Ƀơi mông jơnum bưp nao rai hăng hlăk ai thun 2026 phrâo anai, Khua Jơnum min mơnuih ƀôn sang tơring čar Gia Lai ơi Phạm Anh Tuấn pioh lu tơlơi đing nao hơdôm tơlơi rơkâo đĭ tum teč hăng pơphun bruă mă, pơblih pơčeh phrâo amăng bruă mă. Hlăk ai rơkâo iâu pơmut mơnuih thâo amăng bruă ba yua ia rơgơi tơlơi pơhing, pơsir bruă mă, djru pơphun bruă mă, pơđĭ kyar bruă tuai hyu ngui hăng ba yua boh thâo ia rơgơi mrô amăng bruă ngă hmua pla pơjing. Lăp đing nao, kah hăng amai Trần Thị Bé, Khua kông ty sa ding kơna Trần Lâm Gia Phát, rơkâo ba yau sang bruă kơnuk kơna rơbêh tơdơi kơ pơmut glăi, pioh ngă anih rah anah phun pla ƀơi lan sang anun, pơblih pơčeh phrâo bruă mă.

“Rơkâo kơ tơring čar dăp  hơdră ngă đang rah anah phun pla pơblih pơčeh phrâo. Ră anai, ƀơi djop sang bruă gong gai kơnuk kơna dŏ lu rơbêh tơdơi kơ pơmut glăi, lơ̆m anun, sang bruă kiăng hơmâo anih rah anah khom hyu apah anih či dưm, lan sang či rah anah. Kâo čang rơmang dưi tŭ mă anih anom hrup anun, kiăng pok anih rah anah phun pla, yom hloh dơ̆ng hơmâo tơlơi djru tơdơi kơ pơphun bruă mă pioh djru kơ hơdôm hlăk ai dưi găn rơgao črăn tơlơi tơnap tap ră anai”.

Mơ̆ng tơlơi rơkâo djơh hăng anun, Khua Jơnum min mơnuih ƀôn sang tơring čar ơi Phạm Anh Tuấn lăi pơtong, gong gai kơnuk kơna amra ngă brơi anŏ gêh găl kiăng hlăk ai pơdah thâo tơlơi pơmin pơčeh phrâo.

-Đoan đọc : “Kâo dŏ pơ anai, amra hơmâo pioh kơ hlăk ai lăi pơthâo yơh tơlơi či kiăng. Gơmơi amra iâu djơ̆ sang bruă arăng či kiăng. Arăng ƀuh djơ̆ lĕ, arăng amra djru mơtam. Ƀing gơmơi ăt amra hơmâo hơdră djru hrŏm kơ sang bruă mơdrô anun pioh djru ba ƀing gih. Ră anai, sang bruă mơdrô pơpă ăt hai lêng kơ hơmâo rơnoh prăk pioh kơ tơlơi kơsem min pơčeh phrâo laih. Ƀing gih khom lăi pơthâo bruă mă, tơlơi kiăng bơwih brơi kơ lŏn ia, plơi  pla, kiăng pơyơr pran jua hăng brua glăm ba”.

Hăng pran jua nao hrŏm mơ̆ng gong gai kơnuk kơn, ăt ƀuh rơđah črăn hơdră “Mơnuih ƀôn sang-sang bruă mơdrô tơña-khua mua gong gai tơring čar Gia Lai lăi glăi”, pơphun mơ̆ng blan 8/2026, yua anom bruă jơnum min mơnuih ƀôn sang tơring čar ngă hrŏm Gong phun jua pơhiăp hăng pơdah rup tơring čar Gia Lai pô ngă. Tui hăng anun, mơnuih ƀôn sang, sang bruă mơdrô dưi mơ-it nao tơlơi tơña, kơ jơlan hơdră, bruă kiăng, tơlơi či djru tuh pơ alin hăng anŏ gun ngă hră pơar hăng pơsir brơi hră pơar ƀơi tơring čar. Blan 8, boh yom phun lăi nao kơ lŏn mơnai, duh glăi lŏn mơnai, pơklaih ala lŏn hăng pơtrut pơđĭ kyar bơwih ƀong huă amăng mơnuih ƀôn sang ngă khua sang bruă mơdrô. Hơdôm blan tŏ tui dơng, amra pok gah bruă pơsir hră pơar, pơblih yua mrô, bruă ngă hmua ba yua ia rơgơi phrâo, AI, pơsir tơlơi bơwih ƀong huă kơ mơnuih ƀôn sang, bruă ia jrao gun hăng bruă pơtô hrăm. Ơi Lê Dũng Linh, Khua anom bruă ngă hră pơar kơ mơnuih ƀôn sang tơring čar Gia Lai brơi thâo:

“Hơdôm tơlơi tơña djop anŏ gêh găl dưi tŭ mă, jing ƀu djơ̆ amăng tơlơi dưi pơsir tơlơi rơkâo, hră pơtruh brơi, jăm tơlơi aka ƀu djơ̆, abih bang tơlơi tơnap tap, dŏ gun anun mơ̆ng mơnuih ƀôn sang, sang bruă mơdrô lêng kơ tŭ mă pioh pơsir. Mơnuih ƀôn sang, sang bruă mơdrô mơ-it rai gơmơi tŭ mă, mơ-it nao kơ sang bruă hơmâo tơlơi dưi khom lăi glăi. Anom bruă, sang bruă anun khom pơsir”.

Ƀơi Gia Lai, pơđing hmư̆ mơnuih ƀôn sang ƀu kơnong kơ bưp nao rai đôč ôh, dŏ ƀuh bruă ngă rơđah rơđong hloh. Mơ̆ng bruă pơsir hră pơar, hơdră ngă hră pơar tơnap tap, gum hrŏm mơnuih ƀôn sang hăng sang bruă mơdrô. Lơ̆m tơlơi pơhiăp sit nik dưi lăi glăi hăng bruă mă, anŏ pleh ploh mơ̆ng gong gai kơnuk kơna hăng mơnuih ƀôn sang ƀơi Gia Lai amra jai hrơi ƀiă hloh, pơjing rai tơlơi đăo kơnang tong ten hăng pran jua pơtrut pơđĭ kyar.