Kual Dap Kơdư mut amăng bơyan hơjan laih. Ƀơi Sang hră kơnuk kơna čem rông pơƀut dua gưl hrăm să Thuận An, tơring čar Lâm Đồng, mơnuih mă bruă glăk gir biă, ngă bruă hơdeč hmar đah mơ̆ng tañ giong. Ơi Nguyễn Thành Long, Khua wai lăng sa anom bruă gơgrong man pơdong brơi thâo, ră anai hơmâo năng ai 270 čô kông ñơn, ƀing kĭ sư hrŏm hăng rơbêh 20 boh rơdêh, măi mok kah pơpha jing lu grup, ječ ameč pŏng pơbung, man pơnăng sang hră, kuăi dor, tơtŏm atur lŏn, gir kiăo hmao hrơi pơkă đah mơ̆ng giong. Mah glăk hơmâo aset đôč mơnuih mă bruă, nua pơtâo čuah hai pơmă truh 20-30% pơhmu hăng hlâo, pô gơgrong man pơdong ăt kah pơpha lăp djơ̆, hơđong anih juăt blơi gơnam đah mơ̆ng pơhlom bruă man pơdong, gir man pơdong sang hră giong djơ̆ hrơi pơkă mơtăm: “Hrơi hơjan lĕ gơmơi pik ia čur, pik ia ƀlit, bả ma-tit hăng pik ia kulơr amăng lăm sang; bơ hrơi pơ-iă lĕ gơmơi ngă gah rơngiao, klup pơbung tôl kiăng tañ. Ƀơi sang S1 hơmâo man pơkra giong 70%, S7 hơmâo man giong laih, truh rơwang hrơi kŏm tơdơi lĕ klup pơbung laih, bơ sang S10 glăk dŏ man pơgiong hĭ sang hăng glông gưl 2, 3; gah pơnăng war sang hră gơmơi ngă giong laih. Gơmơi gir truh lơ 30/7 pơ anăp, jao glăi sang hră laih”.

Ơi Hà Sỹ Sơn, Khua khul wai lăng kơčăo bruă Tuh pơ alin hăng Man pơdong mrô 3 tơring čar Lâm Đồng, pô gơgrong tuh pơ alin brơi thâo, tơring čar hơmâo abih tih 5 boh sang hră kơnuk kơna čem rông pơƀut hrŏm dua gưl. Amăng anun, hơmâo dua boh sang hră ƀơi să guai dêh čar Thuận An hăng Quảng Trực man pơdong mơ̆ng rơnuč thun 2025, glăk iâu mơnuih mă bruă, gir ngă bruă “3 ka 4 kip”, pơhlom brơi tañ. Ƀơi anăp tơlơi tơnap nua gơnam man pơdong pơmă, mơnuih mă bruă hai kơƀah mơn, adai ƀu lăp lơi, juăt hơjan hlim dong, Khul jing ngă bruă nao sem lăng kiăo tui rim blan, tap năng tui rim wơt hrơi tơjuh mơtăm, bruă ƀơi ngă giong lĕ čih glăi bruă anun, laih dong pơplih glăi mrô prăk či brơi nao đah mơ̆ng djru ba anom bruă gơgrong man pơdong, gir ngă pơgiong hĭ amăng lơ 30/7: “Khul wai lăng kơčăo bruă hrŏm hăng hơdôm anom bruă man pơdong sang hră čih glăi hơdră man pơdong rơđah rơđông, či krăp lăng rim hrơi, rim wơ̆t hrơi tơjuh, đah mơ̆ng ĕp jơlan ngă tañ ƀiă, gir ngă tui hăng hrơi pơkă. Hăng gơnam pơtô hrăm, hrŏm hăng măi mok gơnam yua pơkŏn, gơmơi hơmâo kĭ laih hră blơi gơnam hăng hơdôm sang bruă mơdrô; gơñu ăt gir pơkra, blơi mơ̆ng čar rơngiao hai, kiăng truh hrơi man pơdong giong sang hră lĕ gơñu nao dưm truă mơtăm. Tơlơi kiăng lĕ djŏp mơta bruă mă hơmâo ngă giong hlâo kơ mut thun hrăm phrâo”.

Hrŏm hăng anih man pơdong glăk gir ngă bruă đah mơ̆ng tañ giong, bruă prăp lui mơnuih mă bruă, ruah čơđai hrăm hai ăt hơmâo ngă ječ ameč mơn. Kiăng pơhlom bruă pơtô hrăm lơ̆m sang hră hơmâo mă yua, Gơnong bruă pơtô hăng pơjuăt tơring čar Lâm Đồng ngă hrŏm hăng hơdôm boh să prăp rơmet ruah nai pơtô laih. Laih dong hơdôm boh să prăp lui bruă ruah čơđai sang hră djơ̆ mrô pơkă, djơ̆ pô dưi hrăm, laih anun prăp rơmet ruah mơnuih ngă bruă hră pơ-ar, wai lăng, djru bơwih bơwang lơ̆m hơmâo Jơnum min mơnuih ƀôn sang tơring čar Lâm Đồng kĭ hră ngă bruă.

Ơi Hồ Sĩ Hải, Khua anom bruă Gru grua- Mơnuih mơnam să Quảng Trực brơi thâo, Sang hră kơnuk kơna čem rông pơƀut 2 gưl ƀơi să lơ̆m hơmâo man giong, amra čơkă năng ai 900 čô čơđai, hăng 18 anih hrăm gưl sa, 12 anih hrăm gưl 2. Ră anai să pơkiăo nao laih 32 čô nai pơtô sit nik; 19 čô dŏ glăi pơtô jăng jai tui hră kĭ pơkôl, hrŏm hăng rơbêh 10 anih mă bruă wai lăng, ngă hră, bơwih bơwang, boh thâo măi mok ia rơgơi...amra hơmâo ruah mă pơ anăp anai: “Kiăng dưm dăp, prăp rơmet ruah čơđai dưi mut hrăm amăng sang hră kơnuk kơna čem rông, gơmơi ruah čơđai kiăo tui hơdră čih pơkra hră hơduah tơña mơit truh pơ abih bang sang anŏ hơmâo ană bă truh thun hrăm hră, tui hrăm ƀơi hơdôm boh sang hră amăng să. Mơ̆ng anun, tơdah kiăng nao hrăm, ƀing čơđai amra mut hrăm sang hră kơnuk kơna čem rông. Gơmơi kiăo tui hơdôm tơlơi pơtrun, tơlơi pơkă či ruah mă djơ̆ pô dưi mut hrăm. Ră anai hơmâo laih rơbêh kơ 90% čô amĭ ama lăi glăi djơ̆ hăng tơlơi pơkă, mơit glăi hră hơduah tơña sem lăng, čang rơmang ană bă gơñu dưi mut hrăm amăng sang hră anai”.

Mơ̆ng tơlơi pơtrun hiam mơ̆ng Ping gah, Kơnuk kơna, wơ̆t hăng tơlơi gir mơ̆ng pô tuh pơ alin, anom bruă man pơdong hăng gong gai să, năng ai 1.800 čô čơđai sang hră ƀơi guai tơring čar Lâm Đồng amra tañ dưi hrăm, ƀong huă, đih pit amăng sang hră hiam, hơmâo djŏp gơnam yua. Hơdôm boh sang hră phrâo ƀu kơnong djru čơđai pơ guai dêh čar dưi ngă bruă gơñu hor đôč ôh, ăt gum pơtô pơjuăt mơnuih mă bruă kơñ pơgi ni anăp, gum man pơdong guai Lâm Đồng jai hrơi pơdrong sah, thâo rơgơi, kjăp phik pơ guai dêh čar./.