Tui hăng tơlơi lăi pơthâo glăi amăng mông ngă bruă, tơdơi kơ 5 thun pơphun ngă, bruă wai lăng kơnuk kơna kơ wai lăng, pơgang, pơđĭ kyar glai hơmâo pơphun dưm kơnar, tŭ yua. Mơng thun 2017 truh ră anai, hơdôm anom apăn bruă hơmâo ƀuh, čơkă mă, ngă hră pơsir brơi rơbêh 6.500 wơ̆t tơlơi soh gah glai rưng, amăng anun phăk prăk rơbêh 6.100 wơ̆t tơlơi soh. Pơhmu hăng thun 2012-2016, mrô ngă soh hrŏ trun rơbêh 44%. Bruă pla glai hai klă mơn, tơdơi kơ 5 thun, tơring čar hơmâo pla rơbêh 12.400 ha, amăng anun glai pioh pơkra gơnam hơmâo rơbêh 10.100 ha, bơ dŏ glăi lĕ glai pla pơgang tơlơi truh, pơgang lŏn ia.

Pơhiăp ƀơi mông ngă bruă, ơi Trần Tuấn Anh, Khua anom bơwih ƀong dêh čar kiăng, Khua mua gum bruă git gai Ping gah tơring čar Dak Lăk gơgrong bruă git gai wai lăng, pơgang ba glai rưng. Amăng anun kiăng lăp đing nao tơlơi gơgrong bruă mơng ƀing khua amăng bruă pioh hơmâo mơnuih ngă soh tơlơi phiăn glai rưng. Tơring čar Dak Lăk kiăng ngă klă bruă pơtŏng glăi, sem lăng hăng hơdôm kơčăo bruă pơplih pơkra glăi glai rưng mơng hơđăp, pơplih bruă mă yua. Rơngiao kơ anun, tơring čar ăt kiăng pơtŏng glăi hrơi blan pơ anăp anai hơmâo tơlơi lông hăng tơlơi truh hơget hơmâo amăng bruă wai lăng, pơgang hăng pơđĭ kyar glai rưng hơđong kơjăp.