Ơi Đoàn Hữu Dũng - Khua gơnong bruă jơlan glông hăng pơdŭ pơgiăng tơring čar Gia Lai brơi thâo, kiăng ngă hră pơ-ar kơ kơčăo bruă anai, Jơnum min mơnuih ƀôn sang 2 boh tơring čar Gia Lai hăng Bình Định ngă bruă hăng Phun Kông ti wai lăng prăk tuh pơ alin rơnuč thun 2023. Boh than brơi thâo, bruă pơkra jơlan rơdêh đuăi hmar Pleiku - Quy Nhơn tui tui hơdră ngă hrŏm kơnuk kơna hăng mơnuih ƀôn sang tơnap biă, anun kiăng sem glăi dong pơkra tui hơdră kơnuk kơna gơgrong abih bang.

Yua hnun, Gơnong bruă jơlan glông pơdŭ pơgiăng tơring čar Gia Lai hơmâo jŭ yap glăi, pơkra jơlan ber ƀiă dong, mơ̆ng 151km jing 143km laih anun lui hĭ glông rơdêh pơdơi ječ ƀơi hơdôm črăn hơmâo tơdrông. Mơ̆ng anun, prăk amra hrŏ trun mơn mơ̆ng 44.200 klai prăk dŏ glăi rơbêh 37.600 klai prăk, hrŏ trun rơbêh 6.500 klai prăk pơhmu hăng mrô jŭ blung a.