Mơng akŏ thun truh ră anai, mah tơdron rơdêh por Liên Khương khŏm krư̆ bah amăng kiăng kơ pơkra ming, anih bơwih brơi tuai čuă ngui ƀơi Lâm Đồng ăt čơkă giăm 12 klăk wŏt tuai čuă ngui, pơhrui glăi him lăng rơbêh 33 rơbâo klai prăk. Mrô pơhrui anai brơi ƀuh tơlơi pơhưč prong mơng kual lŏn anai ăt prong biă mă. Samơ̆, gah tlôn hơdôm mrô pơđĭ kyar anai lĕ ăt hơmâo sa tơlơi aka ƀu dưi pơsir hĭ. Anun lĕ ngă hiưm pă kiăng tŏ tui tơlơi gal mơng kual kơdư Đà Lạt, kual čư̆ siăng Dak Nông hăng kual ia rơsĭ mơtah Bình Thuận kiăng bong glăi tơkai tuai čuă ngui dŏ glăi sui hrơi.

Ƀuh tơlơi dưi tơdơi kơ pơmut hrŏm, lu kông ty ba hyu tuai ječ ameč pơjing hơdôm tour pơlir kual. Mơguah lăng yang hrơi ƀlĕ ƀơi hang ia rơsĭ Mũi Né-Yang hrơi tlam yak rơbat hyu amăng plơi prong Đà Lạt-Hrơi tơdơi dong đĭ song kayak amăng dơnao ia Tà Đùng. Bruă ba hyu tuai ƀuh gêh gal tui anun, samơ̆ lơm pơphun ngă, lu anom bruă bưp tơnap tap kơ jơlan nao rai. Ơi Hoàng Công Định, Khua kông ti TNHH sĭ mơdrô hăng tuai čuă ngui Dima Tour brơi thâo: “Tơlơi yôm hloh lĕ ječ ameč pơđĭ kyar anih anom, jơlan glông tơdơi ƀu ngă amra bưp tơnap tap kiăng pơlir nao rai hơdôm tour kơplah wah 3 kual Mũi Né-Đà Lạt-Dak Nông. Jơlan glông dŏ bưp lu tơnap tap. Ăt čang rơmang hơmâo sa ară jơlan đuăi mơng Dak Nông nao pơ Đà Lạt, Mũi Né amra pơđĭ kyar tañ ƀiă kiăng hơmâo lu tour dưi đuăi nao rai mơng 3-5 hrơi, pơhlôm gêh gal brơi kơ tuai čuă ngui”.

Ƀu djơ̆ kơnong anom bruă hyu tuai čuă ngui, wŏt ƀing tuai ăt ƀuh rơđah hơdôm tơlơi ngă tơnap tap anai. Hơdôm anih lŏn tơhroh, hơdôm taluy ia kor, lŏn pơtâo ăt dŏ khul khăl tơdơi kơ hơjan hlim ngă, glông jơlan nao rai čang rơmang amra tơkuh nao rai hruaih kơplah wah ia rơsĭ hăng čư̆ siăng, jing tơlơi ngă bơngô̆t hăng lu mơnuih. Akŏ blan 7 rơgao, lơm đuăi rơdêh mơng Phan Thiết nao pơ Đà Lạt hăng pơwot glăi rôk tui jơlan mrô 28, 55, 28B, amai Triệu Thị Hồng Phúc lu wŏt khŏm đuăi rơnang lơm găn nao pơ anih lŏn tơhroh dua bơnah jơlan. “Hơmâo 4,5 anih, lơm hơjan amra ƀuh lŏn tơhroh. Ăt hŭi mơn, Bơ jơlan ƀơi anai lŏn tơhroh trun abih laih. Lŏn pơtâo čuah amra tơhlom lơm hơjan. Hơdôm ară jơlan čun čoe hơmâo hơdôm anih lŏn tơhroh truh ta kiăng bôr pơgăn hĭ kiăng pơhlôm rơnuk rơnua brơi rơdêh nao rai. Jơlan tui anai hrơi không hơjan kah khin đuăi nao rai, bơ hơjan hŭi biă mă”.

Ƀơi tong krah Đà Lạt, anih arăng lăng lĕ “hơtai boh” kơ bruă bơwih brơi tuai čuă ngui ƀơi Lâm Đồng ăt dŏ lu anih aka ƀu pơkra, dưm truă hơget ôh. Găn rơgao rơbêh ha thun rơgao, apui kơđen pơčrang rôk jơlan čun čoe Prenn-jơlan mut nao Đà Lạt, rôk ară jơlan anai mơmŏt kleng khŏp. Dua bơnah dơnao Xuân Hương, sa akŏ bruă pơprong sui thun lui ruh, tơlơi anai ngă phara hăng tơlơi čang rơmang kơ sa plơi prong tuai čuă ngui pơplih phrâo.

Anai kơnong lĕ hơdôm rup rap ƀuh ƀơi anăp, tơlơi kiăng pơmĭn nao dong anun lĕ gơnam tuai čuă ngui. Đà Lạt lu tuai čuă ngui. Samơ̆ blơi yua gơnam aka ƀu lu ôh. Ơi Nguyễn Văn Lộc, Khua gơnong bruă gru grua, bơrơguăt drơi jăn hăng tuai čuă ngui hơđăp tơring čar Lâm Đồng, ră anai lĕ Khua git gai Ping gah phương Xuân Hương-Đà Lạt lăi nao tơpă: “Nao pơ Đà Lạt truh 9 mông mơmŏt kâo glăi pit laih, tơdah sui ƀiă rơbat hyu jum dar mơñum ia đôč. Yua hơnong pơkă kơ bruă bơwih brơi tuai čuă ngui ƀơi Lâm Đồng dŏ aset. Ƀing ta kiăng pơplih tơlơi pơplih bơwih brơi tuai čuă ngui ƀu djơ̆ kơnong jŭ yap mrô mơnuih rai čuă ngui pơ Lâm Đồng đôč ôh. Bruă jŭ yap anai kiăng kơ lăi pơthâo kơ arăng đôč, samơ̆ kâo pơmĭn kiăng pơplih bruă mă, sem lăng sit nik kơ bruă tuai čuă ngui”.

Truh ră anai jơlan gah pơđĭ kyar bơwih brơi tuai čuă ngui pơlir kual tơdơi kơ pơmut hrŏm tơring čar dŏ kơnong amăng hră pơ-ar đôč; hơdôm gơnam bơwih brơi tuai čuă ngui pơlir kual kơdư-čư̆ siăng-plơi prong hang ia rơsĭ ăt glăk lăng lĕ tơlơi dưi; aka ƀu pơjing tong ten hơdôm glông jơlan, gơnam pơlir yôm phara dưi bơkơtưn prong kơplah wah djop kual. Ơi Hồ Văn Mười, Ding kơna Ping gah gơnong glông, kơ-iăng Khua git gai Ping gah tơring čar, Khua Jơnum min mơnuih ƀon sang tơring čar Lâm Đồng lăi nao tơpă kơ tơlơi anai: “Ƀing ta pơsit tong bruă bơwih brơi tuai čuă ngui lĕ sa amăng tlâo bruă akŏ phun amăng tơlơi bơwih ƀong huă tơdơi kơ mă gơnam amăng atur lŏn, apui yua hăng ngă hmua yua boh thâo phrâo. Samơ̆ kâo ƀuh aka ƀu hơmâo tơlơi pơmut hrŏm hăng aka ƀu pơphun kjăp phik, pơlir hơbit laih dong gong gai, gơnong bruă gru grua, bơrơguăt drơi jăn hăng tuai čuă ngui, hơdôm boh ƀon lan kiăng hơmâo tơlơi pơtrut kơtang amăng bruă tuai čuă ngui”.

Bruă pơmut hrŏm pok rai anih pơđĭ kyar phrâo, samơ̆ gơnong bruă tuai čuă ngui Lâm Đồng kiăng lu dong tơlơi pơčeh klă ƀudah hơdôm mrô pơđĭ kyar phrâo. Tơdah jơlan glông tơkuh nao rai, gơnam hơmâo pơkra phrâo hăng hơdôm boh ƀon lan ngă ha amăng plĕ, bruă ĕp lăng kual lŏn phrâo ƀu djơ̆ kơnong lu tui, ăt dưi bong tơkai tuai čuă ngui sui ƀiă./.