Amăng anun, hơmâo ngă tui tal pơplông gum tơngan hrŏm ruh pơkra glăi sang dŏ jang jai, sang tơ̆i phŏ, hăng bruă pơtrut pơsur man pơdong phrâo 12 boh sang, djru brơi 160 hrơi mă bruă, abih tih nua ñu rơbêh 800 klăk prăk; pơphun giăm hơdôm rơtuh wŏt ngă bruă amăng hrơi tơjuh mơtah, hrơi djru man pơdong plơi pla phrâo pơhưč giăm 13.500 čô hlăk ai mut hrŏm.

Laih dong, djop gưl khul hlăk ai tơring čar Lâm Đồng hơmâo hmao tlôn akŏ pơjing 137 grup hlăk ai djru mơnuih mơnam “Pơtô ba yua boh thâo phrâo”, djru brơi giăm 10.000 čô mơnuih ƀôn sang thâo yua boh thâo phrâo. Khul pơphun ngă bruă hlăk ai tơring čar Lâm Đồng brơi thâo,  amăng thun 2025 amra pơphun ƀiă biă mă ñu 4 wŏt đing nao man pơdong plơi pla phrâo hăng hrơi tơjuh mơtah kiăng pơphun na nao tui tơđar, yôm phăn hăng djơ̆ rĭm wŏt pơphun.