Ƀơi anăp kơ hơjan prong, mơguah kơnôl 9/9, Anom bruă wai lăng ayuh hyiăng rơngĭt adai tơring čar Dak Lak pơhŭi na nao kơ tơlơi truh sat gưl 1 hăng 2, hơmâo hơjan prong sui, grŏm kmlă, hơkruah yâo, hơjan pler, ia lip hăng lŏn tơhroh. Rơbêh 300 čô čơđai sang hră hrăm anih 10 ƀơi 2 anih pơdong phara mơng Sang hră gưl I Chu Văn An, să Cuôr Dăng, arăng brơi pơdơi sang hră yua kơ jơlan ia dăo, ia mơng hơdôm đang kơsu rô trun ngă ia dăo, ia rô čơtăng. Buôn Aring, anih hơmâo sang hră pơdong, juăt ia dăo lơm hơjan prong. Gong gai să rơkâo rŭ pơdong, laih dong pơjing akŏ bruă pơkra ming ƀơi hơdôm anih lŏn tơhroh, man đing pơđoh đuăi ia.

Hơjan prong amăng hơdôm hrơi mơtăm, ia mơ̆ng hlâo adih tơluh trun gah dơnung, ngă kơ lu plơi pla gah Yŭ tơring Gia Lai ia dăo, lip plơi pla, tơhlŏm lŏn, jơlan nao rai kơđông mơn, laih anun ngă tơnap bruă ngă hmua pla pơjing. Ƀơi să Ia Pa, tơdrông tua ia blai Mơ Nang 2 hlâo kơ anun dăo laih, pơčlah 300 boh sang anŏ ƀu thâo tơbiă gah rơngiao; tơdrông kyâo tŏ Ia Pa hăng Ia Tul ia kor pơđuăi mơn. Năng ai 7ha pơdai hăng kơtor ia dăo. Ƀơi să Ia Hiao, rơbêh 180 ha phun pla răm rai, lu biă ñu lĕ pơdai, kơtor hăng añăm pơtăm. Hơdôm boh să Gào, Ia Krăi, Phú Thiện ăt ia dăo mơn, lu glông jơlan, ter hang ia krông, čroh hnoh tơhlŏm, pơčah hĭ. Gong gai iâu pơthưr ling tơhan, mơnuih apăn bruă ba pơđuăi ană plơi mơ̆ng anih hŭi rơhyưt, pơhŭi hlâo hơdôm anih amuñ ia dăo kơtang, laih anun jŭ yap mrô gơnam rơngiă, răm rai./.