Khă hnun hai, hơdôm mơnuih jrôk jơlan anun leng kơ hmâo tơhnal pơkra glăi tơlơi soh, ĕp glăi pran đăo kơnang, pơjing glăi tơlơi hơdip mơda. Tơlơi mut bruă klă mơ̆ng gong gai plơi pla, tơlơi păp ñai mơ̆ng plơi pla, ƀing mơnuih jrôk jơlan ha tal, ră anai hmâo laih tơlơi hơdip mơda phrâo. Lu mơnuih amăng ƀing gơñu hmâo laih hơdôm bôh than klă gum hrŏm hrưn đĭ kơdŏng glăi hơdôm tơlơi pơmin jŭ sat mơ̆ng ƀing kơdŏng glăi kơnuk kơna, djru djă pioh tơlơi hơđong kơ plơi pla. Grŭp hyu mă tơlơi pơhing phrâo Gong phun jua pơhiăp dêh čar Việt Nam pơdŏng ƀơi kual Dap Kơdư hmâo laih hơdôm tơlơi čih “Mơ̆ng jrôk jơlan pơwot glăi hăng plơi pla”.

Tơlơi čih blung a hmâo anăn ñu “Hơdor glăi hơdôm hrơi jrôk jơlan”, jing tơlơi ruai mơ̆ng mơnuih tơblŭt hmư̆ tui tơlơi pơtrut tơlơi plư mă mơ̆ng ƀing kơdŏng glăi kơnuk kơna hăng ƀing ƀu klă pioh kơdong phă Kơnuk kơna, kah ania pơpha plơi pla hăng tơlơi mơ̆ gơñu hmâo glăm ba laih.

Amăng sang apui pơđao ir mơ̆ng sang anô̆, pơ̆ plơi Mrông Yô̆ 1, să Ia Ka, tơring glông Čư̆ Păh, tơring čar Gia Lai, ơi Rčŏm Byat ăt hmâo mơ̆n ƀơƀiă tơlơi kư guăm ruai glăi kơ tơlơi jrôk jơlan mơ̆ng pô. Thun 2001, ñu hmâo ƀing sat ngă juăt hăng plư̆ mă kiăo tui khul kơdŏng glăi kơnuk kơna “Tin lành Đê Ga” Lơm anun, ñu ƀu thâo hluh ôh anun lĕ sa khul grŭp ƀu djơ̆ phiăn ôh, dô̆ kơđap amăng lăm tơlơi đăo pioh pơphun hơdôm bruă mă kơdŏng phă lŏn ia. Lơm anun ñu ăt dô̆ djưng djư lĕ gơñu yua laih hơdôm tơlơi čem hiăp mơ-ak pioh plư pleč, pơmin tơdah kiăo tui gơñu amra hmâo sang jơnum phara ha jăn pioh jơnum, mơnuih Jarai amra hmâo lŏn ia ha jăn mơ̆ng pô, dưi pơđĭ ngă khua gong gai, wai lăng lŏn drŏn prong prin:

“Ñu lăi jar kơmar amra tek rơwek nao hăng djru gum anun anăm huĭ ôh, djă pioh yơh tơlơi đăo Đê Ga mơ̆ng pô. Lơm anun, ñu jao brơi kơ pô 4 bôh plơi, lơm thâo hluh lĕ anun ƀu djơ̆ ôh. Kâo kơdŏng glăi Kơnuk kơna, kơdŏng glăi gong gai, kơdŏng glăi mơnuih apăn bruă ... lĕ pô ƀuh soh biă. Arăng pơtô juăt pô lu wot lĕ pô ƀu hmư̆ ôh".

Tơdah kah hăng ơi Rčom Byat tañ thâo ƀuh tơlơi ngă soh lĕ, ơi Siu Un (59 thun), dô̆ ƀơi plơi Tân Điệp 1, să Ia Ake, tơring glông Phú Thiện, tơlơi khom pơ ala glăi truh kaih hloh. Hăng sa amăng ƀing ding kơna phun mơ̆ng Khul Tin lành Đê Ga" ƀơi Gia Lai, ơi Siu Un hmâo arăng pơsit 16 thun dô̆ amăng sang mơnă yua kơ hơdôm bruă mă nao kơđai glăi hăng bôh tŭ yua mơ̆ng lŏn ia.

Akô̆ hơdôm thun 2000, ơi Siu Un hmâo ha tal hmâo anăn amăng hră čih ding kơna phun mơ̆ng Tin lành Đê Ga ƀơi tơring čar Gia Lai. Siu Un apăn akô̆ FULRO gưl kual, khua phun amăng tơlơi ngă rung răng ƀơi Ayun Pa amăng thun 2001 pioh kơdŏng glăi "Mơnuih Yuan mă lŏn mơ̆ng mơnuih djuai ania ƀiă", kiăng pơjing "Kơnuk kơna Đê Ga rơngai”, ruĭ nao pơ̆ sang să pơgô̆ hăng gong gai. Ơi Siu Un hmâo mă amăng blan 2/2001, tơdơi kơ pơsit dô̆ amăng sang mơnă 16 thun yua kơ hơdôm tơlơi soh “Mă pơkŏng mơnuih soh hăng tơlơi phiăn, ngă rung răng ƀơi plơi pla ƀôn ƀut hăng hyu pơsuh”. Ơi Siu Un hơdor glăi:

“Rim hrơi ha jăn dô̆ tơguan, tơguan amra hmâo mơnuih nao pơtlaih pô. Yua kơ pô lĕ “ba akô̆” sa bôh tơring glông anun khul khom hơdor truh kơ pô, khom pơtlaih brơi pô, tơlơi pơhing pô ƀơi hơpă gah kơdih amra thâo. Tơdơi kơ anun, amăng blan 10/2001 pơphun pơsir. Ƀing gơmơi khom dô̆ amăng sang mơnă, ăt hmâo tơlơi dô̆ tơguan, ăt hmâo mơn tơlơi čang rơmang... Truh hrơi tal 5 lĕ kâo ƀu dô̆ čang rơmang dong tah".

Hơdôm thun blan ngă tui phiăn pơsit dô̆ amăng sang mơnă ƀu kơnong kơ tơlơi bơtơhmal pioh kơ ơi Siu Un ôh mơ̆ ñu dô̆ jing tơlơi hning rơngôt hăng sang anô̆. Ƀơi plơi pla, bơnai ñu yă Ksor H’Loi, khom sa čô rông ană anet amăng tơlơi kơƀah tơnap djop mơta. Tơlơi ngă yă Ksor H’Loi ruă pran jua hloh lĕ tơlơi plư pleč mơ̆ng khul tin lành Đê Ga. Ƀu hmâo hlơi amăng ƀing gơñu nao čuă ơi Siu Un ƀudah gum djru sang anô̆ kah hăng hơdôm tơlơi plư pleč hlâo adih. Hơdor glăi hơdôm hrơi blan ruă pran jua anun, yă Ksor H’Loi bơbrĭ ia mơta:

“Kơteng nô anet hmâo 2 blan lĕ rơkơi nao dô̆ amăng sang mơnă, lui raih kâo pơ̆ sang. Ană bă lĕ glăk dô̆ anet, rơkơi lĕ dô̆ amăng sang mơnă ƀu thâo rông ană hiưm hơpă ôh. Ană bă prong mơ̆ng anih 6 truh anih 9 kơnong kơ hmâo sa blah sum sa blah ao đôč. Ñu rơngôt biă! Kơnuk kơna hăng ƀing apăn bruă pơsur pran jua pô anăm bơngot bơwih brơi yơh kơ ană pô. Ră anai rơkơi kâo glăi hăng sang anô̆ laih. Ană prong kâo lăi: Ama hơi ama hmâo tơlơi soh hăng Kơnuk kơna hăng gong gai laih ră anai kơnong kơ mă hơdôm bruă klă đôč”.

Amăng hơdôm thun 2001, 2004, 2008 ƀơi Dap Kơdư lăi hrŏm hăng tơring čar Gia Lai lăi ha jăn, gah yŭ tơlơi git gai, črâo ba, djru gah tlôn mơ̆ng ƀing kơdŏng glăi kơnuk kơna hmâo anăn iâo lĕ “Khul Tin lành Đề Ga” hmâo pơsuh mơnuih ƀôn sang ba truh tơlơi rung răng ngă lu mơnuih ƀu mơ-ak amăng pran jua. Bruă mơ̆ng khul anai lĕ pơčeh ča hơdră bruă mơ̆ng Kơnuk kơna, kah ania pơpha djuai, ngă pơ-areh nao rai. Bruă ngă mơ̆ng gơñu hmâo pioh glăi laih hơdôm tơlơi hning rơngôt kơ ha rơbâo bôh sang anô̆, hơdôm mơnuih amăng mrô anun hmâo pơ ala glăi laih prong prin hơdôm tơlơi ngă soh mơ̆ng pô ba truh. Hăng bôh nik, gơñu kơnong kơ jing mơnuih jrôk jơlan mơ̆ng ƀing plư pleč dŏng gah tlôn khul anai./.