Anai lĕ mông jơnum tal 2 amăng blan 4 pioh bơkơtuai, gum pơhiăp kơ sa dua mơta rơwang bruă Tơlơi phiăn pơkă hlâo amra lăi pơthâo kơ Khua pơ ala mơnuih ƀôn sang pel ĕp gum pơhiăp amăng Tal jơnum lok 9 pơ̆ anăp. Pơhiăp amăng mông jơnum, Khua dêh čar ơi Phạm Minh Chính brơi thâo, amăng Tal jơnum lok 9, Khua pơ ala mơnuih ƀôn sang dêh čar ta tal 15 pơkă hlâo Gong gai dêh čar amra lăi pơthâo kơ Khua pơ ala mơnuih ƀôn sang dêh čar 63 mơta hră pơ-ar, tơlơi lăi pơthâo glăi, amăng anun hmâo 37 Tơlơi phiăn hăng tơlơi pơtrun pơsit.

Anai lĕ mrô hră pơ-ar lu biă, yôm phăn dong, bơdjơ̆ nao abih bang bruă bơwih ƀong – mơnuih mơnam. Mrô bruă lu, bruă jao tơnap, tơlơi kiăng dlông, tơhnal bruă glêh tơnap, rơwang ñu prong. Khua dêh čar rơkâo hơdôm ding jum gơnong bruă đing nao mông, đing nao ngăn rơnoh lu hloh, ƀơi anăp git gai, črâo ba ngă giong hơdôm rơwang bruă tơlơi phiăn. Hrŏm hăng anun gum hrŏm hăng hơdôm bôh ƀirô mơ̆ng Khua pơ ala mơnuih ƀôn sang lơm pel ĕp, pơblang, tŭ mă, pơplih pơkra rơwang bruă Tơlơi phiăn. Hmao tlôn lăi pơthâo glăi hăng hơdôm tơlơi phrâo hmâo, hơdôm bôh yôm rơgao kơ tơlơi dưi mơ̆ng pô./.