Tơlơi bral rơngal kơ bruă lŏn tơhroh yua kơthel mrô 13 rơnuč thun 2025 ăt dŏ mơn. Hơdôm rơbâo met khô̆i lŏn pơtâo mơng čư̆ Phương Mai tơhroh trun ngă dor 3 boh sang, ngă sa čô mơnuih djai, 1 čô rơka hăng lu sang anŏ khŏm ba đuăi ječ. Ơi Lê Văn Phụng, mơnuih ƀôn sang ƀut plơi 9, phương Quy Nhơn čang rơmang, ring bruă bư̆ pơga pơgăn hŭi lŏn tơhroh jing anih pơgang brơi kual plơi pla ƀơi anăp kơ ayuh hyiăng amra pơplih sat. “Bruă anai kiăng ngă tañ yua giăm bơyan hơjan kơthel laih. Tơdah ngă ƀu pơgiong, amăng bơyan hơjan anai amra bưp lu tơnap tap. Mơnuih ƀôn sang čang rơmang Kơnuk kơna ngă pơgiong ring bruă anai kiăng mơnuih ƀôn sang hơđong pran jua”.

Tơdơi kơ kah pơpha prăk kak, Jơnum min mơnuih ƀon sang phương Quy Nhơn pok pơhai akŏ bruă man pơkra bơnư̆ pơgăn hŭi lŏn tơhroh ƀơi Hải Minh hăng prăn tuh pơ alin rơbêh 10,2 klai prăk. Ring bruă anai hơmâo pơga pơgăn glông 65 met, glông 4 met, hơmâo glông pơđoh đuăi ia mơng tơkai čư̆ rô nao ia rơsĭ kiăng pơčlah pơpha glông rô trun hăng huăi ngă lŏn tơhroh amăng bơyan hơjan hlim. Ơi Nguyễn Quốc Hùng, pô pơ ala brơi anom bruă man pơkra brơi thâo, kiăng pơhlôm djơ̆ hrơi mông, anom bruă man pơkra hơmâo pơkiăo nao giăm 20 čô kông ñơn hrŏm hăng lu măi mok, pơphun bruă man pơkra na nao. “Gơnam pioh man pơkra ba pơmut mơng bul pơtâo, lơm pơdŭ pơgiăng ba nao pơ anih pơtum pơƀut ăt kiăo tui lu jơlan yua anun anom bruă man pơkra hơmâo pơhrua lu rơdêh pơdŭ pơgiăng amăng tơhrơi hăng mlăm kiăng gơnam pioh man pơkra ba nao tañ, man pơkra bơnư̆ kjăp hăng tañ pơgiong ring bruă anai”.

Thun 2026, tơring čar Gia Lai đing nao ngăn rơnoh tuh pơ alin hơdôm ring bruă pơgang, pơgăn hăng rŭ pơdong glăi răm rai tơdơi kơ hơjan kơthel ƀơi hơdôm boh ƀon lan. Kơnong ƀơi phương Quy Nhơn hơmâo kah mă yua rơbêh 52,7 klai prăk pioh pơkra ming, man pơkra hơdôm ring bruă răm rai yua hơjan kơthel; truh ră anai hơmâo pơgiong 5 boh sang hră, anih anom amăng plơi pla hăng anom mă bruă. Amăng anun, akŏ bruă bơnư̆ pơga pơgăn hŭi lŏn tơhroh ƀơi Hải Minh gah rơngiao hơmâo pơsit lĕ ring bruă akŏ phun kiăng pơgiong hlâo bơyan hơjan hlim kiăng pơgang brơi kual plơi pla ƀơi yŭ tơkai čư̆ Phương Mai. Tui ơi Nguyễn Đức Toàn, Khua Jơnum min mơnuih ƀon sang phương Quy Nhơn, ring bruă anai hơmâo pơgiong 80% bruă mă. Gong gai ƀon lan glăk gum hrŏm hăng anom bruă man pơkra pơtum pơƀut lu mơnuih mă bruă, măi mok kiăng pơgiong djơ̆ hrơi mông pơkă. “Anom bruă man pơkra hơmâo đing nao pơƀut lu mơnuih mă bruă, măi mok kiăng pơtrut tañ bruă man pơkra ring bruă anai. Truh ră anai bruă man pơkra hơmâo pơgiong 80%. Jơnum min mơnuih ƀon sang phương git gai kiăng pơtrut tañ hlâo kơ yak nao bơyan hơjan kơthel, pơhlôm wai pơgang brơi kông ngăn hăng mơnuih ƀôn sang”.

Hăng pran gir run pơgiong hlâo bơyan hơjan hlim, ring bruă ƀu djơ̆ kơnong rŭ pơdong glăi anŏ răm rai đôč ôh mơ̆ ăt pơgôp wai pơgang brơi ană mơnuih, kông ngăn mơnuih ƀôn sang pơ yŭ tơkai čư̆ Phương Mai, djru brơi neh met wa ƀơi phương Quy Nhơn, tơring čar Gia Lai hơđong pran jua dŏ hơdip ƀơi anăp kơ lu tơlơi pơplih sat mơng ayuh hyiăng lŏn mơnai./.