Ƀơi plơi, ƀôn Sô Ama Lơng A, să Ia Hiao, jơlan lơ̆n dơlut hlŭ, đôm tơkai, anet aneo kơniă biă rô nao rai hlâo adih, ră anai pok prong tui, tuh ƀêtông, rô nao rai hruaih laih. Ƀơi akŏ phun jơlan tơkuh anai lĕ sang ơi Siu Hiếu, Khua Jơnum min djop djuai ania mơnuih mơnam Việt Nam să Ia Hiao mơtam. Lơ̆n ƀơi anăp jơlan sang anŏ gơñu, djơ̆ hĭ jơlan pok pơhư brơi ană plơi pla amăng plơi rô nao rai rơhaih hloh. Ƀu ƀiă ôh mơnuih dŏ sư̆ rơbư̆ pơmin nao rai lơ̆m khom lui hĭ lơ̆n sang đang hmua pioh pok jơlan plơi pla, lơ̆m lơ̆n hlăk hơmâo nua kơ sang anŏ, samơ̆ ñu pơsit pơyơr lơ̆n sang, pok jơlan kơ ană plơi pla. Ơi Siu Hiếu lăi, kiăng jak mơnuih ƀôn sang ngă lĕ, mơnuih apăn bruă pô khom ngă hlâo brơi arăng ƀuh.

“Drơi jăn kâo pô khom ba jơlan hlâo amăng bruă pơtô lăi, jak iâu mơnuih ƀôn sang pơyơr lơ̆n sang đang hmua pioh pok jơlan nao rai. Hăng sang anŏ gơmơi lĕ tơdơi kơ hmư̆ mơ̆ng dlông pơtrun, jak iâu sang anŏ hăng phung wang ngă tui pơyơr lơ̆n sang đang hmua pioh pok jơlan. Ăt pơđĭ tui tơlơi gơgrong ba mơ̆ng mơnuih ping gah ba akŏ amăng bruă mă jak iâu mơnuih ƀôn sang”.

Mơ̆ng bruă mă ba jơlan hlâo yua khua mua apăn bruă, mơnuih ping gah ngă hlâo, mơnuih ƀôn sang să Ia Hiao tŭ ư hrŏm bruă pok jơlan rô nao rai amăng plơi pla, pok jơlan nao pơ hmua. Truh ră anai, hơmâo năng ai 450 boh sang anŏ tŭ ư pơyơr lơ̆n sang đang hmua pok prong 30 arăt jơlan nao rai amăng 11 boh plơi pla, hăng abih tbang anŏ glông 12,4 km.

Ƀơi plơi Yên Phú, yă Vũ Thị Lý, ăt amra taih čom hĭ, ruh war bơnư̆ sang anŏ man kơjăp pioh pok jơlan. Tui hăng yă Lý, hlâo kơ pok pơhai, khua mua apăn bruă lu wơ̆t nao pơtô lăi, pơblang tong ten kiăng mơnuih ƀôn sang thâo hluh pok jơlan nao rai prong ƀiă, sang anŏ ăt hơmâo anŏ tŭ yua mơ̆n.

“Pok prong jơlan nao rai, rơdêh rô ăt hiam klă ră anai pơđĭ kyar tar hloh, amăng plơi yua hơmâo sang anŏ blơi rơdêh ôtô, hơmâo ping gah hăng kơnuk kơna djru brơi pok jơlan pok prong ƀiă nao rai amăng plơi pla hiam mơak, gơmơi amra ruh hĭ yơh war bơnư̆ man kơjăp laih, kiăng pok jơlan hrŏm ană plơi”.

Mơ̆ng rơnuč thun 2025 truh ră anai, să Ia Hiao hơmâo tuh pơ alin 3,6 klai prăk ngă giong jơlan nao rai hăng jơlan nao pơ hmua hăng đơ đam truh 40 ha. Să him lăng lui hĭ king anet, hmua raih daih, akŏ pơjing đang hmua prong sa anih, ngă gêh găl brơi khul măi, rơdêh kai hmua, yuă pơdai mut nao truh pơ hmua amuñ hloh.

Hơdôm mrô rơnoh tuh pơ alin kah hăng tơlơi ră sa črăn amăng tơlơi bơră ruai. Sa tơlơi yom hloh dơ̆ng lĕ, ring bruă dưi ngă pơpă hăng pơsir tơlơi hơgĕt brơi kơ mơnuih ƀôn sang. Ƀơi Ƀôn Ama Hrai, ơi Nay Hak hơmâo sa ar hmua pơdai ia, rah pơtem sui thun hăng anai laih. Hlâo adih, bruă ngă hmua mơ̆ng sang anŏ gơñu kơnang kơ ayuh hyiăng hơjan hlim lơ̆n adai brơi. Sit hơjan hlim prong ia dăo, adai pơ-iă kơtang phang khôt lui soh sel ƀu hơmâo ia pơtem pơdai; djơ̆ thun hơmâo, djơ̆ bơyan lui soh. Tơl hơmâo ia hnoh bơnư̆ pơkong pling nao, sang anŏ ơi Nay Hak ăt plai ƀiă tơnap.

“Ră anai, hơmâo ia mơ̆ng bơnư̆ pơkong pling rai, sang gơmơi hơmâo sa ar hmua pơdai ia lu thun hăng anai, ră anai mơak laih hơmâo ia, hơmâo jơlan rôk tui kơnua king, gêh găl pơdư̆ pơgiăng pơdai, rai pơ hmua. Hơmâo kơnuk kơna djru, pơkra brơi jơlan rôk tui king hmua, hơmâo ia djop gơmơi mơak biă mă, ƀu thâo anŏ či lăi dơ̆ng tah”.

Hră pơtrun jơnum ruah ping gah să Ia Hiao guang bruă thun 2025-2030 hơmâo pơtong rơđah hơdôm bruă mă kiăng pơblig kơtang amăng bruă bơwih brơi gong gai kơnuk kơna  ngă bruă kơ mơnuih ƀôn sang, akŏ pơdong kơnuk kơna ngă bruă tơpă hnơ̆ng, lăng kơ mơnuih bobon sang hăng sang bruă mơdrô ngă anŏ phun đing nao. Anai lĕ hơdră să hơmâo ngă pơrơđah tui tui boh yom phun amăng Hră pơčrâo mrô 05 mơ̆ng Ding jum kơđi čar kơ bruă “Pơtrut kơtang hrăm hăng hla tui tơlơi pơmin, pran jua, tơlơi dŏ dong ƀong huă Hồ Chí Minh, boh nik ñu bruă pơtrun ngă tui tơlơi glăm ba ba jơlan hlâo, pran jua mă bruă čar, anăp ngă bruă djơ̆ rơ-ua, mơnuih ƀôn sang ngă khua pô,. Jĕ giăm mơnuih ƀôn sang, tong ten hăng mơnuih ƀôn sang, yua kơ mơnuih ƀôn sang.

Ƀơi să Ia Hiao, tơlơi ngă bruă anun, pơphun mơ̆ng bruă ƀing khua mua nao tơl plơi pla, sang anŏ mơnuih ƀôn sang, pơđing hmư̆ tơlơi kiăng, bruă rơkâo hăng pwosir abih tơlơi dŏ gun mơnuih ƀôn sang dŏ đing nao lu, pơhrua hĭ kơ bruă kơnong hmư̆ hră lăi pơthâo đôč. Tui hăng ơi Bùi Hữu Tâm, Kơ-iăng khua git gai ping gah să Ia Hiao, kiăng pơsir djop bruă djơ̆ lăp lĕ, blung hlâo ƀing khua mua apăn bruă, khom jĕ giăm, thâo hluh mơnuih ƀôn sang laih anun dưm ta hrup hăng mơnuih ƀôn sang mông anun kiăng thâo hluh rơđah.

“Jĕ giăm mơnuih ƀôn sang, đing nao kơ mơnuih ƀôn sang kiăng thâo tơlơi kiăng mơ̆ng mơnuih ƀôn sang jing tơlơi yom hloh. Hơmâo nao giăm, sô̆ hăng plơi pla, sang anŏ mơnuih ƀôn sang kah thâo hluh tơlơi či kiăng hăng hơmâo hơdră pơsir brơi tơlơi gun anun. Tơdah ataih mơ̆ng mơnuih ƀôn sang hă, kơnong hmư̆ hră lăi pơthâo đôč tơnap biă mă. Sa mơta tơlơi dơ̆ng, khom dưm ta pô kah hăng mơnuih ƀôn sang lông lăng wŏ, ta khom kơdŭn glăi hơdôm met lơ̆n sang đang hmua, ruh hĭ war pơgang, ta ăt h’ơi mơ̆n kơlĕ, samơ̆ thâo hluh tơlơi anun, ta jak iâu mơnuih ƀôn sang brơi hmư̆. Tơdah dưi ngă laih tui anun, ta ƀuh yơh tơlơi thâo hluh anŏ kiăng, jĕ giăm mơnuih ƀôn sang hăng pơsir brơi tơlơi dŏ gun amăng mơnuih ƀôn sang, mơnuih ƀôn sang amra djru glăi kơ ta”.

Ƀơi să Ia Hiao, hơdôm arăt jơlan dưi pok prong, hnoh ia mơ̆ng bơnư̆ pơkong ia pling nao pơ hmua dơnao, ngă giong laih, gêh găl brơi kơ mơnuih ƀôn sang ngă hmua pla pơjing, pơđĭ tui rơnoh pơhrui glăi kơ sang anŏ. Mơ̆ng bruă ngă rơđah rơđong anun, gong gai kơnuk kơna hơmâo djru pơblih tui ƀơƀrư̆ lăng kơ mơnuih ƀôn sang yơh phin, mă boh tŭ yua pơsir tơlơi kiăng kơ mơnuih ƀôn sang jing gai pơkă. Anun ăt jing hơdră ƀing khua mua, mơnuih ping gah ƀơi Ia Hiao ngă pơrơđah tui bruă hrăm hăng hla tui tơlơi pơmin, pran jua, tơlơi dŏ dong ƀong huă hiam mơ̆ng Hồ Chí Minh, pơphun mơ̆ng bruă mă tŭ yua sit nik anet aneo đôč amăng tơlơi hơdip tui tơđar rim hrơi, samơ̆ lir hơbit hăng tơlơi hơdip mơda, bruă mă, anŏ kiăng mơ̆ng mơnuih ƀôn sang.