Rơkâo hăng khua mua pơ ala mơnuih ƀôn sang dêh čar, mơnuih ruah khua plơi prong Kon Tum čang rơmang pơsir djơ̆ lăp tơlơi dŏ gun amăng bruă lŏn tơnah, biă mă ñu kah hăng tơlơi hăng bruă hơmâo sui mơ̆ng anai 25 thun pơ klôn laih, mơnuih ƀôn sang mă prăk pô blơi 46 blah đang lŏn ƀơi să Vinh Quang yua Jơnum min mơnuih ƀôn sang să jao.

Lăi glăi tơlơi tơña anun, ơi Dương Anh Hùng, Kơ-iăng khua Jơnum min mơnuih ƀôn sang plơi prong Kon Tum, brơi thâo, bruă Jơnum min mơnuih ƀôn sang să Vinh Quang jao 46 blah lŏn đang ƀơi Km7-jơlan prang 14 brơi mơnuih ƀôn sang blơi, anom bruă ĕp kơđi tơring čar Kon Tum klah čun lĕ soh hăng tơlơi phiăn pơtrun. Ơi Phạm Đình Thanh, Kơ-iăng khua grup pơ ala mơnuih ƀôn sang dêh čar ƀơi Kon Tum brơi thâo, blan 5/2024, grup pơ ala mơnuih ƀôn sang dêh čar tơring čar Kon Tum hơmâo čih pioh tơlơi rơkâo anai hăng ngă ngă mơ-it glăi Jơnum min mơnuih ƀôn sang tơring čar Kon Tum pioh ĕp glăi hăng pơsir.