Hơdôm kơčăo bruă anai lu biă mă gah bruă pơkra ming hăng măi, pơjing rai gơnam sĭ mơdrô, anŏ pơčeh phrâo ia rơgơi, gơnam djru pran amăng bruă mă, pơkra ming mơnong ƀong huă, mơnong čem hlô hăng bruă čem rông hlô mơnong. Amăng mrô 25 boh dêh čar, kual lŏn hơmâo kơčăo bruă tuh pơ alin mơ̆ng tač rơngiao ba nao pơ tơring čar Gia Lai lĕ, dêh čar Khač ră anai dong tal 5 rơnoh prăk tuh pơ alin.

Anai dưi lăng kah hăng prăk kăk čan mơ̆ng jar kmar djru hrŏm amăng bruă tuh tia pơkra ming hăng pơđĭ tui rơnoh gơnam sĭ mơdrô mơnong ƀong huă ƀơi Gia Lai. Bruă pơhưč prăk mơ̆ng dêh čar Khač tuh pơ alin ƀu kơnong pơhrua nao prăk kăk kơ bruă pơtrut pơđĭ kyar đôč ôh, dŏ jing anŏ gêh găl pok brơi bruă ba yua boh thâo ia rơgơi, tơlơi thâo amăng bruă mă pơkra pơjing hăng mut hrŏm tong ten hloh amăng bruă ba gơnam sĭ mơdrô. Anai lĕ anŏ găl pioh kơ Gia Lai ăt anăp nao pơhưč lu kơčăo bruă FDI ia rơgơi phrâo, pơđĭ rơnoh sĭ mơdrô, jĕ giăm hiam klă kơ ayuh hyiăng anih dŏ jum dar laih anun pơjing rai pran kơtang brơi anom bruă bơwih ƀong huă ƀơi tơring čar.