Amăng hrơi adai pơ-iă kơtang rơnuč blan 6, ƀơi đang tơbâo thôn Thanh Minh, să Suối Trai, tơring čar Dak Lăk, rơbêh 2 ha đang tơbâo mơ̆ng ơi Ale Văn Đăng, 77 thun hơmâo koh pơhrui rơbêh 1 wơ̆t hrơi tơjuh laih, samơ̆ ăt pioh lui amăng pơ-iă đôč, ngă djơ anun jing tơbâo añot hĭ, djhôl hĭ mơn. Tơdơi kơ 1 wơ̆t hrơi tơjuh koh tơbâo, jing tơbâo krô laih 1/3 ia sik. Ơi Ale Văn Đăng bơngơ̆t: “Gơmơi koh tơbâo kiah 10 hrơi anai baih, samơ̆ ƀu hơmâo rơdêh rai pơdŭ ôh. Iâu nao pơ anih blơi lĕ arăng lăi ƀu hơmâo rơdêh, sang măi glăk răm. Hiưm thâo ngă dong. Ană kâo iâu telephôn lu wơ̆t laih, iâu nao pơ sang să dong. Bơ hơne tơbâo krô abih yơh, ƀong hơget dong anai”.

Rôk tui jơlan prong 19C găn nao pơ hơdôm boh să Suối Trai, Sơn Hòa, Vân Hòa...ƀu tơket tơkeng yơh tơbâo arăng pioh lui, krô krañ kar hăng hơdrăng pơdai. Ƀơi lu đang tơbâo pơkŏn, phun tơbâo rơgao hrơi koh rơbêh 3 blan laih samơ̆ ăt dŏ dơnong pơ hmua đôč, aka ƀu thâo hrơi hơbin mơ̆ng dưi nao koh. Mơnuih pla tơbâo brơi thâo, aka ƀu hơmâo djơ̆ ôh thun mơnuih ngă tơbâo tơnap tui hăng thun anai: “Djơ anuh yơh anun, ta koh lĕ ñu krô ăt kah hăng ta hna mơn. Bơ ta ƀu koh lĕ ăt dŏ dơnong hnun mơn, ƀhu lui na nao amăng pơ-iă, ană plơi ƀu thâo rơkâo pô hlơi ôh”.

Tơlơi anai jing tơlơi hơmâo mơ̆ng lu mơnuih ngă tơbâo ƀơi kual gah ngŏ tơring čar Dak Lăk laih. Mrô jŭ yap aka ƀu djŏp ôh, truh rơnuč blan 6, kơnong ƀơi kual pla tơbâo tơring glông Sơn Hòa hơđăp, hơmâo aset biă ñu 6000ha đang tơbâo aka ƀu koh ôh, jing hơmâo mơ̆ng 10-12% mrô đang (tui hluai kơ să). Pơhmutu ƀơi să Sơn Hòa, să anai hơmâo đang pla tơbâo prong hloh mơ̆ng Dak lăk hăng rơbêh 8.000ha, truh ră anai hơmâo koh pơhrui rơbêh kơ 7100 ha, ăt dŏ mơn giăm 950 ha dong aka ƀu koh. Să ăt ngă laih bruă hăng sang măi pơkra sik KCP pơhrư̆i sui ƀiă bơyan pơkra sik laih anun blơi abih tơbâo kơ neh met wa. Ơi Nguyễn Duy Tình, Kơ-iăng khua jơnum min mơnuih ƀôn sang să Sơn Hòa, tơring čar Dak Lăk brơi thâo: “Ƀơi anăp tơlơi anai, Jơnum min mơnuih ƀôn sang să ngă bruă laih hăng Khul khua kông ti sang măi pơkra sik KCP ngă hiưm pă mơ̆ng anai truh abih blan 7 thun 2026 blơi abih tơbâo mơ̆ng neh met wa, hŭi rơngiă prăk soh sel. Lơ̆m koh kaih lĕ bơyan tơbâo thun tơdơi ƀu hơmâo đơi dong tah”.

Bơyan tơbâo thun anai, sang anŏ ngă tơbâo ƀơi Dak Lăk glăk bưp lu tơlơi tơnap biă mă: hơjan ia dăo lơ̆m krah bơyan; nua tơbâo rơgeh yua sik arăng sĭ kaih, ƀu hơmâo đơi pô blơi yua dah arăng blơi sik mơ̆ng pơkŏn ƀu hơmâo hră pơ-ar; adai pơ-iă hang không phang sui, ngă kơ rơbêh 1.000 ha đang tơbâo apui ƀong laih anun truh abih bơyan yơh, hơdôm rơbâo ha đang tơbâo ăt aka ƀu koh...lơ̆m anun kơƀah mơnuih koh tơbâo, prăk apah pơmă, mơ̆ng 28-30 klăk kơ 100 tơn tơbâo...Sa bơyan tơbâo rơngôt biă hăng mơnuih ngă tơbâo ƀơi ngŏ Dak Lăk./.