Tơdơi kơ Hră pơtrun 36 hơmâo pơtrun, ƀơi Anom ngă ƀong hrŏm Ngă hmua Mơtah hơdjă Krông Pač, tơlơi hok mơak ƀuh ƀơ ƀô̆ mơta ƀing amăng anom bruă. Lu thun rơgao, anom ngă ƀong hrŏm hơmâo 7 čô sit nik, hơbêh 200 boh sang anŏ ngă hrŏm, hăng rơbêh 120ha đang sâu riêng gir pla tui hơnong pơkă VietGAP, mă yua boh thâo čih pioh bruă mă amăng điện tư̆, čih pơkra bruă wai lăng anih pla klă, djơ̆ glông. Khă hnun, mah rơbêh70% đơ đam lŏn pla tui hơnong pơkă VietGAP laih, anom ngă ƀong hrŏm aka ƀu hơmâo ôh mrô anih pla yua lu anih pla plah hăng djuai phun pơkŏn, aka ƀu djơ̆ hăng anŏ kiăng brơi mrô pơkă anih pla tui hăng tơlơi pơkă hlâo adih.

Ơi Trần Văn Thắng, Khua anom ngă ƀong hrŏm brơi thâo, Hră pơtrun mrô 36 pok rai tơlơi găl phrâo kiăng hơdôm anih pla pơkra gơnam sit nik, kiăo tui tơlơi pơčrâo brơi laih samơ̆ hlâo kơ anun tơnap gah hră pơar, jing dưi ba pơƀuh gơnam pơ anih mơdrô pơ tač rơngiao tañ hloh: “Ƀing gơmơi bơni biă kơ bruă Kơnuk kơna ngă bruă hơdeč hmar, pơplih brơi hơdôm tơlơi aka ƀu hruaih mơ̆ng Hră pơtrun 38. Tơlơi anun dưi pơklaih brơi anŏ tơnap kơ mơnuih ngă hmua hăng anom ngă ƀong hrŏm. Hơdôm mơta gơnam pơkra rai hơmâo ngă djơ̆ akŏ tlôn laih, mông anai dưi ba sĭ pơ tač rơngiao, sâu riêng mơ̆ng Việt Nam dưi pơhno kơtang hloh. Kâo đăo neh met wa pơmin kjăp hloh amăng bruă pơkra gơnam klă na nao, mơ̆ng anun sâu riêng Việt Nam dưi pơhno hăng hrưn đĭ ataih hloh ƀơi anih mơdrô jar kmar”.

Khul mơnuih ngă bruă mơdrô ba sĭ gơnam pơ tač rơngiao ăt lăi mơn, Hră pơtrun mrô 36 pơklaih brơi laih “anŏ đom” prong hloh anun lĕ bruă ngă hră mrô anih pla hăng anih anung gơnam. Ơi Huỳnh Kiều, pơ ala kơ anom bơwih ƀong mơdrô sâu riêng pơ čar rơngiao ƀơi Dak Lăk brơi thâo, hră pơ-ar rơkâo brơi gru mrô mơ̆ng anom bruă mơdrô tơguan rơbêh 4 blan laih. Bruă ngă hră mơ̆ng ataih, jao glăi pơ să hăng ngă tañ ƀiă amra jing tơlơi pơplih prong biă kơ bruă ba sĭ gơnam. Ơi Huỳnh Kiều ăt rơkâo hơdôm anom apăn bruă hơmâo hră pơtô ba kiăng hơdôm tơlơi pơtrun anun hơmâo anom bruă mơdrô dưi ngă tui amuñ: “Rơkâo đĭ Gơnong bruă pơkra gơnam hăng sĭ mơdrô ngă bơrơđah brơi tơlơi pơtrun, pơtô brơi amuñ, kiăng anom bruă mơdrô dưi ngă tui, pơhlom djơ̆ hăng tơlơi pơkă, laih anun huăi rơngiă lu mông. Laih dong, anom bruă mă jia kiăng pơtô brơi rơđah rơđông kiăng anom bruă mơdrô, ƀing hyu mơdrô hăng mơnuih ngă hmua ngă tui djơ̆ tơlơi pơkôl pơkă, huăi hơmâo anŏ tơnap gah prăl jia lơ̆m blơi, ba sĭ sâu riêng pơ tač rơngiao”.

Hră pơtrun mrô 36 ƀu kơnong čang rơmang pơklaih brơi hră pơ-ar brơi mrô anih pla đôč ôh, ăt jing phun tơhnal pơsir brơi anŏ aka ƀu găl lơ̆m ba sĭ sâu riêng. Tơring čar ră anai hơmâo năng ai 200 anih anung gơnam samơ̆ kơnong hơmâo 16 anih đôč hơmâo brơi mrô yua Phun anom bruă rô nao rai sĭ mơdrô hăng čar rơngiao dêh čar Khač brơi kơ hơdôm anom bruă mơdrô čar rơngiao pơkra ƀudah djă pioh răk lui gơnam ƀong huă hăng gơnam mơ̆ng hmua, kiăng dưi ba sĭ sit nik hơmâo hră pơ dêh čar Khač (Mrô lĕ GACC); mrô anih pla hơmâo brơi mrô aset biă. Tơlơi anai ngă kơ lu anom bruă mơdrô khŏm ba sĭ gơnam kơnang kơ sang bruă pơkŏn, anun yơh hơmâo bruă arăng blơi sĭ mrô hră hăng hơmâo lu tơlơi ƀu găl gah hră pơ-ar...Yă Hoàng Thị Thanh Thủy, Khua kông ti pơtô brơi bruă mă jia Dak Lăk brơi thâo: “Hră pơtrun 36 phrâo anai jing kâo lăng mơak biă. Tơlơi phiăn hơmâo pơklaih brơi, ngă amuñ ha bơnah laih, hră brơi mrô anih pla anih anung gơnam hai tañ  mơn, hơmâo ngă bơkơnar, tui anun jing plai mơn kơƀah mrô anih pla, kơƀah anih anung gơnam, pơjing anih bơwih ƀong mơdrô bơkơnar hloh. Gơmơi amra djru ba hơdôm anom bruă mơdrô hăng mơnuih ngă hmua ngă giong hră đah mơ̆ng tañ hơmâo gru mrô gơnam”.

Ơi Lê Anh Trung, Khua khul ngă sâu riêng tơring čar Dak Lăk lăi, tơlơi mơ̆ anom bruă mơdrô čang rơmang ƀu kơnong jing hră pơ-ar hơmâo ngă tañ ƀiă đôč ôh, ăt jing jơlan hơdră wai lăng phrâo. Bruă hơdai čih mă hră pơ-ar, gơgrong bruă nao hrŏm hăng sem lăng glăi tơdơi kơ ngă giong hră amra plai ƀiă tơnap gah hră pơ-ar, laih dong pơđĭ tui tơlơi gơgrong mơ̆ng hơdôm anom bruă amăng bruă pơkra gơnam: “Kâo čang rơmang hơdôm tơlơi pơgăn bruă ba sĭ pơ tač rơngiao ƀu hơmâo dong tah. Lơ̆m hơmâo tơlơi pơkă hră pơtrun hơmâo ngă pơamuñ brơi, djơ̆ jơlan gah, jing plai mơn ngă tơnap, ngă kaih hră pơ-ar. Hloh kơ anun dong, anai jing phun atur kiăng Dak Lăk akŏ pơdong anih ngă hmua pơkra gơnam hơdjă, rơnuk rơnua, djơ̆ hăng tơlơi kiăng mơ̆ng abih bang anih mơdrô ƀơi jar kmar”.

Hră pơtrun mrô 36 mơ̆ng Kơnuk kơna pơkă bruă brơi hăng wai lăng mrô anih pla, anih anung gơnam hơmâo ngă tui abih bang ƀơi Boh thâo bơwih brơi ngă hră dêh čar; anom bruă dưi pơkra, pơsir brơi hră pơ-ar hơmâo jao kơ Jơnum min mơnuih ƀôn sang să laih. Hrơi ngă hră jing aset tui mơn, lu biă mă ñu lĕ 3 hrơi đôč hăng hră pơ-ar huăi rơkâo brơi mrô ba sĭ gơnam pơ čar rơngiao.

Hăng Dak Lăk - tơring čar hơmâo đang pla sâu riêng prong hloh amăng čar ta, Hră pơtrun 36 čang rơmang ƀu kơnong pơklaih brơi anŏ tơnap hră pơ-ar đôč ôh, ăt ngă bơrơđah brơi anŏ yom, nua gơnam, pơđĭ tui anŏ klă gơnam tam hăng tơlơi dưi pơhno mơ̆ng anom bruă pơkra sâu riêng ƀơi anih sĭ mơdrô jar kmar./.