Ƀu kơnong mông gêh găl jak iâu abih bang mơnuih ƀôn sang ngă hrom pơkjăp drơi jăn, kiăng pôr pơthâo rup rap plơi prong Ƀuôn Ma Thuôt-Dak Lak hăng mơnuih ƀôn sang laih anun tuai hyu ngui đôč ôh, pơplông đuăi Marathon Dak Lak dŏ ba glăi boh tŭ yua hiam kơ bruă kiăng pơčruh prăk hrăm hră, prăk pơhlôm nua ia jrao kơ čơđai sang hră ƀun rin laih anun djru pơdong sang khăp pap kơ sang anŏ tơnap tap aka ƀu hơmâo sang dŏ. Boh tơhnal khua mua pơphun tal pơplông hơmâo apah pri sa, pri dua, klâo kơ ƀing đuăi hmar, ataih, sui hloh.

Laih dơ̆ng jao rơnoh prăk djru man pơdong sa boh sang khăp pap, djru prăk hrăm hră anăn Tŭi bơngač tơlơi kiăng yua Anom bruă Tơdăm dra mut phung tơring čar Dak Lak djru, ƀơk čơkhŏ, rơdêh tang rơwang hăng gơnam kơ čơđai sang hră ƀun rin hrăm hră thâo, găn rơgao tơlơi tơnap tap mơ̆ng drơi jăn, sang anŏ pô.