Nao čuă hăng ƀơk gơnam kơ Sang hră gưl sa Bắc Sơn, tơring čar Vân Nam, dêh čar Khač, Khua ding jum ơi Phan Văn Giang hăng Khua ding jum ơi Đổng Quân čang rơmang kơnuk kơna ăt hơmâo lu bruă mă kiăng pơtrut pran jua kơ čơđai sang hră hơmâo pran jua pơyơr tơlơi pơmin bruă mă kơ lŏn ia hăng jing ƀing pơ ala čơđai, tŏ tui djă pioh tơlơi gum pơgôp, lir hơbit, giăng mah gru grua dua boh dêh čar Việt Nam hăng Khač.

Ăt amăng hrơi anun mơ̆n, dua čô khua ding jum hrŏm hăng grup mă bruă gah ling tơhan nao čuă plơi Bát Điều Bán. Anai lĕ plơi Mơak hlak guai dêh čar phrâo hiam, ƀơi gah kơdư tơring glông Hà Khẩu, kual Hồng Hà, tơring čar Vân Nam, dêh čar Khač. Jao gơnam pơyơr yôm pơphăn pran jua khăp, brơi kơ plơi Bát Điểu Bán, dua čô khua ding jum čang rơmang plơi anai amra jai hrơi pơđĭ kyar hloh, hơmâo lu bruă mă jĕ giăm nao rai hăng Việt Nam, kiăng kơtưn tơlơi thâo hluh tơdruă, djru hrŏm pơtrut bơwih ƀong huă pơđĭ kyar ƀơi guai dêh čar.