Anai lĕ tơlơi pơhing amăng mông jơnum hăng mơnuih mă tơlơi pơhing phrâo mơguah lơ 27/2 yua kơ Ding jum Khul ling tơhan gum hrŏm hăng Ping gah tơring čar Dak Lak pơphun. Bruă bơkơtuai kiăng pơtŏng sit, ngă dơlăm dong kơ tơhnal, bôh tŭ yua mơ̆ng Tlaih rơngai Dap Kơdư hăng bruă kơdŏng blah ayăt Mi đưm, tlaih rơngai lŏn ia; ĕp tơbiă bôh than truh kih, lăng nao hơdôm tơlơi găn rơgao pioh mă yua dong amăng bruă pơdŏng hăng pơgang lŏn ia ră anai.

Hrŏm hăng anun, ngă rơđah hơdôm bôh than mơ̆ng Ping gah, gong gai hăng mơnuih ƀôn sang hơdôm bôh tơring čar kual Dap Kơdư lăi hrŏm hăng tơring čar Dak Lak lăi ha jăn tơdơi kơ 50 thun pơsir tơlơi răm rai yua kơ blah ngă, ngă tui nua yôm rơnuk rơnua hăng pran jua pơsit khut khăt, truh kih mơ̆ng tlaih rơngai Dap Kơdư thun 1975 amăng ngă tui pơplih phrâo. Ngă tui dong gru grua bôh thâo djuai ania hăng anô̆ gal mơ̆ng tơring čar, rŭ tơgŭ pran gơgrong hăng tơlơi čang rơmang hrưn đĭ pô amăng rơnuk phrâo mơ̆ng djuai ania, pơdŏng kual mă bruă Dap Kơdư hăng tơring čar Dak Lak jai hrơi jai pơdrŏng asah klă hiam, thâo rơgơi./.