rơdêh đuăi hmar Quy Nhơn - Pleiku, hơmâo prăk či ngă bruă lu hloh, pơsit jing sa amăng hơdôm tơlơi pơtrut đĭ kyar yom phun mơ̆ng tơring, ăt aka ƀu dưi mă yua lŏn či čuk pơkra ôh ƀơi lu glông jơlan găn nao đang glai. Ơi Nguyễn Tự Công Hoàng, Kơ-iăng khua Jơnum min mơnuih ƀôn sang tơring čar Gia Lai, gơgrong bruă tuh pơ alin man pơdong, brơi thâo: “Anŏ tơnap prong biă mơtăm lĕ Gơnong bruă hmua hăng ayuh hyiăng khŏm pơsir đut hlao bruă lŏn glai. Bruă anai kiah 8 blan anai laih Khul wai lăng glai pơgang ayuh hyiăng ƀu dưi ngă ôh, rim wơ̆t jơnum ăt lăi nao lăi rai mơn. Bơ črăn dua (Kơčăo bruă jơlan rơdêh đuăi hmar Quy Nhơn - Pleiku) tơnap yua bơdjơ̆ nao đang glai”.

Ƀu kơnong ngă hră pơ-ar tơnap, lŏn pioh čuk pơkra đôč ôh, bruă brơi nao prăk či ngă bruă ƀơi Gia Lai ăt bơbeč yua anŏ soh glăi lơ̆m ngă bruă. Jơnum min mơnuih ƀôn sang tơring čar Gia Lai pơtŏng glăi, ƀơi lu anih wai lăng ăt ngă bruă yua kơ arăng pơđar đôč, ngă bruă ƀu pơthâo mơneč mă ôh, bĕ hĭ anŏ tơnap, pô anai jao kơ pô adih. Lơ̆m hră pơ-ar hơmâo anŏ ƀu găl, lăi biă gơ̆ ta ĕp hơdră pơsir brơi, samơ̆ gơñu ba glăi hră pơ-ar, anun yơh bruă pơkra hră jing kaih hloh.

Khua jơnum min mơnuih ƀôn sang tơring čar Gia Lai ơi Phạm Anh Tuấn kiăng hơdôm anom bruă, pơplih glăi tơlơi pơkă ngă bruă, hơmâo anŏ jăm ƀuah, bơtơhmal kơtang ƀiă; ngă bruă khŏm klă, thâo gơgrong, ngă djơ̆ tơlơi pơtrun “6 rơđah”. Ơi Phạm Anh Tuấn brơi thâo, Jơnum min mơnuih ƀôn sang tơring čar Gia Lai hơmâo laih hơdră ngă bruă, kiăng hơdôm anom bruă, tơring tơrang khŏm ngă klă đah mơ̆ng dưi mă prăk tuh pơ alin abih tih 100% mơtăm amăng rơnuč thun: “Amăng 30 hơnong pơkă mơ̆ng hơdôm jơlan hơdră dêh čar pơtrun kiăng ngă, khua mua djŏp anom bruă khŏm git gai ngă djơ̆. Khŏm ngă hiưm pă kiăng prăk hơmâo prăp lui laih, tơring čar mă yua ƀudah să mă yua khŏm mă yua abih. Amăng anun, khŏm brơi nao tañ či man pơkra jơlan rơdêh đuăi hmar Quy Nhơn - Pleiku, hăng sang hră pơ guai dêh čar. Kơ bruă brơi prăk tuh pơ alin ring bruă kơnuk kơna jao, kâo kiăng pơƀut pơhlom hơmâo 100% mơtăm”.