Anih pơtô hrăm maketing yua Khul pơlir anom bơwih ƀong hrŏm tơring čar Dak Lak pơphun ƀơi anih pơdă prưng mơtăm, lăi pơthâo gơnam tam mơng hơdôm anom bơwih ƀong hrŏm. Ƀing mơnuih ngă hmua juăt laih hăng bruă ngă đang hmua, ră anai hrăm tut amăng măi telephôn rơgơi. Ƀing gơñu ruah anŏ pơƀuh tui tơlơi hor, phĭn rup gơnam tam laih dong čih lăi pơthâo gơnam. Rơnuč lĕ dưm amăng plang sĭ mơdrô điện tử. Mut hrŏm anih pơtô hrăm, ayong Lê Văn Việt, ding kơna anom bơwih ƀong Bazan, tơring glông Krông Pač, tơring čar Dak Lak brơi thâo:

“Plang mơnuih mơnam hăng sĭ mơdrô điện tử ră anai glăk hơmâo lu mơnuih yua, jing tơlơi juăt ƀuh yơh. Tơdah ƀing ta ƀu mut hrŏm tơlơi yak nao phrâo anai ƀing ta amra dŏ glăi gah tlôn. Bruă anom bơwih ƀong hrŏm mut hrŏm yua plang mơnuih mơnam ƀudah sĭ mơdrô điện tử amra jing tơlơi dưi prong brơi kơ anom bruă. Yua anai lĕ anih pơƀuh brơi mơnuih blơi yua amăng plang mơnuih mơnam hluai tui mơnuih biă, bruă biă, gơnam biă mơn”.  

Ơi Thân Cư, kơ-iăng khua anom bơwih ƀong hrŏm gah ngă hmua bơkơnar Čư Dlê Mnông, tơring glông Čư̆ Mgar, tơring čar Dak Lak brơi thâo, anom bơwih ƀong akŏ pơjing thun 2012. Truh ră anai, anom bruă hơmâo 114 čô ding kơna, hăng rơbêh 230 ektar đang kơphê, tiu, sầu riêng. Tơdah hlâo adih, anom bơwih ƀong hrŏm juăt sĭ mơdrô pơjeh phun pla, ia jrao, kmơk, djru boh thâo pla pơjing djru neh met wa hơmâo gơnam djơ̆ hơnong pơkă, ră anai ƀing gơñu hơmâo dong bruă phrâo, jing ƀing mơnuih mut hrŏm pơlir rơnoh yôm, pơlir pla pơjing hăng sĭ mơdrô, lăi pơthâo anăn apăn sĭ mơdrô gơnam mơng ƀon lan. Bruă mă yua boh thâo phrâo amăng lăi pơthâo gơnam tam hơmâo djru brơi anom bruă ba gơnam sĭ mơdrô tañ ƀiă hăng pok prong. Ơi Thân Cư brơi thâo:

“Ƀing ta kiăng hrưn đĭ amăng bruă pla pơjing rah, pơlir yua boh thâo 4.0, thâo sĭ mơdrô gơnam tam, ĕp anih anom sĭ mơdrô, marketing kiăng sĭ mơdrô lu anih kiăng arăng thâo gơnam mơng ƀing ta hiam hơdjă hă ƀŭ. Tơdah ngă klă mơ̆ ƀu pơlăi nao rai, ƀu thâo tơlơi pơhing amra ngă tơnap tap biă mă”.

Ơi Phạm Thanh Tuấn, nai pơtô Jơlan hơdră pơphun bơwih ƀong pơplih pơčeh phrâo dêh čar, mơnuih mut hrŏm črâo brơi mơnuih ƀôn sang Dak Lak tŭ mă hơdôm plang mơnuih mơnam, sĭ mơdrô điện tử hăng plang internet kiăng ĕp mơnuih blơi gơnam tam brơi thâo: Pơplih yua boh thâo phrâo lar hyu tơl đang hmua, rĭm tơngan mơnuih ngă hmua. Pơplih yua boh thâo phrâo ba glăi tơlơi pơmĭn phrâo, tơlơi ngă bruă phrâo amăng pơphun bơwih ƀong, wai lăng hăng amăng bruă pơjing anăn apăn sĭ mơdrô.

“Ră anai mơnuih blơi yua ƀơƀrư̆ đăo gơnang nao ƀing mơnuih pla pơjing gơnam tam, kơnong ƀing gơñu thâo hluh rơgao tơlơi sit nik ƀơi đang hmua. Yua sui thun ngă hmua ƀing gơñu jing ƀing rơgơi, hluh rơđah gơnam pla pơjing. Dua dong lĕ amăng pơplih tơlơi pơmĭn mơng mơnuih ƀôn sang, ƀing gơñu ƀu kiăng bơnah tal 3 kiăng blơi pơhrui gơnam tam mơng gơñu dong tah. Tơdah sui mơng anai 5 thun mơ̆ lăi neh met wa sĭ gơnam amăng plang internet ƀudah livestream, laih dong pơlir hăng mơnuih blơi yua amăng rŏng lŏn tơnah ƀu gơñu ƀu gưt ôh. Samơ̆ ră anai glăk ƀơƀrư̆ jing tơlơi juăt laih”.

Tui ơi Lê Văn Dần, Kơ-iăng Khua khul pơlir anom bơwih ƀong hrŏm tơring čar Dak Lak, amăng hrơi mông bruă sĭ mơdrô glăk bơkơtưn ră anai, hrŏm hăng bruă pơplih phrâo bruă pla pơjing, hơdôm anom bruă ăt pơtrut yua boh thâo phrâo amăng lăi pơthâo, blơi pơhrui gơnam amăng plang sĭ mơdrô điện tử. Amăng hrơi blan rơgao, Khul pơlir anom bơwih ƀong hrŏm tơring čar hơmâo pơphun lu tal pơtop hrăm kơ bruă sĭ mơdrô amăng plang internet, pơđĭ kyar anăn apăn sĭ mơdrô, pơjing rup rap anom bơwih ƀong sĭ mơdrô. Pơ anăp anai, Khul pơlir anom bơwih ƀong hrŏm amra tŏ tui pơphun hơdôm tal pơtô hrăm dơlăm tui hơdôm bruă phara kiăng lăp djơ̆ tơlơi rơkâo pơđĭ kyar anih anom sĭ mơdrô. Ơi Lê Văn Dần brơi thâo:

“Tŏ tui pơtô hrăm brơi lu anih kiăng hơdôm anom bơwih ƀong hrŏm dưi tŭ mă hơdôm boh thâo kơ bruă sĭ mơdrô điện tử mơng AI, tơdơi anun hơdôm anih pơtô hrăm dơlăm brơi rĭm gơnam tam. Yua rĭm gơnam tam amra hơmâo hơdră pơmut sĭ amăng plang điện tử phara. Kiăng hơdôm anom bơwih ƀong hrŏm ăt dưi lăi pơthâo hăng sĭ mơdrô online hluai tui hơdôm plang internet ră anai. Sit biă ñu lĕ djru brơi hơdôm anom bơwih ƀong hrŏm ƀơi kual ataih, asuek dưi ba hyu gơnam sĭ mơdrô”.

Hơdôm tơlơi gir run pơplih yua boh thâo phrâo mơng hơdôm anom bơwih ƀong hrŏm ƀơi tơring čar Dak Lak glăk pơgôp ngă gêh gal brơi bruă wai lăng, djru pơhrŏ trun prăk tuh pơ alin, đĭ tui tơlơi kmlai brơi hơdôm anom bơwih ƀong hrŏm. Sit biă ñu, mă yua boh thâo phrâo amăng lăi pơthâo gơnam tam glăk pok rai lu tơlơi dưi phrâo, anih sĭ mơdrô phrâo, đĭ tui nua hăng pơjing anăn apăn sĭ mơdrô gơnam tam mơng Dak Lak./.