Ƀơi thôn 1, să Hà Tam, tơring glông Đăk Pơ čơkă mă bruă wai lăng, pơgang giăm truh 260 ektar dlai mơng Grŭp wai lăng mă pô Kơdư An Khê. Hơdôm hrơi blan 3, pơ-iă hang sui ngă hơdôm blah dlai ƀơi anai hmâo lu rok krô, amuñ ngă apui ƀong biă. Kiăng gơgrong hlâo pơgang hlôm hlâo, să Hà Tam hmâo pơjing laih hơdôm grŭp wai lăng, pơpha lu anih găn hyu tir, wai lăng pơgang dlai. Biă ñu, anom hmâo ba tơbiă jơlan gah pơphun čuh hlâo hmâo pơkă lu ektar ƀơi hơdôm kual phun amuñ hmâo apui ƀong. Ơi Phạm Đông Mạnh, thôn 1, să Hà Tam, tơring glông Đăk Pơ, sang anô̆ čơkă mă bruă jao wai lăng pơgang dlai brơi thâo:

 “Hơdôm grŭp mơng dua truh kơ 3 čô hyu tir wai lăng 24/24, lom hmâo tơlơi truh ƀing gơmơi amra lăi pơthâo glăi kơ grŭp wai lăng Kơdư An Khê thâo hăng ƀing gơmơi amra iâu pơhrui abih bang mrô pơsir hăng jơlan gah 4 ƀơi anun hmâo khul ƀơi plơi să, ƀing gơmơi ngă kơjăp, gum hrom djơ̆ kiăng pơsir hơdôm tơlơi truh”.

  Grŭp wai lăng dlai pơgang hlôm hlâo Kơdư An Khê (tơring glông Đăk Pơ̆, tơring čar Gialai) ră anai glăk wai lăng rơbêh kơ 10.000 ektar dlai, amăng anun lŏn dlai hơđăp hmâo 3.600 ektar dlai kyâu pla năng ai ñu 1.000 ektar. Dong mơng akô̆ thun, anom hmâo hơkrŭ glăi Grŭp git gai pơgang pơgăn apui ƀong dlai ăt kah hăng hơkrŭ glăi 4 grŭp plơi pla phrâo čơkă mă, pô pơgang rah hăng pơgăn rah apui ƀong dlai.

Ơi Lê Thái Hùng, Kơ-iăng Khua Grŭp wai lăng dlai pơgang hlôm hlâo Kơdư An Khê, tơring glông Đăk Pơ, tơring čar Gialai brơi thâo, anom kơtưn bruă pel ĕp, pơkiăo nao mơnuih dô̆ gak, hrom hăng hơdôm grŭp čơkă bruă jao dô̆ gak na nao ƀơi hơdôm anih pơdŏng phun kiăng thâo, pơsir hmao tlôn hơdôm anih apui ƀong. Hrom hăng anun pơdŏng hơdôm grŭp, khul pơgang pơgăn apui ƀong dlai hăng khul đĭ truh hơdôm rơtuh čô mơnuih. Anom ăt pok pơhai mơn hơdôm bruă mă kah hăng čuh apui pơgang hlôm hlâo, pơkra jơlan pơgăn apui hăng hơdôm blah dlai amra hmâo apui ƀong prong.

 “Anom ăt kơtưn mơn bruă pel ĕp, dô̆ gak hăng hơdôm grŭp čơkă bruă jao, gum hrom hăng gong gai plơi pla hăng hơdôm grŭp amăng bruă lăi pơhing, gum hrom lom hmâo apui ƀong truh lĕ ăt amra iâu pơhrui mơn khul hmao tlôn. Hrom hăng anun lĕ Jơnum min mơnuih ƀôn sang tơring čar hăng hơdôm gơnong bruă hmâo đing nao hăng ngă gal brơi kơ ngă tui hơdôm jơlan hơdră čuh pơgang hlâo hmâo kiăng plai ƀiă apui ƀong dlai, plai ƀiă đut hlah bruă apui ƀong dlai truh amăng bơyan phang khôt”.

Tơring glông Đăk Pơ ră anai glăk wai lăng giăm truh 24.000 ektar dlai, amăng anun hmâo rơbêh kơ 19.000 ektar dlai hơđăp. Ơi Đào Duy Tuấn, Khua Anom wai lăng dlai kyâu tơring glông Đăk Pơ brơi thâo, anom hmâo pơjing laih kơčăo bruă pơgang hlôm hlâo apui ƀong dlai tlô hăng ngă giong hơdôm bruă grŭp git gai pơgang apui ƀong dlai gưl tơring glông, să; kơtưn lăi pơhing pơsur mơnuih ƀôn sang, pel ĕp hơdôm bôh anom pô dlai, Jơnum min mơnuih ƀôn sang hơdôm bôh să kiăng bruă pơgang pơgăn apui ƀong dlai ba glăi bôh tơhnal prong.

“Dong mơng akô̆ thun truh ră anai, akă hmâo apui ƀong dlai hơpă ôh, khă hnun hai anom wai lăng dlai kyâu ăt ƀu lui raih, tlaih lui mơn bruă pơgang pơgăn apui ƀong. Črâo ba na nao mơnuih apăn bruă gum hrom hăng Jơnum min mơnuih ƀôn sang hơdôm bôh să, hơdôm anom bruă pô dlai kơtưn lăi pơhing, ngă klă tui jơlan gah 4 mơta hơđăp kiăng kơ hmao pơgang pơgăn lom apui ƀong, huăi lar hyu, biă ñu kơtưn dô̆ gak hơdôm anih amra hmâo apui ƀong prong”./.