Sa tơlơi phrâo ƀuh rơđah amăng Hră pơtrun anai lĕ pơ blih mơ̆ng tơlơi pơkă brơi sem lăng hlâo kơ ngă hră pơar truh pơ bruă sem glăi tuč rơnuč kơnong sa wơ̆t đôč, laih dơ̆ng pơpha tơlơi dưi mă bruă, ngă brơi hră pơar pơsit gru kơnăl anăn pơkă anih pla, ngă hmua hăng sang bruă pô pơdưm amăng kơđung, hruh ba sĭ mơdrô gơnam boh troh đang hmua, jao kơ Jơnum min mơnuih ƀôn sang gưl să ngă brơi. Tui hăng anun, djop sang bruă, sang anŏ mơnuih ƀôn sang hăng sang bruă mơdrô khom čih pơhaih lăi pơthâo hăng glăm ba tơlơi pơhing pơhaih anun tơpă hă ƀô̆, djop hă aka; gong gai plơi pla amra ngă tui bruă git gai wai lăng, dưi pơsit hăng măi glăi hră pơsit ƀudah jao glăi anăn gru mrô hơmâo pơsit tui tơlơi phiăn pơkă.

Hăng kual ngă hmua pla dơnong kơ  boh durian (sầu riêng) đôč ƀơi kual Dap kơdư, jơlan hơdră phrâo anai, sa tơlơi čang rơmang djru pơsir brơi tơlơi tơnap tap lơ̆m rơkâo ngă brơi gru kơnăl anăn sĭ mơdrô hăng mrô, pioh ba nao pơ tač rơngiao. Hrơi blan pơsir brơi ngă hră pơar anun pơhrŏ hĭ ƀiă hloh. Hăng djop sang bruă, khul grup, sang anŏ mơnuih ƀôn sang ƀu čih anăn rơkâo ba nao sĭ mơdrô pơ tač rơngia, hrơi blan pơsir brơi hră pơar mơ̆ng 14 hrơi hlâo adih trun dŏ 3 hrơi đôč giong yơh; tơdah či ba sĭ gơnam tam boh troh mơ̆ng đang hmua, ba nao pơ dêh čar arăng kiăng hơmâo anăn gru mrô pơsit anih pla lĕ, hrơi mông ngă brơi hră hrŏ trun dŏ 10 hrơi giong yơh.

Ơi Vũ Đình Cường, Kơ-iăng khua Gơnong bruă Đang hmua hăng Ayuh hyiăng tơring čar Lâm Đồng lăi lĕ, Hră pơtrun 36 mơ̆ng ping gah sang bruă kơnuk kơna pơtrun le djơ̆ găl hăng anŏ či kiăng bruă mă rim hrơi, biă mă ñu tơlơi pơtrun pơkă kơ đơ đam anih pla, ngă gêh găl brơi hơdôm blah đang hmua, pla plah wah, amăng anun phun pla phun juăt ba nao sĭ mơdrô pơ tač rơngiao.

“Tơdơi kơ Hră pơtrun 36 ping gah anom bruă kơnuk kơna pơtrun, tơring čar lâm Đồng git gai djop plơi pla, anom bruă, sang bruă brơi kơsem min hơdôm tơlơi pơkă phrâo pioh pok pơhai ngă tui. Hră pơtrun dưi čih pơkra djơ̆ găl, pơsir lu tơlơi dŏ gun mơ̆ng anai pơ klôn adih, biă mă ñu hăng kual ngă hmua pla pơjing ƀu khă pơgăn đơ đam lŏn či pla hăng đơ đam lŏn hmua pla plah wah lu pơjeh phun pla hrŏm sa blah đang hmua pioh ba sĭ mơdrô pơ tač rơngiao”.

Kơ-iăng khua ding jum Ngă hmua hăng ayuh hyiăng ơi Nguyễn Hoàng Hiệp lăi pơtong, kiăng kơ jơlan hơdră dưi ngă tui Hră pơtrun 36 mơ̆ng kơnuk kơna, mut tơma amăng tơlơi hơdip mơda sit nik, djop tơring čar khom dăp akŏ bruă hlâo či pok pơhai, djru ba djop să pơtô hrăm brơi, ngă tong ten čih pioh mrô rơnoh jŭ yap anih ngă hmua pla pơjing, sang bruă sĭ mơdrô pơkra ming dưm amăng kơdung, hruh gơnam sĭ mơdrô, khom pel ĕp, krăp lăng hăng pơtô brơi thâo rơđah. Bruă pơmut čih anăn mrô ngă hră pơar pơsỉ mrô gru anăn gơnam ƀu kơnong ngă pơtrun rơnoh prăk pơplai, hrơi blan rô nao rai kơ mơnuih ngă hmua, sang bruă mơdrô đôč ôh, dŏ pơđĭ tui boh tŭ yua bruă tơlơi tơpă hnơ̆ng, glăm ba amăng ruăi djru brơi pơdŭ pơgiăng hyu gơnam sĭ mơdrô boh troh đang hmua.

“Rơkâo djop tơring čar pơtum hyu pơtô lăi kiăng bơtŭ ư hĭ sa hnơ̆ng či ngă bruă. Boh yom phun phrâo tal anai jing bruă glăm ba mơ̆ng rim sang bruă, anom bruă; bruă glăm ba mơ̆ng rim pô ngă khua apăn bruă, mơnuih ƀôn sang gum hrŏm čih anăn rơkâo kiăng hơmâo gru anăn pô kơ gơnam sĭ mơdrô, ăt pơhaih rơđah rơđong soh. Ngă brơi anăn gru hăng mrô pơsit anih ngă hmua pla pơjing tal anai hơmâo ngă tui abih bang akŏ klôn kơ bruă pơhaih jŭ yap hăng glăm ba bruă mă djơ̆ tơlơi phiăn pơkă mơ̆ng rim sang anŏ mơnuih hơmâo gơnam sĭ mơdrô”

Hăng kual Dap Kơdư-kual lŏn pla boh durian sầu riêng prong hloh amăng dêh čar ta, Hră pơtrun 36 mơ̆ng Kơnuk kơna jing sa tơlơi dŏ čang rơmang prong hloh, kah hăng pran jua kơtang pok brơi jơlan kơ anih pla boh troh đang hmua ngă djơ̆ tơhnal pơkă hiam, pơđĭ tui tơlơi pơhno kơtang, akŏ pơjing bruă čih anăn tong ten ngă pô boh durian Việt Nam (Sầu riêng Việt Nam) amăng anih anom sĭ mơdrô jar kmar, laih dơ̆ng pok brơi anŏ gêh găl pơđĭ kyar hơđong kơjăp hloh brơi kơ mơnuih ngă hmua hăng sang bruă mơdrô.