Mơ̆ng kơnôl 26/7 truh kơnôl 3/8, Grup tơhan K52 hơmâo ƀuh, kuai rŭ 3 per tơlang tơhan; truh kơ kơnôl 4/8, ĕp ƀuh dong 3 per tơlang, pơđĭ tui per tơlang hơmâo kuai rŭ amăng tal anai jing 6.

Tơdơi kơ ƀuh tơlang tơhan, ƀing khua, ling tơhan kuai rŭ tui tơlơi pơtrun, pơhlom brơi lăp djơ̆, thâo pơpŭ kơ atâo djai; hơdôm per tơlang tơhan djai drơi kơ lŏn ia hơmâo ba glăi pơ Anom bruă khua git gai tơhan să Ia Boòng či hơ’ŭ, mơyut jôk, wai lăng hăng ngă pơgiong hră pơ-ar kiăng krăn pô. Tơlơi anai dưi ngă lĕ yua hơmâo tơlơi ngă hrŏm mơ̆ng tơhan hyu klơi rŭ wơ̆t hăng ping gah, gong gai, khul tơhan hăng mơnuih ƀôn sang amăng bruă hmư̆ hing, rŭ đĭ, pơhmu nao rai tơlơi pơhing. Ră anai grup tơhan K52 pok prong anih hyu ĕp ƀơi plơi Sơr, hăng hơdôm boh plơi iao gah dong hmư̆ hing hơmâo anih dor tơhan djai pơsăn drơi.