Đĭ song tuah hăng tơngan ƀơi jơlah ia Bàu Đá, ta dưi lăng djŏp mơta gơnam hơmâo amăng ia jơngeh, rơ’ơ̆. Hơmâo kơnua čăt rok, hơmâo kyâo, rơ-ưng boh pơtâo, hăng phun bơnga črih ƀâo phuang amăng hrơi bơyan pơdơi prong, pơjing rai anih anom ƀơi Bàu Đá jai hiam ngă pơhưč pran jua hloh. Rơbêh 70 thun laih, ơi Đào Kim Thông ƀơi plơi Mỹ Điền, să Hòa Thịnh dŏ giăm ƀơi glai rưng anai mơ̆ng anet, ăt hơdip amăng thun blan blah ayăt kơtang kơtit. Sit glai rưng ia dăo Bàu Đá anai yơh pơgang ba mơnuih ƀon sang hăng rông bơhơdip tơhan ngă hơkrŭ, gum tơgŭ hơkrŭ Hòa Thịnh thun 1960: “Bruă ngă hơkrŭ hăng mơnuih ƀôn sang pơ anai lơ̆m blah ayăt đưm...đĭ rơkĭ, đĭ song nao pơdong tông, pơdơng rơnưh gah yŭ kyâo pơprong, dŏ kơđap pơ anai yơh. Ƀuh rơdêh por lĕ čur amăng pum rum kơđap. Ngă bruă tơgŭ blah ayăt, giong anun truh pơ thun 63, 64 tơgŭ blah ayăt dong mơn, arăng đuăi amat pơ ia, amat amăng rơ-ưng boh pơtâo anai yơh”.

Blan 7 hăng blan 8, bơnga črih ƀơi Bàu Đá Hòa Thịnh ăt dŏ hiam đôč. Ia iom ƀhêm hơmâo, kô̆ hơmâo, kơnin hơmâo mơ̆ng djŏp bơnga čăt amăng ia, hơmâo tom bơnga tơnung ia, bơnga trol glai hăng kơdư dong, pơjing brơi pơ anai anih hiam biă mă, kar hăng mut amăng anih mơyang, pơhrup hiam brơi glai ia dăo Bàu Đá ngă dlưh hơtai boh, pơhưč pran jua. Hăng mơnuih ƀôn sang pơ anai, Bàu Đá jing anih anom hiam, ăt jing anih gru phun đưm hing ang, ăt jing anih hơmâo lu gơnam yơyom: “Kâo lăng anŏ hiam pơ Bàu Đá anai lĕ ñu hơmâo kra, hơmâo akan, hơmâo čim brim, hơmâo phun kyâo bần, bơnga črih...djŏp mơta mơtăm. Pơ anai ngă anih čơkă tuai lĕ hiam biă. Mơ̆ng blan 9 truh pơ blan 10, blan 12 yơh hiam biă mă”.

Amăng lu thun rơgao, mơnuih ƀôn sang plơi Mỹ Điền lăi hơjăn hăng hơdôm boh plơi pla, să iao gah hơdip kơnang kơ akan hơdang mơ̆ng glai rưng ia dăo anai. Ƀu kơnong hnun đôč ôh, hăng anih anom hiam djơh anai, hơmâo lu djuai hlo mơnŏng, glai rưng ia dăo Bàu Đá Hòa Thịnh glăk hơmâo tơlơi gêh găl đĭ kyar bruă čơkă tuai. Ơi Phương Văn Lành, Khua ping gah să Hòa Thịnh brơi thâo, să hơmâo jơlan gah đĭ kyar glai rưng ia dăo Bàu Đá jing anih čơkă tuai hyu ngui nao hrŏm hăng pơgang ayuh hyiăng glai klô: “Tơring čar hơmâo ngă lăng laih bruă ba tuai hyu ngui tui tour hyu sem lăng ƀơi Bàu Đá. Pơ anăp lĕ hơmâo hơdră đĭ kyar čơkă tuai hyu ngui amăng plơi pla tui jơlan akŏ pơdong anom ngă ƀong hrŏm čơkă tuai hyu ngui, laih anun mơnuih ƀon sang pơ plơi Mỹ Điền anai amra jing mơnuih čơkă tuai. Gơñu yơh pô tuah song ba hyu ƀing tuai nao lăng pơ glai ia dăo Bàu Đá, laih anun pơƀuh brơi anih anom, anŏ hiam, anŏ gêh găl pơ glai ia dăo Bàu Đá anai”.

Hòa Thịnh  - anih ia dăo kơtang hlâo adih, mông anai glăk pơplih prong biă. Bruă mơneč mă tơlơi găl či đĭ kyar čơkă tuai hyu ngui ƀơi Bàu Đá ƀu kơnong pok rai tơlơi bơwih ƀong phrâo, pơđĭ tui tơlơi hơdip mơnuih ƀôn sang đôč ôh, ăt jing boh pơkhuă mah djă pioh anŏ hiam hơđăp mơ̆ng glai rưng./.