Hơdôm hrơi anai, ƀơi kual plơi pla phrâo Kiên Long, să Bình An, tơring čar Gia Lai lêng kơ hmư̆ dik dak jua măi mok. Anai lĕ kual plơi pla phrâo prong hloh amăng 9 kual plơi pla djru brơi akŏ bruă jơlan rơdêh đuăi hmar Quy Nhơn-Pleiku, rơhaih giăm 10 ektar.

Kiăng hmao jao glăi amăng blan 7, dong mơng blan 3 thun anai, anom bruă man pơdong hơmâo ba nao hơdôm hơpluh măi mok, pơphun čuk pơkra tơhrơi kah hăng mlăm. Ơi Nguyễn Trung Cần, pô pơ ala brơi anom bruă man pơdong brơi thâo, truh ră anai, bruă man pơkra hơmâo pơgiong giăm 80%, pơgiong hơdôm anih phun kiăng jao glăi 119 amăng abih tih 250 blah lŏn mơnai brơi ƀon lan. “Lơm tŭ mă djop lŏn mơnai gêh gal brơi pok pơhai man pơkra, anom bruă hơmâo ba nao rơbêh 30 boh rơdêh pơdŭ pơgiăng, 10 boh rơdêh kuăi, 6 boh rơdêh čuk, 6 boh rơdêh glĭt hrŏm hăng hơdôm rơtuh čô kông ñơn nao mă bruă tơhrơi kah hăng mlăm, kiăng kơ ngă tui djơ̆ bruă jao man pơkra”.

Ƀơi 9 kual plơi pla phrâo rôk tui jơlan rơdêh đuăi hmar, anih anom lêng kơ tuh pơ alin ha amăng plĕ hăng hơdôm ară jơlan glông, apui kơđen, ia yua, hrĕ kap hăng hlong ia djah, ba glăi ƀô̆ mơta phrâo kơ plơi pla.

Tŭ mă tơlơi lăi pơthâo ruah mă anih dŏ, ơi Trần Văn Thông, dŏ amăng plơi Kiên Long, să Bình An, hur har pran jua yua anih dŏ phrâo hơmâo djop tơlơi gal ƀiă. “Kual lŏn dŏ phrâo amra anet ƀiă samơ̆ anih dŏ phrâo hơmâo lu anŏ gal, lu anŏ pơplih phrâo ƀiă. Ƀơi anai giăm jơlan mrô 19B, jơlan nao rai gêh gal ƀiă. Bruă tuh pơ alin klơi ia bơmun hơdjă kah hăng anih anom jum dar kual plơi pla phrâo jing tơlơi ngă bơngač”.

Bruă lăi pơthâo kah pơpha lŏn mơnai, dưm dăp plơi pla phrâo hrŏm hăng man pơkra anih anom, jơlan glông ha amăng plĕ ngă djơ̆ pran mơnuih ƀôn sang. Sit biă ñu, amăng hrơi mông dŏ tơguăn tơkuh nao rai glông ia hơdjă, Jơnum min mơnuih ƀon sang tơring čar Gia Lai ăt djru brơi prăk khuer ia bơmun brơi giăm 150 boh sang anŏ ƀơi 5 kual plơi pla phrâo, djru brơi neh met wa hơđong nao dŏ pơ plơi pla phrâo. Ơi Thái Văn Điểm, kơ-iăng Khua anom bơwih ƀong să Bình An, tơring čar Gia Lai brơi thâo: “Khul wai lăng akŏ bruă amăng să jak iâu mơnuih ƀôn sang nao pơ Jơnum min să Bình An pok pơhai bruă kah pơpha lŏn. Lu mơnuih hok mơ-ak yua Kơnuk kơna hơmâo tuh pơ alin, đing nao man pơkra anih anom, jơlan glông ha amăng plĕ”.

Jơlan rơdêh đuăi hmar Quy Nhơn-Pleiku glông giăm 125 km, abih tih prăk tuh pơ alin rơdêh 43.700 klai prăk. Kiăng djru bruă pơhrui glăi lŏn mơnai, tơring čar Gia Lai man pơdong 9 kual plơi pla pơtum pơƀut hăng 2 kual plơi pla pơlir nao rai, dưm dăp anih dŏ brơi rơbêh 500 boh sang anŏ bơdjơ̆ nao.

Truh ră anai, 9 kual plơi pla phrâo lêng kơ yak nao rơwang pơgiong. Ơi Phạm Sĩ Duy Nhân, khul wai lăng hơdôm ring bruă jơlan glông hăng anih anom plơi pla tơring čar Gia Lai brơi thâo, lu kual anun lĕ Trà Sơn, Thuận Đức, Trường Định 2 hăng Kiên Long hơmâo pơgiong hơdôm anih đing nao ngă, jao glăi lŏn kiăng ƀon lan pơphun bruă ruah mă, dưm dăp kual plơi pla phrâo. “Gah khul wai lăng, ƀing gơmơi gơgrong pơkiăo nao mơnuih tui lăng na nao tơl anih, gum hrŏm hăng mơnuih krăo lăng anom bruă man pơdong pơtrut tañ bruă man pơkra, pok pơhai ngă “tlâo ka pă kĭp”, man pơkra tơhrơi kah mlăm kiăng pơtrut tañ hloh. Truh ră anai, kual pioh kơ man pơdong plơi pla hơmâo pơgiong hăng jao brơi să kah pơpha lŏn, dưm dăp lŏn dŏ brơi mơnuih ƀôn sang. Hơdôm kual dŏ glăi, Khul wai lăng ăt glăk gir run pơtrut tañ kiăng pơgiong amăng blan 7”.

Bruă pơtrut tañ bruă man pơdong giong plơi pla phrâo rôk tui jơlan rơdêh đuăi hmar Quy Nhơn-Pleiku ƀơi Gia Lai ƀu djơ̆ kơnong djru brơi mơnuih ƀôn sang tañ hơđong tơlơi hơdip đôč ôh mơ̆ ăt ngă gêh gal kiăng akŏ bruă pok pơhai djơ̆ hrơi blan pơkă. Anai amra jing tơlơi akŏ phun pơtrut tơkuh nao rai amăng kual, pok prong kual lŏn mơnai hăng ngă pơtrut pơđĭ kyar bơwih ƀong huă-mơnuih mơnam brơi ƀon lan./.