Kiăng ngă tui hăng djru hrom lăi pơthâo hơdrôm hră anăn “Khut khăt, sơ̆n pran jua pơkơdong glăi tơlơi soh sat ƀong kông ngăn, kiăng djru akŏ pơdong Ping gah hăng kơnuk kơna jai hrơi tơpă, rơgoh, kjăp kơtang” mơ̆ng Khua git gai ping gah ơi Nguyễn Phú Trọng pô čih, djop gưl anom bruă ping gah amăng sang bruă tơdăm dra mut phung, hlăk ai amăng Khul anom bruă gơnong dlông dêh čar, tlam lơ 13/3 ƀơi Hà Nội, Khul khua mua git gai bruă hlăk ai amăng anom bruă kơnuk kơna gah gơnong dlông jơnum anăn “Hlăk ai amăng khul anom bruă gơnong dlông khut khăt, pơkơdong glăi tơlơi soh sat ƀong kông ngăn”.

Ƀơi mông jơnum, Kơ-iăng Khua Sang hră hrăm bruă kơđi čar dêh čar Hồ Chí Minh ơi Lê Văn Lợi lăi rơđah, anai lĕ, mông jơnum pơčrông sai boh thâo ia rơgơi hơmâo lu khul hlăk ai tơdăm dra mut phung ƀơi Gơnong dlông ngă hrom kiăng khut khăt pơgăn tơlơi soh sat ƀong kông ngăn. Lu hră čih lăi pơthâo amăng mông jơnum, lăi nao kah hăng: Thâo krăn tơlơi či ngă soh ƀong kông ngăn, mă prăk la laih anun khom khut khăt pơgăn mơtam tơlơi soh sat anun kiăo tui Ping gah kơnuk kơna pơtrun hăng pok pơhai brơi ngă tui ƀu dưi pơkơđai glăi ôh.

Ngă pơrơđah hơdôm bruă ngă tum teč pơgôp pran jua mơ̆ng hlăk ai amăng Khul anom bruă kơnuk kơna ƀơi gơnong dlông kiăng pơhlôm, pơgang tơlơi soh sat ƀong kông ngăn thun blan rơgao. Mơ̆ng anun, rơkâo đĭ hơdră či pơphun mă bruă kơtưn hloh tơlơi glăm ba, tơlơi gơgrong mơ̆ng hlăk ai amăng Khul djop anom bruă gơnong dlông khom lăi ƀu dong yua ôh tơlơi soh sat ƀong kông ngăn.