Plah wah amăng krah adai pơ-iă kơtang, ơi Y Ung Ƀyă, dŏ ƀơi Čuôr, să Ea Mdroh, tơring čar Dak Lak hlăk man pơdong sang. Dua čô mơnuih djru bruă lŭk simăng, trơ̆i pơsơi, bơ ñu pô lĕ pô pơdŭ kơthung simăng ia laih lŭk anun brơi kơ ƀing dŏ man, dŏ klia pơnăng sang. Sang prong rơhaih năng ai 72 met karê hlăk ngă giong tui. Ơi Y Ung brơi thâo, sang anŏ ƀun rin, hơmâo năm čô mơnuih amăng sang, mơ̆ng anai pơ klôn ƀu khin pơmin ôh dưi hơmâo sang kơjăp hơđong. Tơ tă anai, hơmâo khul anom bruă ping gah tơhan kông an să Ea Mdroh djru prăk blơi gơnam man pơdong sang, ơi Y Ung apah mơnuih mă bruă hăng man mă gơñu pô sang tui anŏ kiăng:

“Hơmâo sang lĕ mơak yơh, gir run mă bruă bơwih ƀong huă, čan prăk ƀing adơi ayong phung wang kiăng ngă giong sang. Sang pơdong giong jing sa bruă ngă pơtrut pơsur pran jua bơwih ƀong huă, čem rông ană bă hrăm hră pơar, gir run hrun đĭ tañ pơklaih mơ̆ng ƀun rin”.

Ăt ƀơi ƀuôn Čuôr mơ̆n, sang anŏ ơi Y Đek Êñuôl phrâo đĭ dŏ sang phrâo hiam rô̆, kơjăp phik. Ơi Y Đek hơ̆k mơak, ol kơdol pran jua yua giăm 30 thun laih sang anŏ gơñu dŏ amăng sang tơ̆i, sô laih, bơbung tôl hluh lu bit. Mơ̆ng blan 8 thun hlâo, sang anŏ ñu hơmâo khul sang bruă ping gah să Ea Mdroh ngă hrŏm, nao tơña bla, pơtrut pran jua. Ƀu kơnong djru brơi dua drơi rơmô pioh rông đôč ôh, khul sang bruă ping gah să Ea Mdroh dŏ djru ba 95 klăk prăk man pơdong sang gum pơgôp. Hơmâo laih sang, hơmâo anăp ngă bruă pơđĭ kyar bơwih ƀong huă, ơi Y Đek hơđong yơh pran jua hăng bơwih ƀong huă dăp bruă či ngă kơñ pơgi anai:

“ Kâo čan prăk mơ̆ng ƀing adơi ayong phung wang djru hăng tơgŭ ngă bruă  jak iâu djru man pơdong, blơi mă gơnam či pơdong sang. Ră anai, hơmâo sang hơđong laih, mơak yơh mă bruă bơwih ƀong huă, prăk čan tla tui ƀơƀrư̆, laih anun pơkom pioh man pơdong sang apui, sang huă ƀong hăng sang ia juă glai, laih anun hơmâo djŏ anŏ gêh găl pok pơhư prong đơ đam lŏn či pơdong sang brơi dlông ƀiă dơ̆ng”.

Tui hăng ơi Y Săk Kƀuôr, Khua ƀuôn Čuôr, ƀu kơnong djru sa wơ̆t laih đuăi ôh,  lu khul sang bruă ping gah dŏ lir hơbit, jĕ giăm, tơña bla na nao, krăp lăng, pơtô brơi, pơtruh bruă ĕp mơnuih djru hrŏm hăng juh alum pơtrut pran jua sang anŏ kiăng hơđong na nao tơlơi bơwih ƀong huă. Bruă ngă anai phrâo đôč samơ̆ ba glăi boh tŭ yua rơđah rơđong, djru lu sang anŏ ƀun rin hơmâo anih dŏ hơđong, hrưn đĭ. Ƀuôn Čuôr ră anai, hơmâo 370 boh sang anŏ, samơ̆ giăm 100 boh sang anŏ ƀun rin hăng giăm ƀun rin, ơi Y Săk Kƀuôr čang rơmang:

“Mơ̆ng hơbô̆ bruă hơmâo lu sang bruă, mơnuih gum hrŏm, mơnuih ƀôn sang hơmâo yơh jơlan gah pơđĭ kyar, arăng djru rơmô rông, djru man pơdong sang, ngă kơjăp tơlơi đăo kơnang, pran jua gir run kiăng mơnuih ƀôn sang tơgŭ mă bruă bơwih ƀong huă hur har hloh. Čang rơmang pơ anăp adih, amra hơmâo dơ̆ng lu tơlơi djru ba, ngă hrŏm hrup anai kiăng kơ djop sang anŏ ƀun rin tơnap tap hơmâo anŏ gêh găl găn rơgao tơlơi tơnap tap, pơđĭ kyar bơwih ƀong huă”.

Hăng rơbêh 7000 boh sang anŏ, amăng anun truh 900 boh sang anŏ ƀun rin hăng giăm ƀun rin, kiăng dưi ngă djop tơhnal pơkă truh thun 2030 ƀu hơmâo sang anŏ ƀun rin dơ̆ng tah, tui hăng Hră pơtrun mơ̆ng Ping gah tơring čar Dak Lak, să ea Mdroh ƀu kơnong tơguan tơlơi djru đôč ôh. Tơdơi kơ pơmut glăi tơring čar hăng djop sang bruă kơnuk kơna dua gưl, Ping gah să hơmâo sem lăng hơbô̆ bruă “Rim grup ping gah ngă hrŏm sang anŏ mơnuih ƀôn sang pơklaih ƀun rin”, jak iâu pơtum lu khul, sang bruă ăt lir hơbit djru ba rim sang anŏ, pơsir hĭ tơlơi tơnap tap, pơtô brơi pơđĭ kyar, ĕp jơlan hơdră bơwih ƀong huă laih anun ĕp mơnuih djru ba gơnam tam hăng hrơi bruă.

Tơdơi kơ sa thun, hơbô̆ bruă anai hơmâo pok pơhai ngă tui ƀơi 4 khul ping gah, djru brơi man pơdong dua boh sang tơ̆i, ngă tui hơdră djru brơi jơlan gah tơlơi bơih ƀong huă kơ sang anŏ ƀun rin. Ơi Nguyễn Văn Bông, Kơ-iăng khua ping gah să Ea Mdroh brơi thâo, să anai anăp nao akŏ pơjing bruă mă pioh kơ rim ping gah amra jing anih ưh gơnang kơ mơnuih ƀôn sang.

“Tơlơi čang rơmang prong hloh ƀu djơ̆ lăi ƀing ta djru hơdôm prăk ôh, hơdôm boh sang, hơdôm drơi rơmô ôh dŏ jing tơlơi đăo kơnang brơi kơ mơnuih ƀôn sang mơnuih djuai ƀiă thâo hluh rơđah, ƀu hơmâo hlơi lui hĭ dŏ glăi gah klôn ôh laih anun hơmâo na nao mơnuih djru bruă amăng să, plơi pla gum hrŏm. Laih dơ̆ng djru kơ mơnuih mơnuih ping gah, khua mua nao tơl sang, jĕ giăm hăng mơnuih ƀôn sang biă mă, thâo hluh mơnuih ƀôn sang hloh”.

Tơdơi kơ boh tơhnal blung a, ping gah să Ea Mdroh glăk prăp lui pơƀut bruă mă tui hơdôm hơdră bruă hơmâo pok pơhai laih anun kiăng ngă djơ̆ hăng pok pơhư prong tui ƀơi lu sang hră, hăng čang rơmang ngă bang bơngač pran thâo pơdjru nao rai amăng tơlơi hơdip mơda mơnuih ƀôn sang ƀơi plơi pla.