Tui hăng akŏ bruă dưm dăp, anih pla jrao akha năng ai 200ha, prăk tuh pơ alin 139 klai, laih anun amra ngă tui rim črăn lăp djơ̆ hăng prăk hơmâo, ăt kah hăng tơlơi hơmâo sit nik. Tui hăng pô tuh pơ alin, bruă anai anăp nao bruă pla hăng pơkra jrao akha klă, yom, mă yua boh thâo phrâo đah mơ̆ng pơkra rai gơnam djơ̆ hăng rơnoh pơkă wơ̆t hăng tơlơi kiăng mơ̆ng anih mơdrô. Ơi Lê Minh Thông, Khua jơnum min mơnuih ƀôn sang să Vĩnh Thạnh brơi thâo, Đan Sâm jing phun jrao yom, mă yua lu biă amăng bruă pơjrao tui hla kyâo jrao akha laih anun dưi đĭ kyar prong hloh: “Bruă anai hơmâo ƀơi să jing pok rai tơlơi gêh găl prong biă amăng bruă pơplih djuai phun pla mơ̆ng ngă hmua tui hơđăp jing ngă hmua mă yua boh thâo măi mok pơkra gơnam hlao, hăng bruă pơkra gơnam ngă hrŏm plah wah anom mơdrô hăng mơnuih ƀôn sang. Mơ̆ng anun ăt djru brơi lu mơnuih hơmâo bruă mă mơn”.

Ơi Lê Quang Hùng, Khua gơnong bruă ia jrao Gia Lai brơi thâo, Tơlơi pơtrun mrô 72 mơ̆ng Ding jum kơđi čar hăng Akŏ bruă mrô 06 mơ̆ng Ping gah tơring čar Gia Lai kơ pơđĭ tui bruă ia jrao rơwang thun 2026-2030 pơsit pla lu phun jrao akha jing sa amăng hơdôm bruă kiăng ngă hlâo. Yua hnun, bruă pok pơhai pla phun jrao akha ƀơi Vĩnh Thạnh lăp djơ̆ hăng jơlan đĭ kyar mơ̆ng Gia Lai laih anun mơ̆ng lŏn ia ta: “Phun Đan Sâm jing phun jrao yom biă, klă biă kơ tơlơi suaih pral. Ră anai ƀơi rŏng lŏn, lu dêh čar hơmâo mă yua laih či pơjrao tơlơi ruă amăng hơtai boh, tơlơi ruă gah ƀing đah kơmơi hrơi. Anai jing kơčăo bruă blung a ƀơi Việt Nam pla phun Đan Sâm prong tui anai. Sit mơnuih ƀôn sang Vĩnh Thạnh ăt tŭ mă tơlơi klă mơ̆ng kual anai mơn”.

Bruă pok pơhai pla hăng pơkra phun jrao akha Đan Sâm ƀơi să Vĩnh Thạnh, tơring čar Gia Lai amra mă yua klă tơlơi gêh găl phun jrao akha mơ̆ng tơring anai. Mơ̆ng anun, pơtrut đĭ kyar, pơsir bruă mă, ƀơ ƀrư̆ pơjing rai rơnoh yom mơ̆ng phun jrao akha hơđong, pơlir hăng đĭ kyar bruă ia jrao hăng ngă hmua ba yua boh thâo phrâo mơ̆ng Gia Lai./.