Thun hrăm anai, amôn Nguyễn Ngọc Minh Tâm dŏ ƀơi plơi Brang, să guai dêh čar či Ia Puč, mut hrăm anih 7. Anai lĕ tal blung ñu ataih mơ̆ng sang anŏ, dŏ glăi amăng sang hră hrăm hăng ƀong huă laih anun rơnuč hrơi kom đôč dưi glăi pơ sang čuă amĭ ama. Thun hrăm phrâo, yak nao amăng anih hrăm phrâo mơ̆n, anŏ gêh găl hrăm hră, dŏ glăi ƀong huă, đih đŏm, ngui ngor, pơtop rơjang drơi jăn hiam hloh mơ̆n, anun ngă kơ amôn Tâm mơak hloh pran jua ñu.

          “Kâo hơ̆k mơak biă mă mut thun hrăm phrâo, dưi hrăm lu mơta tơlơi hăng anŏ hrăm phrâo, anih dŏ phrâo, hrăm lu mơta tơlơi či hrăm tong ten. Sit ƀu thâo hluh tơlơi hrăm, kâo nao tơña ƀing nai mơtam huăi tơguan truh hrơi tơdơi ôh. Rơngiao kơ mông hrăm, ƀing gơmơi ngui ngor rơjang drơi jăn, nao pơđok hră ƀơi anih dưm hơdrôm hră pơđok kiăng hơduah ĕp hrăm lu hloh gah rơngiao. Či tlam lĕ pah blâo mơnŭ, pah peng peng, čưng boh lông. Anun lĕ mông mơnit ngui ngor mơak biă mă”.

Hrŏm hăng tơlơi hơ̆k mơak mơ̆ng čơđai sang hră, tơlơi h’ĭn pran jua mơ̆ng ƀing amĭ ama huăi bơngơ̆t lu mơta tơlơi, yua čơđai muai ană bă dưi mut hrăm amăng anih hrăm kơnuk kơna čem rông ba hơđong.

          Thun hrăm anai, abih dua čô ană bơn Rmah Ka, djuai ania Jarai, plơi Čư̆ Kŏ, să Ia Puč, lêng kơ mut hrăm sang hră đôm lăm soh. Rơkơi bơn anun, ngă kông ñơn soh, reh kơtăk kơsu, juăt tơgŭ mơ̆ng mơguah sing bring, mlam mơmŏt laih anun pơwơ̆t glăi truh pơ sang, ƀu hmao mông ba nao ană bă hrăm hră ôh. Bơyan ngă hmua, pla pơjing, hơjan hlim prong, jơlan rô nao rai tơdlut tơbor, ăt tơnap tap ƀu hmao mông ba na ană bă hrăm hră, anun ñu lui ană pơdơi hrăm hră dŏ soh sel pơ sang đôč.

          Ră anai, lơ̆m ƀing ană bă dưi huă ƀong, hrăm hră sa anih amăng sang hră mơ̆ng hrơi sa truh hrơi năm sa wơ̆t hrơi tơjuh mơtam. Rơkơi bơnai bơn Rmah Ka huăi tơnap kơ bruă nao tŭ, pơgiăng ană bă nao sang hră dơ̆ng tah rim hrơi, ƀing ană bă ăt huăi pơdơi hrăm hră lơi yua kơ tơlơi tơnap tap mơ̆ng sang anŏ hrup hăng mơ̆ng anai pơ klôn adih.      “Bơni kơ Ping gah hăng Kơnuk kơna hơmâo man  pơdong sang hră đôm lăm hiam rô̆. Mơ̆ng anai, pơ anăp adih, ƀing ană bă gơmơi dưi hrăm hră, dŏ glăi huă ƀong, ngui ngor amăng sang hră soh đôč, rơnuč hrơi kkm kah mơ̆ng glăi. Kâo mơak pran jua biă ”.

          Sang hră đôm lăm dua gưl, gưl sa hăng gưl dua Ia Puč thun hrăm anai hơmâo 752 čô čơđai sang hră, pơpha hrăm amăng 23 boh anih. Kiăng amĭ ama ƀing čơđai sang hră thâo hluh tong ten bruă ngă hrŏm amăng sang hră, anih hrăm phrâo mơ̆ng rơnuč thun hrăm 2025-2026 laih, să Ia Puč ngă hrŏm dua boh sang hră gưl sa hăng gưl dua amăng să, akŏ pơjing sang hră dua gưl. Hơdôm blan pơdơi prong, bruă iâu pơmut čơđai sang hră, dăp bruă kơ ƀing nai pơtô, dăp anih hrăm, anih dŏ, sang huă ƀong hăng djop bruă mă pơtô hrăm hơmâo pok pơhai sa amăng plĕ.

          Nai Trương Duy Hồng, pơtô amăng sang hră anai brơi thâo, bruă ba yua sang hră đôm lăm kiăng hơmâo ƀing nai thâo pơblih hơdră git gai wai lăng čơđai sang hră. Nai pơtô pơdưm anăn amăng khul Zalo, jơnum hăng pơčrong sai hăng djop sang anŏ amĭ ama čơđai sang hră kiăng thâo tong ten tơlơi pơhing ană bă dŏ dong ƀong huă, hrăm hră pơar.

          “Ƀing nao neh pơtô wai lăng anih hrăm hơmâo jơnum hăng amĭ ama čơđai sang hră, mơ-it tơlơi pơhing kơ amĭ ama čơđai sang hră kiăng pơčrong sai hơdră đôm lăm hăng ƀing čơđai dŏ glăi yang hrơi dong. Lu amĭ ama čơđai sang hră h’ĭn pran jua mơ̆n. Yua kơ gơñu thâo hluh laih hơbô̆ sang hră phrâo, sang hră prong, hơmâo djop anŏ gêh găl mă bruă, ba yua, ngui ngor, ƀong huă, pơdơi pơdă, pit đih rơnuk rơnua”.

 Hrŏm hăng sang hră đôm lăm dua gưl să Ia Puč, thun hrăm 2026-2027, kual gah yŭ tơring čar Gia Lai dŏ hơmâo 6 boh sang hră ngă tui hơbô̆ djơh hăng anai mơ̆n ba yua laih, čơkă čơđai sang hră ƀơi hơdôm să ƀơi guai dêh čar. Djop ring bruă hơmâo man pơdong mơ̆ng blan 11/2025, truh ră anai hơmâo ngă giong laih djop tơhnal pơkă phun, bơwih brơi kơ bruă pơtô hrăm, dŏ glăi ƀong huă, đih pit. Abih bang 7 boh sang hră iâu pơmut 6.800 čô čơđai sang hră, lu kơ čơđai sang hră kơnuk kơna čem rông ba dŏ glăi pơ sang hră hlao, hơdôm dŏ glăi ƀiă lĕ dŏ glăi amăng tơhrơi đôč.

          Anai lĕ anŏ pơblih lăp đing nao biă mă hăng kual giăm guai gah yŭ Gia Lai, anih hơmâo năng ai 90 km jơlan guai dêh čar, hơmâo lu mơnuih ƀôn sang djuai ƀiă dŏ hơdip mơda, tơlơi rô nao rai dŏ tơnap tap, bruă hrăm hră pơar bưp lu tơlơi gun biă mă. Hăng hơbô̆ bruă phrâo, čơđai sang hră ƀu kơnong hơmâo anih hrăm hiam klă, phrâo phrĕ đôč ôh, dŏ hơmâo anih dŏ, sang huă ƀong, sang pioh pơđok hră phara mơ̆n, anih ngui ngor pơkơjăp drơi jăn hăng anih ngui gah rơngiao hơmâo djop soh. Yom hloh dơ̆ng lĕ, bruă hrăm hră dưi pơgang pioh hơđong, huăi rơngiă mông amĭ ama pơgiăng nao rai pơ sang hră.

          Ơi Phạm Văn Nam, Khua Gơnong bruă Pơtô hăng Pơjuăt tơring čar Gia Lai brơi thâo, djop sang hră đôm lăm anun amra djru hrŏm ngă plai ƀiă anŏ pleh ploh bruă pơtô hăng pơhrăm amăng kual giăm guai dêh čar hăng anih hơmâo tơlơi gêh găl hloh, laih dơ̆ng pơtô hrăm kiăng hơmâo mơnuih mă bruă kơ dêh čar dĭ da gla kơñ.

“Sang hră đôm lăm dua gưl ƀơi djop să giăm guai yom phăn biă mă. Ƀing čơđai sang hră dưi hơmâo kơnuk kơna čem rông, ƀing nai pơtô lăng ba tong ten, pơtô ba pơčrâo brơi klă hloh kiăng thâo hluh, pơblih tơlơi pơmin amăng bruă mă. Yua mơ̆ng hơdôm sang hră anun yơh, pơtô hrăm brơi mơnuih mă bruă thâo rơgơi tơdơi anai, djru mă bruă kơ plơi pla pô, pơtrut tơlơi bơwih ƀong huă pơđĭ kyar hloh”.

Mơ̆ng bơyan mut thun hrăm phrâo anai, čơđai sang hră pơ kual gah yŭ tơring čar Gia Lai pơphun mut hrăm hră, dŏ glăi ƀong huă amăng sang hră hăng pơtop rơjang drơi jăn pô djơ̆ sa găl hloh. Sang hră đôm lăm phrâo ƀu kơnong pơblih anŏ gêh găl hrăm hră ră anai đôč ôh, dŏ jing anih pơtrut tui, kah hăng pơtĕm brơi ačăng kiăng thâo por nao pơ anăp adih dĭ da gla kơñ kơ čơđai muai ană amôn ƀơi kual giăm guai dêh čar.