Ƀơi mông bơkơtuai nao rai, ơi Trần Thanh Mẫn đăo kơnang gah yŭ tơlơi git gai mơ̆ng ơi Sophon Zaram, Khua pơ ala mơnuih ƀôn sang dêh čar, Thai Lan ăt gum hrŏm kơnuk kơna pơtrut pơđĭ kyar bơwih ƀong huă-mơnuih mơnam, pơđĭ tui tơlơi hơdip mơda mơnuih ƀôn sang hăng kơnuih hing ang kơ dêh čar Thai Lan amăng jar kmar.

Pơtong rơđah bruă ngă giăng mah dua bơnah sang bruă čih pơkra tơlơi phiăn dêh čar thun blan laih rơgao, dua bơnah khua git gai pơ ala mơnuih ƀôn sang dêh čar tŭ ư hrŏm kơtưn bruă pơčrong sai nao rai mơ̆ng khul khua mua dua bơnah hăng djop gưl; pok pơhai tŭ yua ngă tui Hră pơkôl pơkă ngă hrŏm dua bơnah anom bruă pơ ala mơnuih ƀôn sang. Pơčrong nao rai hơdôm tơlơi hơmâo amăng kual laih anun jar kmar đing nao, dua čô khua pơ ala tŭ ư ngă hrŏm dua bơnah tong ten hloh amăng kual ASEAN, AIPA, IPU hăng djop mông jơnum khua mua pơ ala lu bơnah dêh čar; pơđĭ kơtang tơlơi gơgrong ba mơ̆ng anom bruă phun kual ASEAN hăng pơtrut ngă hrŏm djop tơlơi phiăn pơkă amăng kual Mekong.