Anai lĕ ƀu kơnong anŏ gêh găl bơwih brơi bruă ngă hmua pla pơjing đôč ôh, ñu dŏ ngă anŏ pơpha ia yua, pơhrŏ ƀiă anŏ bơbeč djơ̆ mơ̆ng tơlơi truh lŏn adai ngă ƀơi lu plơi pla ter hang ia. Khă hnun, lơ̆m ayuh hyiăng lŏn adai jai hrơi pơblih ƀu klă lu tui, lu ia dơnao pơkong ia, man pơkra mơ̆ng hơdôm hơpluh thun hlâo adih laih, ră anai hlăk răm tui, tơhnal pơkă bruă ngă ječ ameč hloh kiăng tuh pơ alin man pơkơjăp glăi ring bruă hlâo kơ bơyan rơbŭ kơthel hlim ia ling dăo jing sa bruă kiăng biă mă yơh.

Ƀơi anăp lĕ, djop plơi pla, să anom bruă gong gai kơnuk kơna brơi nao sem lăng, man pơkra glăi, pơsir hĭ anŏ răm, pơkơjăp glăi ring bruă. Lăng nao sui hloh kơñ pơgi anai lĕ, Gia Lai man khom pơkra hăng pơđĭ kyar bơnư̆ pơkong ia hăng ba yua ia hơdjă pơđoh glăi, ba nao pơ kual plơi pla,  brơi mơnuih ƀôn sang yua mơ̆ng thun 2026-2030, anăp nao truh thun 2035. Amăng anun, tơring čar rơkâo hăng gơnong dlông djru prăk pioh pok pơhai bruă ming pơkra glăi hơdôm kơčăo bruă pơprong, ring bruă bơnư̆ pơkong ia dơnao, hnoh ia rô mơ̆, răm kơtang brơi pơkra hlâo amăng tơring čar.