Grup wai pơgang glai plơi Keo, să Ayun, tơring glông Chư Sê arăng jao wai lăng rơbêh 100 ektar glai rưng mơng Khul wai lăng glai Chư Sê. Hơdôm kual glai rưng ƀơi anai glăk rơk, hla kyâo krô amuñ ngă apui ƀong glai. Ayong Bùi Văn Khánh, grup wai lăng glai plơi Keo, să Ayun brơi thâo:

“Ayong adơi juăt hyu tir na nao, sit biă ñu amăng bơyan không phang pơ-iă kơtang tui anai. Tơdah hơmâo hơget thơ ƀing gơmơi amra lăi pơthâo brơi khul wai lăng glai hăng anom bruă bơdjơ̆ nao kiăng tañ prah apui”.

Yak nao bơyan không phang, Khul wai lăng glai Chư Sê hơmâo akŏ pơjing glăi 7 grup wai pơgang glai; juăt hyu tir, wai lăng ƀơi hơdôm kual amuñ ƀuh apui ƀong glai. Laih dong pơphun hyu čuh pơgang jum dar kual glai pla rơbêh 400 ektar hăng glai hơđăp amuñ ƀuh apui ƀong ƀơi 3 boh să hơmâo Bar Maih, Ayun hăng H’Bông. Ơi Đinh Mạnh Phong, Khua khul wai lăng glai Chư Sê, tơring čar Gia Lai brơi thâo, bruă čuh asuk ruk pioh pơgang jum dar djru brơi kơ bruă pơgang hŭi apui ƀong glai.

“Truh bơyan phang, hla kyâo, asuk ruk krô kreñ amuñ apui ƀong biă mă, yua anun ta kiăng hyu čuh hĭ kah huăi ƀuh apui ƀong pơ tlôn, tơlơi anai amra huăi ngă apui lar hyu kơtang tơdah apui ƀong; mơng anun amra wai lăng hơđong kyâo glai”.

 Khul wai lăng glai Chư A Thai glăk wai lăng glai ƀơi dua boh tơring glông Ia Pa hăng Phú Thiện, tơring čar Gia Lai, hăng rơbêh 19 ektar glai. Ơi Phạm Đắc Vịnh, Kơ-iăng khua khul wai lăng glai Chư A Thai brơi thâo: Ră anai, anai lĕ kual glai amuñ ƀuh apui ƀong mrô V (anai lĕ mrô hŭi rơhyưt hloh).

“Khul hơmâo pơpha jing 5 grup pơlir hăng 125 boh sang anŏ ƀing gơmơi jao wai lăng glai pok pơhai bruă wai pơgang glai rưng hăng pơgang hŭi apui ƀong glai. Hăng hơdôm kual glai rưng anom bruă glăk wai lăng, hlâo kơ yak nao bơyan phang, ƀing gơmơi hyu čuh hĭ rơk krô, asuk ruk kiăng plai ƀiă gơnam amuñ apui ƀong kiăng huăi ƀuh ƀong glai”.

Kiăng pơgang hŭi apui ƀong glai klă hloh, mơng thun 2023 truh ră anai, Jơnum min mơnuih ƀôn sang tơring glông Ia Grai hrŏm hăng hơdôm anom bruă wai lăng glai rưng gum hrŏm hăng gong gai ƀon lan pơphun 15 tal hyu pơtô pơblang tơlơi phiăn wai pơgang glai rưng ƀơi 5 boh să hơmâo glai hăng rơbêh 1.000 čô mơnuih mut hrŏm; kĭ tơlơi ƀuăn wai pơgang hŭi apui ƀong hăng hơdôm rơtuh boh sang anŏ hơdip giăm glai, ba hyu rơbêh 2 rơbâo pok hră pơ-ar brơi mơnuih ƀôn sang amăng hơdôm boh să hơmâo glai kiăng bruă pơgang apui ƀong glai klă hloh. Ơi Đỗ Văn Đông, Kơ-iăng khua Jơnum min mơnuih ƀôn sang tơring glông Ia Grai, tơring čar Gia Lai brơi thâo:

“Jơnum min mơnuih ƀôn sang tơring glông hơmâo pơphun hyu pel ĕp sit nik ƀơi sa, dua khul wai lăng glai hăng sa, dua anih jao wai lăng glai kiăng pơtrut pran gơgrong amăng bruă pơgang hŭi apui ƀong glai, sit biă ñu lĕ bruă pơgang, anăm brơi ƀuh apui ƀong glai”./.