Lăi pơthâo hăng ƀing khua, ơi Nguyễn Đại Phong, Khua sang ia jrao prong kual Dap Kơdư brơi thâo, amăng rơwang thun 2019-2022, Sang ia jrao amăng ƀrư̆ ngă dưm kơnar abih bang hơdră ngă bruă kiăng bruă khăm pơjrao tơlơi ruă jai hrơi klă hloh. Hmư̆ hing biă ñu lĕ mă yua boh thâo măi mok pôr pơhing, pơplih bruă ngă hră pơ-ar khăm pơjrao tơlơi ruă; pơplih phrâo tơlơi djru lăng ba mơng ƀing ơi ia jrao, ƀing ơi ia jrao kiăng hơmâo tơlơi pơmin hiam, djru ba hơdôm boh sang ia jrao anet; pơđĭ tui gơnam tam amăng sang ia jrao, măi mok ngă bruă phrâo, ba glăi tŭ yua sit nik amăng bruă khăm hăng pơjrao tơlơi ruă.

Pơhiăp ƀơi mông ngă bruă, Kơ-iăng khua Ding jum ia jrao Trần Văn Thuấn brơi thâo Sang ia jrao prong kual Dap Kơdư kiăng hơmâo hơdră djru lăp djơ̆ ƀiă dong, pơjing rai anih mă bruă hiam, abih bang rơnôm, thâo gum pơgôp nao rai, pơtrut nao rai hăng hơdôm boh sang ia jrao gưl prong kiăng hrăm bruă mơng ataih, kiăng kơjăp bruă ia jrao, laih anun bong glăi ƀing ơi ai jrao rơgơi. Kơ bruă ĕp pô gơgrong blơi ia jrao, măi mok ia jrao, Kơ-iăng khua ding jum brơi thâo, ră anai hơmâo lu hơdră pơsir brơi tơlơi tơnap, phun ñu lĕ Sang ia jrao gir ngă hă ƀŭ.