Nao jơnum hrŏm hrơi bơbưp ƀing apăn bruă bơwih ƀong hăng Khua Jơnum min mơnuih ƀôn sang tơring čar Gia Lai, ăt hơmâo ƀing Kơ-iăng khua Jơnum min mơnuih ƀôn sang tơring čar, khua mua hơdôm gơnong bruă, anom bruă bơdjơ̆ nao. Pơ anai, ơi Rahlan Chung čang rơmang hơbô̆ bruă “Kơphê mơnuih apăn bruă bơwih ƀong” amra jing glông pơtom hiăp ƀơi anăp djru gong gai pơhmư̆ tơlơi pơgôp hiăp, tơlơi lăi glăi mơ̆ng anom bơwih ƀong, mơ̆ng anun tañ pơsir hĭ tơlơi tơnap amăng bruă mă.

Amăng hrơi mông pơbưp mơak, pơ ala kơ hơdôm anom bơwih ƀong hơmâo lăi pơthâo bruă mă mơ̆ng ƀing gơñu, lăi pơthâo hơdôm tơlơi tơnap, tơlơi gun. Khua mua tơring čar hăng hơdôm gơnong bruă bơdjơ̆ nao hơmâo lăi glăi hlao mơtăm. Khua jơnum min mơnuih ƀôn sang tơring čar Gia Lai čang rơmang anom bơwih ƀong gum hrŏm, pơčrâo brơi jơlan ngă bruă phrâo, gum hrŏm akŏ pơjing Gia Lai jing anih ngă pơhưč tuh pơ alin, djru pơtrut bơwih ƀong huă - mơnuih mơnam. tui hăng akŏ bruă, hơbô̆ bruă “Kơphê mơnuih apăn bruă bơwih ƀong” amra hơmâo pơphun ngă na nao hrơi pă rim wơ̆t hrơi tơjuh./.