Lơ 25/08/2024, ƀơi plơi prong Đà Lạt, tơring čar Lâm Đồng, Khua dêh čar ơi Phạm Minh Chính git gai Jơnum pơhlôm rơnuk rơnua hơđong pioh kơ pơđĭ kyar bơwih ƀong – mơnuih mơnam hơdôm bôh tơring čar kual Dap Kơdư. Jơnum đing nao bơkơtuai bruă wai lăng rơnuk rơnua, hơđong pioh pơtrut pơđĭ kyar bơwih ƀong – mơnuih mơnam amăng kual.

Klah čun amăng mông jơnum, Khua dêh čar ta ơi Phạm Minh Chính pơtŏng sit, Dap Kơdư lĕ anih anom ngă bruă yôm phăn gah bơwih ƀong, bruă kơđi čar, rơnuk rơnua plơi pla, pơgang lŏn ia hăng anih anom glai klô mơ̆ng lŏn ia. Ping gah, Kơnuk kơna, ƀing Khua git gai Ping gah găn rơgao hơdôm rơnuk lăng ba na nao, pioh pran jua yôm phăn kơ tơlơi pơđĭ kyar hăng hơđong mơ̆ng Dap Kơdư. Khua dêh čar ta lăi rơđah, đing nao hloh lĕ mơnuih ƀôn sang khom hmâo tơlơi hơdip mơda trơi pơđao; phun ñu mơ̆ng bruă pơgang rơnuk rơnua plơi pla, hơđong lĕ tơlơi hơdip mơda gơnam tam, pran jua mơ̆ng mơnuih ƀôn sang ƀu pơdơi pơplih phrâo.

Khua dêh čar ơi Phạm Minh Chính rơkâo đing nao ngă tui 6 bruă jao phun, djă pioh kơjăp tơlơi rơnuk rơnua plơi pla, hơđong Dap Kơdư pioh djru pơđĭ kyar bơwih ƀong – mơnuih mơnam; pơsir tơlơi lŏn dô̆, lŏn ngă đang hmua; pơsit pran jua sut lui sang dô̆ tơ̆i rơ̆i, ƀu lui lơi hlơi gah tlôn; pơsir tơlơi đuăi hyu dô̆ hơdơ̆ či hor; pơjing bruă bơwih ƀong huă; pơplih bruă mă kơ neh wa djuai ania ƀiă.

Lơ 23/6/2024, ƀơi prong Đà Lạt, tơring čar Lâm Đồng, Kơ-iăng Khua dêh čar ơi Trần Lưu Quang git gai jơnum Khul pơpha bruă mă amăng kual Dap Kơdư tal klâo hăng pôr pơthâo bruă pơkă hơnơ̆ng kual Dap Kơdư mơ̆ng thun 2021-2030, lăng nao pơ thun 2050.

Ƀơi mông jơnum, khua mua 5 boh tơring čar kual Dap Kơdư hơmâo lăi pơthâo tơlơi pơhing ngă tui Hră pơtrun mrô 23-NQ/TW kơ pơđĭ kyar bơwih ƀong huă mơnuih mơnam hăng pơgang rơnuk rơnua lŏn ia amăng kual Dap Kơdư truh thun 2030, lăng nao pơ thun 2050. Lu tơlơi pơgôp hiăp lăi lĕ, tơdơi kơ sa thun ngă tui Hră pơtrun, tơlơi thâo hluh mơ̆ng djop gưl anom bruă, boh nik ñu djop tơring čar amăng kual jai hrơi đĭ hloh; lu črăn bruă dŏ gun hăng pok pơhai brơi pơđĭ kyar djơ̆ anŏ gêh găl amăng kual hăng rim kơ tơring čar kiăng pơđĭ tui anŏ tŭ yua; dưi ngă boh tơhnal yom anai , jing sa bruă mă đing nao hlom bom amăng djop bruă. Klah čun ƀơi mông jơnum, Kơ-iăng khua dêh čar ơi Trần Lưu Quang rơkâo kual Dap Kơdư ăt djă pioh djop mơta gru grua đưm mơ̆ng djuai ƀiă, djă pioh tơlơi gum pơgôp; pơblih phrâo tơlơi pơmin bruă mă  kiăng pơđĭ kyar. Hrŏm hăng anun, đing nao čuk pơkra jơlan glông pơtruh nao rai, pơđĭ kyar bruă tuai čuă ngui, tui ruăi ngă hrŏm, kah pơpha kiăng pơhưč ƀing tuai hyu ngui, anom bruă sĭ mơdrô tuh pơ alin, kiăng pơjing pran kơtang, tơlơi đăo kơnang kơ mơnuih ƀôn sang hăng anom bruă sĭ mơdrô.

Thun 2024, hơdôm bôh tơring čar amăng kual Dap Kơdư hmâo laih hơdôm bôh tơhnal lăp djă pioh; lu tơhnal ba tơbiă jing gru rơđah amăng glông jơlan pơđĭ kyar kual; hơdôm bruă mă bôh thâo đưm, mơnuih mơnam, pơgang lŏn ia, rơnuk rơnua plơi pla, hơđong mơnuih mơnam dưi djă pioh kơjăp. Ba jơlan hlâo lĕ tơring čar Kon Tum, rơnoh đĭ kyar GRDP him lăng hmâo 8,2% bơhmu hăng thun hlâo; dŏng ƀơi ha mơkrah amăng glông dưm dăp rơnoh đĭ kyar bơwih ƀong mơ̆ng đơ đam dêh čar. Abih bang gơnam amăng tơring čar hmâo 38.000 klai prăk, prăk pơhrui glăi mơ̆ng gơnam sĭ kơ dêh čar tač rơngiao rơbêh kơ 406 klăk dolar Mi, đĭ rơbêh 13% bơhmu hăng thun hlâo. Kiăo tui anun lĕ tơring čar Dak Nông, hăng 7/11 ƀut tơhnal ba tơbiă ngă giong hăng hloh kơ kơčăo bruă. Biă ñu, pơhrui hơnong ñu sa akô̆ mơnuih mơ̆ng tơring čar hmâo rơbêh kơ 81 klăk prăk. Anai lĕ yak kơdưt tañ, djru Dak Nông hrưn đĭ dŏng tal 43 amăng mrô 63 bôh tơring čar, ƀôn prong amăng đơ đam dêh čar.  

Thun 2024, lăp djă pioh ƀơi tơring čar Gia Lai lĕ mrô sang anô̆ ƀun rin hrŏ trun rơbêh kơ 6% hloh kơ kơčăo bruă ba tơbiă. Pơhrui ngăn drăp ƀơi tơring čar năng ai ñu 5.890 klai prăk, hloh kơ rơnoh pơkă mơ̆ng Dêh čar hăng Khul Khua pơ ala mơnuih ƀôn sang tơring čar jao, đĭ giăm truh 5,1% bơhmu hăng thun hlâo. Lơm anun, tơring čar Dak Lak hmâo 12/16 tơhnal ba tơbiă hăng hloh kơ kơčăo bruă. Amăng anun, pơhrui ngăn drăp him lăng hmâo 8.500 klai prăk, GRDP hơnong ñu sa akô̆ mơnuih hmâo 72,8 klăk prăk, abih bang prăk pơhrui glăi mơ̆ng gơnam sĭ kơ dêh čar tač rơngiao hmâo 1 klai 650 klăk dolar Mi.

Klah čun ngă tui Tơlơi pơtrun pơsit mrô 18 mơ̆ng Grŭp mă bruă Ping gah tơring čar tal XII, hơdôm tơring čar kual Dap Kơdư khut khăt hăng bruă hluai tui hơdôm Akô̆ bruă pơplih phrâo dong, dưm dăp pơphun glông jơlan mă bruă rơguăt, mă bruă tŭ yua, ba glăi bôh tơhnal.

Thun 2024, Ding jum kông an ngă tui akŏ bruă man pơdong 1.200 boh sang khăp pap brơi kơ sang anŏ ƀun rin, tơnap tap, mơnuih djuai ƀiă hăng sang anŏ hơmâo anăn kơnuk kơna djru ƀơi tơring čar Dak Lak. Hăng tơlơi gơgrong ba amăng bruă mă gir run hrŏm, kông an  Dak Lak hăng gong gai kơnuk kơna tơring čar gum, 1.200 boh sang dưi ngă giong blan 7/2024, tañ hloh hrơi blan pơkă amăng 3 blan. Tui hăng Khua ding jum kông an, ơi Lương Tam Quang, Ding jum kông an amra ngă hlâo amăng bruă ngă tui hơdră “Amăng dêh čar gum hrŏm pơsir hĭ sang tơ̆i, sang sô kơ mơnuih ƀun rin amăng dêh čar”, kiăng ƀu lui kơ hlơi dŏ glăi pơ klôn ôh; djru hrŏm sit nik amăng bruă kiăng lui abih 153.000 boh sang tơ̆i, sang răm amăng dêh čar, boh nik ñu amăng kual ataih, kual tơnap tap, gleh glar amăng bruă pơgang rơnuk rơnua, amăng anun hơmâo kual Dap Kơdư.

 Lơ 22/11/2024, ƀơi Tơdrŏn lak Lơ 10/3, plơi prong Buôn Ma Thuột pơphun ngă Lơphet hơdor glăi 120 thun Hrơi pơdŏng pơjing tơring čar Dak Lak

 Găn rơgao 120 thun pơjing hăng pơđĭ kyar, truh ră anai Dak Lak hmâo jing laih tơring čar pơđĭ kyar ƀơi kual Tŏng Krah dêh čar – Dap Kơdư; bruă bơwih ƀong djă pioh rơnoh đĭ kyar klă; nua gơnam amăng tơring čar ba jơlan hlâo kual Dap Kơdư.

 Nao pơhmư̆ hăng pơhiăp amăng mông ngă lơphet, Kơ-iăng Khua dêh čar ơi Nguyễn Hòa Bình hơ-ưč hmưi, pơsit yôm hăng bơni tơlơi gir run, hơdôm bôh than mơ̆ng Ping gah, gong gai, ling tơhan hăng mơnuih ƀôn sang tơring čar Dak Lak dưi ngă. Kiăng hrưn đĭ pô pơđĭ kyar kơjăp phik, lăp djơ̆ hăng anih anom phun hăng tơlơi pơtrut phun mơ̆ng kual Dap Kơdư, tơring čar Dak Lak kiăo tui črâo ba dong bruă mơ̆ng dêh čar, pơplih phrâo hơdôm tơhnal ba tơbiă, bruă jao hmâo lăi amăng Tơlơi pơtrun pơsit Jơnum Ping gah hơdôm gưl, Klah čun mrô 67 hăng Tơlơi pơtrun pơsit mrô 23 mơ̆ng Ding jum kơđi čar, Tơlơi pơtrun pơsit mrô 72 mơ̆ng Khua pơ ala mơnuih ƀôn sang hăng Tơlơi pơsit mrô 1747 mơ̆ng Khua dêh čar pơsit pơkă kual tơring čar Dak Lak, hrưn đĭ djơ̆ tui tơhnal ba tơbiă truh thun 2050 Dak Lak “Jing tơring čar hmâo glai klô, gru grua, tô nao rai pơčeh phrâo, jing anih nao kiăng khăp, lăp dô̆ hơdip”.

Lơ 23/3/2024, tơring čar Dak Nông jơnum hơdor glăi tal 20 thun hrơi akŏ pơdong glăi tơring čar laih anun tŭ mă miđai rơngai mrô sa.

Tơdơi kơ 20 thun akŏ pơdong hăng pơđĭ kyar, tơring čar Dak Nông hơmâo tŭ mă lu boh tơhnal yom amăng dưi pơklaih mơ̆ng anăn sa boh tơring čar ƀun rin. Hơnơ̆ng pơđĭ kyar bơwih ƀong huă pơhrui glăi lu, rơnoh gơnam pơkra ming lu hloh truh 12 wơ̆t; rơnoh prăk tuh pơ alin pơđĭ kyar amăng abih bang amăng mơnuih mơnam lu hloh 20 wơ̆t pơkă hăng thun phrâo akŏ pơdong. Pơtum pơblih bruă mă ngă amuñ tuh pơ alin, sĭ mơdrô, bruă mă tuh pơ alin čuk pơkra jơlan glông, man pơdong atur djop bruă, ruah mă anŏ phun pơtrut pơđĭ kyar, Dak Nông hlăk ngă hăng hơmâo ngă jing anih pơhưč lu anom bruă tuh pơ alin amăng dêh čar hăng mơ̆ng tač rơngiao. Lăng ƀô̆ mơta tơring, plơi prong laih anun kual plơi pla pơblih kơtang biă mă, hiam klă, pran jua kơtang pơtrut tơlơi hơdip mơda, kiăng hrưn đĭ, hơmâo lu tơlơi čang rơmang pơ anăp ƀơi kual Dap Kơdư. Truh thun 2030, Dak Nông kơtưn kiăng jing tơring čar pơđĭ kyar amăng kual Dap Kơdư; jing anih  anom tuh tia pơkra ming eh pơsơi bosit alumin-ñôm kơ dêh čar, anih phun pơkra rai apui lơtrik hơdjă amăng kual; pơđĭ kyar bruă ngă hmua ba yau boh thâo ia rơgơi phrâo, lir hơbit tui ruăi pơkra ming gơnam  rơnoh sĭ mơdrô yom.

Mơ̆ng lơ 5 truh lơ 31/12/2024 pơphun Festival bơnga Đà Lạt tal 10, hăng anăn ñu “Bơnga Đà Lạt – Lu mơta ia ayom”.

Đà Lạt lĕ plơi prong Festival Bơnga mơ̆ng Việt Nam, jing jơnum ngui phara ha jăn mơ̆ng plơi prong  čư̆ siăng klă hiam, plơi prong pơčeh phrâo amăng er adôh mơ̆ng UNESCO hăng jing plơi prong gah “Ƀut 5 bôh plơi prong Festival lăp djă pioh mơ̆ng kual ASIA”. Festival bơnga Đà Lạt pơpŭ dong hơdôm anô̆ yôm bơnga hăng bruă pla bơnga; pơjing tơhnal gal pioh bruă pla bơnga Đà Lạt  nao hrŏm, lar hyu, pơđĭ kyar gum hrŏm bruă tuai čuă ngui, măi mok tâ̆o yâu hăng mut hrŏm jar kơmar.

 Pơhiăp amăng mông ngă Lơphet pok phun, Kơ-iăng Khua dêh čar ta ơi Nguyễn Hòa Bình pơsit yôm tơlơi gir run, pran pơsit hăng hơdôm bôh tơhnal yôm phăn mơ̆ Ping gah, Gong gai hăng mơnuih ƀôn sang djop djuai ania tơring čar Lâm Đồng, plơi prong Đà Lạt dưi ngă amăng hơdôm thun rơgao. Hrŏm hăng anun, pơtă pơ̆ anăp anai, tơring čar khom đing nao dong bruă pơgang anih anom dô̆, đing nao măi mok ngă đang hmua, ruah mă pơjing, blơi mut djop djuai bơnga yôm, hmâo nua yôm, lăp djơ̆ hăng arăng kiăng blơi pioh pơđĭ pran bơkơtưn hăng pơđĭ kyar bruă bơnga kơjăp phik; pơtrut pơsur hơdôm jơlan hơdră pơlir nao rai, pơlir hơbit kơplah wah anom bơwih ƀong hăng mơnuih pla bơnga, pơgang hăng pơđĭ kyar anăn păn gơnam pioh mut hrŏm hăng tač rơngiao.

Jơnum ngui bruă Sầu riêng Krông Pač tal II thun 2024 hơmâo akŏ pia “Sầu riêng Krông Pač: Pơđĭ kyar hăng mut phung” pơphun mơ̆ng lơ 31/8 truh lơ 2/9/2024, hăng 12 wơ̆t jơnum sit nik amăng hrơi mông jơnum prong  anai, pioh glăi sa tơlơi lăp hơdor pioh mơ̆ng mơnuih ƀôn sang.

Jơnum ngui bruă sầu riêng hơmâo čơkă năng ai 200.000 wơ̆t tuai nao ĕp lăng, tuai amăng tơring čar, amăng dêh čar hăng tuai jar kmar nao jơnum hrŏm pioh glăi tơlơi mơak amăng pran jua mơnuih ƀôn sang. Jơnum anai pơhưč rơbêh 350 čơgăn arăng pơdă gơnam pơdah thâo anun lĕ gơnam mơ̆ng anom bruă sĭ mơdrô, anom ngă hrŏm, anom bruă pơkra ming gơnam sĭ mơdrô djop mơta mơ̆ng boh sầu riêng, gơnam OCOP hăng gơnam đang hmua yom phara, gơnam yua mă bruă ngă hmua....ƀơi tơring čar, amăng dêh čar kiăng pôr pơthâo, lăi pơthâo gơnam sĭ mơdrô lu mơta boh troh hiam, ƀong jơman hloh mơ̆ng plơi pla pô.

Rơwang hrơi tơjuh Bôh thâo – Tuai čuă ngui tal V hăng Jơnum ngui čing hơgor, suang djop djuai ania ƀiă tơring čar Kon Tum tal II hăng anăn ñu “Lông găn rơgao lăng bôh thâo – hơduah ĕp glai klô” pơphun mơ̆ng lơ 11 truh 14/12/2024.

 Rơwang hrơi tơjuh Bơnga ang – Čư̆ Đang Ya thun 2024 dưi hmâo Jơnum min mơnuih ƀôn sang tơring čar Gia Lai pơphun mơ̆ng lơ 6 truh lơ 12/11/2024, hăng lu bruă mă bôh thâo, adôh suang, bơkơjăp drơi jăn lăp djă pioh, phara ha jăn kah hăng: Jơlan hơdră adôh suang “Vũ khúc Dã quỳ - Chư Đang Ya năm 2024”; pơdah atông čing hơgor, yun suang đưm; anih anom pơdah mơñam bung bai, trah rup, rơngaih mơñam băn ao, pơkra gông brô̆ djuai ania, trah kyâo đưm, gông brô̆ djuai ania đưm; pơdă prưng lăi pơthâo gơnam bôh thâo phara mơ̆ng djop djuai ania; hơkrŭ pơdŏng glăi phiăn ngă Yang huă asơi hle gah djuai ania Bahnar; Jơnum pơplông đĭ čư̆ apui kơdir Čư̆ Đang Ya hăng bôh yôm lĕ đuăi pơplông hăng đĭ čư̆; tlaih khinh khí cầu; pri Half Marathon 2024 “Râo pơdưh kual plơi Čư̆ Păh - Bruă tô nao rai Čư̆ hăng Bơnga”...

Lơ 26/12, ƀơi plơi prong Gia Nghĩa, Jơnum min mơnuih ƀôn sang tơring čar Dak Nông pơphun ngă Lơphet čơkă anăn păn Đang bơnga lŏn drŏn đơ đam rŏng lŏn tơnah UNESCO Dak Nông hmâo pơtŏng sit anih dŏng amăng hla kak kông ngăn đơ đam rŏng lŏn tơnah, djru pơpŭ nua yôm lŏn drŏn, bôh thâo đưm hăng glai klô phara ha jăn mơ̆ng kual Dap Kơdư. 

 Thun 2024, ƀơi djop tơring čar amăng kual Dap Kơdư pơphun lu bruă mă ĕp anih anom sĭ mơdrô.

Mơ̆ng lơ 6-12/9/2024, anom bruă pơphun sĭ mơdrô Ding jum tuh tia pơkra ming hăng sĭ mơdrô ngă hrŏm hăng Gơnong bruă tuh tia pơkra ming hăng sĭ mơdrô tơring čar Kon Tum pơphun jơnum pơdă sang čơ sĭ mơdrô măi mok kual Dap Kơdư ƀơi plơi prong Kon Tum, pơhưč 250 čơgăn gơnam ba prưng pơdă mơ̆ng 110 boh sang bruă sĭ mơdrô amăng dêh čar hăng mơ̆ng tač rơngiao lăi pơthâo, pôr pơthâo gơnam sĭ mơdrô mă mok yua amăng bruă ngă hmua, kual plơi pla, gơnam pơkra ming djơ̆ hơnơ̆ng pơkă OCOP, gơnam hơmâo phara hơjăn amăng kual hăng tơring čar.

Lơ 23/8/2024, ƀơi tơring čar Lâm Đồng pơphun jơnum pơƀut bruă mă pơtruh nao rai bruă sĭ mơdrô hăng tuh pơ alin plah wah anom bruă sĭ mơdrô  tơring čar Lâm Đồng hăng anom bruă sĭ mơdrô mơ̆ng ƀôn prong Hồ Chí Minh. Ƀing khua mua nao jơnum hơmâo pơčrong sai, hơduah ĕp bruă mă kiăng ngă hrŏm sĭ mơdrô hăng tuh pơ alin. Hơmâo 12 boh anom bruă sĭ mơdrô, anom ngă hrŏm tơring čar Lâm Đồng hơmâo kĭ pơkôl sĭ mơdrô hăng anom bruă mơdrô mơ̆ng ƀôn prong Hồ Chí Minh.

Mơ̆ng lơ 23 truh lơ 24/9/2024 ƀơi Ƀuôn Ma Thuôt, hrơi mơak pơphun bruă mă pơčah phrâo tơring čar Dak Lak thun 2024, hơmâo lu bruă mă lăi pơthâo, pôr pơhưč brơi gơnam sĭ mơdrô OCOP, gơnam pơkra ming ƀơi kual plơi pla, gơnam bơwih brơi tuai hyu ngui. Jơnum bơkơtuai pơtrut bruă mă sĭ mơdrô tơring čar Dak Lak, pơphun bruă mă, pơblih phrâo pơčeh phrâo hăng pơđĭ kyar hơđong kơjăp.